သျှမ်းပြည်မြောက်ပိုင်း သီပေါမြို့နယ် ဆွန်လုံကျေးရွာအုပ်စုရှိ ကျေးရွာတစ်ချို့ စစ်ဒဏ် နှင့် လယ်ယာမလုပ်နိုင်သည့် ပြည်သူများ စားနပ်ရိက္ခာ အခက်အခဲ ကြုံတွေ့နေရကြောင်း စုံစမ်းသိရှိရသည်။
သျှမ်းတပ် (၂) တပ် တိုက်ပွဲကြောင့် ဆွန်လုံကျေးရွာအုပ်စုရှိ ချောင်ဆုံကျေးရွာ မှ (စစ်ရှောင်ပြည်သူများ) နှင့် ဟာလျံကျေးရွာ နှင့် ဆွန်လုံ ကျေးရွာ ပြည်သူတို့သည် စားသောက်မှု အတွက် အခက်ခဲဖြစ်နေကြောင်း စုံစမ်းသိရှိရသည်။
“ချောင်းဆုံရွာက ဒေသခံတွေက ဆားငံသီး ခြံပဲရှိတယ်။ ဆားငံသီး ယူမယ့်ချိန် သူတို့တွေ စစ်ဘေး တိမ်းရှောင်နေရတယ်။ တပေါင်းလဆို ဆားငံသီးတွေ အကုန်ယူရမယ်။ ဒါပေမယ့် အဲ့ချိန်တုန်းက သူတို့ စစ်ဘေးတိမ်းရှောင်နေရတယ်။ ပြီးတော့ ဈေးလဲ မရတော့ သူတို့မှာ ဝင်ငွေမရှိဘူး။ စားနပ်ရိကာတွေ အခက်ခဲဖြစ်တယ်” ဟု သီပေါမြို့မှ စားနပ်ရိကာများကို သွားရောက်ကူညီပေးသူ အမျိုးသမီး တစ်ဦး ကပြောသည်။
သြဂုတ် (၂၉) ရက်နေ့က သွားရောက်ကူညီပေးသည့် ဆွန်လုံကျေးရွာ၊ ဟ
ာလျံကျေးရွာ နှင့် ချောင်းဆုံ ကျေးရွာတို့သည် နမတူချောင်းဘေးတစ်လျှောက်မှာရှိပြီး ကားလမ်းမရှိခြင်း၊ ဆိုင်ကယ်ဖြင့်သာ သွားလာလို့ရပေမယ့် ကား၊ ဆိုင်ကယ် မရှိသဖြင့် ရေလမ်းဖြင့်သာ သွားလာရပြီး ထိုကျေးရွာများသည် ဆားငံသီးခြံ နှင့် ပြောင်းခြံသာ စိုက်ပျိုးလုပ်ကြကြောင်း စုံစမ်းသိရှိရသည်။
“နှစ်ဖက်တပ် စစ်ရေး တင်းမာတာတွေရှိသေးတယ်။ သူတို့တွေက ခုချိန်ထိ ခြံမသွားလုပ်ရဲဘူး။ သွားရင် မိုင်းတွေ နင်းမိမှာကြောက်တယ်။ သူတို့ဆီက တစ်ချို့ဆို ဆန်ပြုတ်တွေပဲစားရတယ်။ ဘာမှစားစရာ မရှိဘူး။ အရမ်းအခက်ခဲဖြစ်လို့ ကျမတို့ကို ပြောလာတယ်” ဟု သွားရောက်ကူညီပေးသူ တစ်ဦးက သျှမ်းသံတော်ဆင့် ကိုပြောသည်။
နမ့်မရေချောင်းဘေးတစ်လျှောက် တည်ရှိသည့် ဆွန်လုံကျေးရွာအုပ်စုရှိ ဖာလိုင်းကျေးရွာတွင် ကမ်း (၂) ဘက် တိုင်းရင်းသားလက်နက်ကိုင် အချင်းချင်း စစ်ရေးတင်းမာမှုရှိနေသဖြင့် ပြည်သူများ အခက်ခဲဖြစ်နေကြောင်း သိရှိရသည်။
