သျှမ်းမြောက် ကျောက်မဲမြို့နယ်တွင် (၂)လအတွင်း တိုင်းရင်းသားလက်နက်ကိုင်တိုက်ပွဲဖြစ်ပွားမှုကြောင့် စစ်ရှောင် (၂၅၀၀)ကျော်ထိ ရှိလာပြီး စားနပ်ရိက္ခာများ အရေးပေါ်လိုအပ်နေကြောင်း စုံစမ်းသိရသည်။
ကျောက်မဲမြို့နယ်တွင် တိုင်းရင်းသားလက်နက်ကိုင်များဖြစ်သည့် RCSS/SSA နှင့် SSPP/SSA ၊ TNLA တို့ သည် ပြီးခဲ့သည့် ဇူလိုင်လနှင့် ယခု သြဂုတ်လတို့တွင် တိုက်ပွဲပြန်လည်ဖြစ်ပွားမှုကြောင့် စစ်ရှောင်ထွက်ပြေးလာရသည့် ဒေသခံ (၂၅၀၀)ကျော်ထိ ရှိလာပြီး စားနပ်ရိက္ခာများ ခက်ခဲနေတာဖြစ်ကြောင်း စစ်ရှောင်ကူညီသူများထံမှ သိရသည်။
“မန်ကျောင်းရွာ ဘုန်းကြီးကျောင်းမှာ မနေ့ကလည်း စစ်ရှောင် (၂၀၀) ကျော် ထပ်ရောက်လာတယ်၊ လွယ်ကုန်ကျေးရွာဒေသခံတွေပါ၊ တိုက်ပွဲသံတွေလည်း ထပ်ကြားနေရသေးတယ်” ဟု စစ်ရှောင်များကို သွားရောက်ကူညီသူ ကျောက်မဲသျှမ်းစာပေနှင့်ယဉ်ကျေးမှုအသင်း ဥက္ကဌ လုင်းလျန်းဟန်က သျှမ်းသံတော်ဆင့်ကို ပြောသည်။
အဆိုပါ စစ်ရှောင်များသည် ယခင်ရက်က ပန်စလော့ကျေးရွာတွင် စစ်ရှောင်ခိုလှုံနေသည့် လွယ်ကုန်ကျေးရွာ ဒေသခံများဖြစ်ကြောင်း၊ ပန်စလော့ရွာသည် မြို့နှင့် ဝေးပြီး သွားလာရ ခက်ခဲသည့်နေရာဖြစ်ကြောင်း သိရသည်။
ထို့အပြင် လက်ရှိတိုက်ပွဲဖြစ်သည့်နေရာနှင့်လည်း နီးသည့်အတွက် လုံခြုံမှုရှိစေရန် မန်ခါကျေးရွာ ဘုန်းကြီးကျောင်းသို့ ထပ်မံရွှေ့ပြောင်းလာကြတာဖြစ်ကြောင်း၊ သို့သော် မြို့ပေါ်တွင် ကိုဗစ်ကူးစက်မှုရှိနေဆဲဖြစ်သည့်အတွက် စစ်ရှောင်များအတွက် စိုးရိမ်မိကြောင်း ဒေသခံများထံမှ သိရသည်။
“စစ်ရှောင်စခန်းဆိုတော့ လူအများ စုပြီး နေကြရတယ်၊ မြို့ပေါ်မှာက ကိုဗစ်ကူးစက်မှု ရှိနေသေးတယ်၊ အဲ့တော့ ကျန်းမာရေးကို အထူးသတိထားဖို့ လိုတယ်၊ ခုလို လူအများစုပြီး နေကြတဲ့နေရာတွေကို စိုးရိမ်ရတယ်” ဟု စစ်ရှောင်ကူညီနေသည့် အမျိုးသားတစ်ဦးက ပြောသည်။
ကျောက်မဲမြို့နယ်တွင် ပြီးခဲ့သည့် ဇူလိုင်လ အစောပိုင်းကတည်းက တိုင်းရင်းသား လက်နက်ကိုင်များ တိုက်ပွဲပြန်လည်ဖြစ်ပွားခဲ့သည့်အတွက် ဒေသခံများ စစ်ရှောင်ထွက်ပြေးလာရတာဖြစ်ကြောင်းသိရသည်။
ကျောက်မဲမြို့ ဟူးစွန်ကျေးရွာအုပ်စုရှိ ကျေးရွာ (၄)ရွာတွင် စစ်ရှောင် (၁၅၀၀)ကျော်ထိရှိပြီး မိုင်းငေါ့မြို့ စစ်ရှောင်စခန်းနှင့် ကျောက်မဲမြို့အနီး စစ်ရှောင်များရောက်ရှိခိုလှုံနေသည့် မိုင်းတင်း၊ နမ့်ဆော့၊ ကြူရှော(မြောက်ရွာ)၊ ပြိန်းခါး၊ မန်ခါဘုန်းကြီးကျောင်းတို့တွင်လည်း စစ်ရှောင်ရာချီ ရှိနေတာဖြစ်ကြောင်း သိရသည်။
ထိုစစ်ရှောင်များသည် လက်ရှိတွင် စားနပ်ရိက္ခာနှင့် အသုံးအဆောင်ပစ္စည်းများ၊ မိုးကာ၊ စောင်နှင့် အမျိုးသမီးသုံးပစ္စည်းများ အရေးပေါ်လိုအပ်နေကြောင်း၊ ဆက်သွယ်လှူဒါန်းလိုပါက ကျောက်မဲ သျှမ်းစာပေနှင့်ယဉ်ကျေးမှုအသင်း ဥက္ကဌ လုင်းလျန်းဟန် (၀၉ ၂၅၉၂၅၂၀၄၂) သို့ ဆက်သွယ်လှူဒါန်းနိုင်ကြောင်း သိရသည်။
