မြန်မာ- တရုတ် နယ်စပ် နန်းတော်ပေါက်မှ ယနေ့ ဩဂုတ် (၃၁) ရက် မူဆယ်မြို့ထဲတွင် မြန်မာရွှေ့ပြောင်း အလုပ်သမား (၁၀၀) ကျော် ထပ်မံဝင်ရောက်ခဲ့ကြောင်း စုံစမ်းသိရှိရသည်။
ထိုသို့ဝင်ရောက်လာသည့် ရွှေ့ပြောင်းအလုပ်သမားများကို တရုတ်အစိုးရဘက်မှာ ၂၄ နာရီ အတွင်း ကိုဗစ်- ၁၉ ရှိ မရှိကို စစ်ဆေးပေးပြီးမှ ပြန်လွှတ်လာပေးကြောင်း သိရသည်။
“ ဒီနေ့က ကျား ၆၂ ဦးနဲ့ အမျိုးသမီး ၄၄ ဦးထပ် ဝင်ရောက်လာတယ်။ သူတို့အားလုံးကိုတော့ တရုတ်အစိုးရကနေ ကိုဗစ် -၁၉ ပိုးစစ်ဆေးပြီးပြီး။ ကျနော်တို့ဖက်ကနေတော့ ထပ်မစစ်ဆေးပါဘူး” ဟု မူဆယ်မြို့ လူသားချင်းစာနာထောက်ထားမှု အကူအညီပေးအပ်ရေး ကွန်ယက်မှ အဖွဲ့ဝင် တစ်ဦး က သျှမ်းသံတော်ဆင့် ကို ပြောသည်။
ထိုသို့ ပြည်တော်ပြန်ဝင်လိုသည့် ပြည်သူများသည် သက်ဆိုင်ရာတို့ တရက်ကြိုတင်စရင်းပေးရပြီး ၂၄ နာရီအတွင်းရှိ ကိုဗစ် -၁၉ ပိုးကို စစ်ဆေးရမည်ဖြစ်ကြောင်း၊ ပြန်သွားပါက တဖန်ပြန်ဝင်လာလို့ မရကြောင်း ရွှေလီရောက် မြန်မာအလုပ်သမားတဦးက သျှမ်းသံတော်ဆင့်ကိုပြောသည်။
“ အခုက ပြန်ချင်ရင်တော့ရတယ်။ ဒါမဲ့ တရက်တော့ သက်ဆိုင်ရာကို စာရင်းပေးပြီး ကိုဗစ် ပိုးစစ်ဆေးရတယ်။ မရှိဘူးဆိုမှ သူတို့ကပြန်လွှတ်လာပေးတာ။ ဒါမဲ့ ကျနော်တို့ ကြားသလောက်တော့ ပြန်သွားရင်တော့ ပြန်လာလို့ မရတော့ဘူးလို့ပြောတယ်” ဟု ရွှေလီရောက်မြန်မာ အလုပ်သမားတဦးက ပြောသည်။
မြန်မာ-တရုတ်နယ်စပ် နန်းတော်ဝင်ပေါက်ကို ဇူလိုင်လ ၂၆ ရက်နေ့က တရုတ်အစိုးရဖက်မှ ဖွင့်ပေးခဲ့ပြီး ယနေ့ ဩဂုတ် (၃၁) ရက်နေ့ထိ မြန်မာရွှေ့ပြောင်းအလုပ်သမား ၈၀၀၀ ကျော်က ဝင်ရောက်ခဲ့ပြီးဖြစ်ကြောင်းသိရသည်။
မြန်မာ-တရုတ်နယ်စပ် ကျယ်ဂေါင်၊ ရွှေလီ တို့တွင် တရုတ်နိုင်ငံနှင့်ထိစပ်နေသောကြောင့် တရုတ် ကျန်းမာရေးဌာနက ကိုဗစ် – ၁၉ ကူးစက်မှုအမြင့်ဆုံးဇုံဟုသတ်မှတ်ကာ လုပ်ငန်းများကိုရပ်ဆိုင်းထားသောကြောင့် မြန်မာလုပ်သားများ အလုပ်လက်မဲဖြစ်ပြီး နေရပ်ကို ပြန်လာကြရခြင်းဖြစ်ကြောင်းသိရသည်။
Leave a Comments