“အလုပ်မသွားရတော့ သူတို့တွေ ဘုန်းကြီးကျောင်းမှာ သွားတောင်းစားတာတွေရှိတယ်တဲ့။ ကျောင်းမှာ အလှူတွေလုပ်ရင် သွားကူပြီး အဲ့လိုပဲ သွားစားတာတယ်ပေါ့။ ပလာစီတစ်မော့ဆေး တစ်လုံးကို (၁၅၀) ကျပ်ပေးရတယ်။ နှစ်ဖက်တပ်က စစ်ရေးတင်းမာနေတယ်။ ဟိုဘက်ကမ်း နဲ့ ဒီဘက်ကမ်းပေါ့နော်။ ပြည်သူတွေက ကြားထဲကနေ ဒုကရောက်တာပေါ့နော်” ဟု သီပေါဒေသခံ တစ်ဦးက သျှမ်းသံတော်ဆင့် ကိုပြောသည်။
ဖာလိုင်းကျေးရွာသည် အိမ်ခြေပေါင်း (၂၀၀) ခန့်ရှိပြီး လူဦးရေ (၇၀၀) နီးပါးခန့်ရှိပြီး ရေလမ်းဖြင့်သာ အဓိက သွားလာနေကြကြောင်း သိရှိရသည်။
“ရေချာင်းဘေးတစ်လျောက်က ကျေးရွာတွေလည်း စားနပ်ရိကာ အတွက် အခက်ခဲဖြစ်နေတယ်တဲ့။နိုင်ငံရေးက တည်ငြိမ်မှု မရှိဘူး။ ကိုဗစ်-၁၉ ကူးစက်မှုနှုန်းရဲ့ တားဖြစ်ချက်တွေရှိတော့ မြို့ကို လာမယ်ဆိုရင်လည်း ကျန်းမာရေးထောက်ခံစာတွေ လိုအပ်တယ်။ သူတို့အခက်ခဲတွေ ကျမတို့ဆီက အကူညီတောင်းလာတာလဲ တအားများနေပြီ” ဟု သီပေါ ပရဟိတ အမျိုးသမီး တစ်ဦးကပြောသည်။
ဖေဖော်ဝါရီ (၁) ရက်သည် စစ်တပ်မှ နိုင်ငံတော် အာဏာကို သိမ်းခြင်း၊ ကိုဗစ်-၁၉ တတိယလှိုင်း ကူးစက်မှုနှုန်းများပြားလာသည့်အတွက် မြို့အဝင်အထွက်များ အသွားအလာ တားမြစ်ခြင်း၊ထိုနည်းတူ သျှမ်းပြည်မြောက်ပိုင်း သီပေါမြို့နယ်မှာ တိုင်းရင်းသားလက်နက်ကိုင် အချင်းချင်း တိုက်ပွဲများကြောင့် ဒေသခံ ပြည်သူများ စိုက်ပျိုးရာသီမှာ မစိုက်ပျိုးရပဲ စစ်ဘေးတိမ်းရှောင်နေရသဖြင့် ပြည်သူများ အခက်ခဲများစွာ ရင်ဆိုင် ကြုံတွေ့နေရသည်။
သျှမ်းတပ် (၂)တပ်သည် ဇွန်လဆန်းပိုင်းက စတင်ကာ နယ်မြေ အငြင်းပွားမှု ပြသာနာဖြင့် အပြန်အလှန်တိုက်ခိုက်နေကြပြီး ထိုတိုက်ပွဲကြောင့် လယ်ယာလုပ်ငန်းကို စွန့်ခွာရပြီး စစ်ရှောင်နေရသည်။
လက်ရှိကာလမှာ ကိုဗစ် ကူးစက်မှုနှှုန်းမြင့်တက်လာပြီး စီးပွားရေး အခက်ခဲကြား သျှမ်းတပ် (၂) တပ် တိုက်ပွဲ ထပ်မံဖြစ်ပွားမှုကြောင့် သျှမ်းလူထုများသည် အခက်ခဲပေါင်းများစွာ ကြုံနေရသည်။
