သျှမ်းပြည်မြောက်ပိုင်း မူဆယ်ခရိုင် မုံးကိုးမြို့နယ် ဟေမုံးလုံကျေးရွာအုပ်စုမှာ စစ်ကောင်စီ တပ်ဖွဲ့ နှင့် MNDAA တပ်တို့ကြား တိုက်ပွဲထပ်မံ ပြင်းထန်နေဆဲ ဟု စုံစမ်းသိရှိရသည်။
ယနေ့ သြဂုတ် (၃၁) ရက် မနက် (၈) နာရီခွဲခန့်မှာ ဟေမုံးလုံကျေးရွာအုပ်စု နော့ကိုးရွာမှာ တိုက်ပွဲ ပြင်းထန်စွာ ဖြစ်ပွားခဲ့ကြောင်း မုံးကိုးဒေသခံ တစ်ဦးကပြောသည်။
“ထိခိုက် ဒဏ်ရာ ရရှိတဲ့သူ ရှိ မရှိတော့ မသိရသေးဘူး။ အခုပဲ တိုက်ပွဲငြိမ်သွားတယ်။” ဟု မုံးကိုးဒေသခံ တစ်ဦးကပြောသည်။
စစ်ကောင်စီတပ်ဖွဲ့ နှင့် MNDAA တပ်တို့ကြား တိုက်ပွဲကြောင့် သြဂုတ် (၂၉) ရက်တွင် နမ့်ဟကျေးရွာရှိ ရွာသား (၅၀၀) ကျော် ရောက်ရှိလာပြီး သြဂုတ် (၃၀) ရက်တွင် ဒေသခံ (၁၀၀) ကျော် စစ်ရှောင်စခန်းသို့ ထပ်မံရောက် ရှိလာကြောင်း စစ်ရှောင်များကို ကူညီပေးနေသည့် အမျိုးသား တစ်ဦးကပြောသည်။
မုံးကိုးမြို့ပေါ်တွင် လက်ရှိ စစ်ရှောင်စခန်း (၃) ခုရှိထားပြီး ထို စစ်ရှောင်စခန်းများမှာ ခရစ်ယာန်ဘုရားကျောင်း (၂) ခု နှင့် ဘုန်းကြီးကျောင်း တစ်ကျောင်း တို့ဖြစ်ကြောင်း သိရသည်။
သြဂုတ် (၂၉) ရက်နေ့တွင် ၎င်းတပ် နှစ်တပ် တိုက်ပွဲကြောင့် နမ့်ဟာရွာရှိ နေအိမ်တစ်အိမ်မှာ လက်နက်ကြီးကျည်ကျရောက်ပြီး မိသားစုဝင် ၄ ဦး သေဆုံးရသည်။
ဇူလိုင်လဆန်းကတည်းက စစ်ကောင်စီ နဲ့ MNDAA တို့အကြား တိုက်ပွဲပြင်းထန်နေခဲ့ခြင်းဖြစ်ပြီး ဖောင်းဆိုင်၊ မန့်ပန်၊ ပန်မွေဘက်မှ ဒေသခံ ပြည်သူ (၂၀၀) ခန့်ကတည်း မြန်မာ – တရုတ်နယ်စပ်ဖက်သို့ တိုက်ပွဲ တိမ်းရှောင် ခိုလှုံနေရကြောင်း သိရသည်။
