သျှမ်းပြည်မြောက်ပိုင်း မူဆယ်ခရိုင် မုံးကိုးမြို့နယ်ခွဲအတွင်း ဖြစ်ပွားသည့် တိုက်ပွဲကြောင့် ရပ်ရွာအတွင်း စစ်ကောင်စီလက်နက်ကြီးများဖြင့် ပစ်ခတ်သောကြောင့် ဒေသခံ လူထု ၆၀၀ ကျော်နေရပ်မှ တိမ်းရှောင် ထွက်ပြေးနေရသည်ဟုသတင်းရရှိသည်။
သြဂုတ်လ ၂၉ ရက် နံနက်တွင် ထပ်မံဖြစ်ပွားခဲ့သည့် မူဆယ်ခရိုင်၊ မုံးကိုးမြို့နယ်၊ ကောင်းလုံ ကျေးရွာအုပ်စု၊ နမ့်ဟ ကျေးရွာအနီး တဝိုက်တွင် စစ်ကောင်စီ တပ်ဖွဲ့ နှင့် ကိုးကန့် MNDAA တပ်တို့ကြားက တိုက်ပွဲများ ဖြစ် ပွား ခဲ့သောကြောင့်နမ့်ဟာရွာမှ အိမ်တစ်အိမ်တွင် လက်နက် ကြီးကျည်ကျရောက်ပြီး မိသားစုဝင် ၄ ဦး သေ ဆုံးရသည့်အပြင် ဒေသခံ ၆၀၀ ကျော်လည်း နေရပ်မှ တိမ်းရှောင်နေရသည်ဟုဆိုသည်။
“မနေ့က စစ်ကောင်စီ က လက်နက်ကြီးတွေနဲ့ ရမ်းပြီး ပစ်နေတာ၊ ကိုးကန့်ဖက်ကလည်း ပစ်တယ်၊ ကိုးကန့် ကပစ်လေ စစ်ကောင်စီကလည်း ပိုရမ်းပြီး ပစ်လေပဲ၊ အဲ့ကြောင့် ရွာထဲမှာ လက်နက်ကြီးတွေကျတော့ မိသားစုဝင် ၄ ဉီးသေတယ်။ အခု တိမ်းရှောင်နေရတာ လူ ၆၀၀ ကျော်မယ် ” ဟု စစ်ဘေးရှောင်များကို ကူညီထောက်ပံ့ပေးနေသူ သျှမ်းအဖွဲ့အစည်းမှ လူငယ်တစ်ဦးက သျှမ်းသံတော်ဆင့်ကို ပြောသည်။
စစ်ကောင်စီတပ်ဖွဲ့နှင့် ကိုးကန့်တပ်ဖွဲ့တို့ တိုက်ပွဲဖြစ်ပွားခဲ့သည့် တစ်လကျော် ကာလအတွင်း သြဂုတ်လ ၂၈ ရက်နဲ့ ၂၉ ရက်နေ့တို့သည် တိုက်ပွဲ ပြင်းထန်သည့်နေ့များဟု ဆိုနိုင်ပြီး လက်ရှိအချိန်ထိ စစ်ရေးတင်းမာမှုများ ရှိနေသောကြောင့် ပျက်စီးဆုံးရှုံးမှုများကို အတည်တကျ မသိရသေးကြောင်းလည်း ၎င်းကပြောသည်။
လက်ရှိမှာတော့ နမ်ဟရွာမှ အိမ်ခြေ ၅၀ဝ ကျော်၊ ကောင်းလုံရွာမှ အိမ်ခြေ ၂၀ ကျော် နှင့် တခြား အနီးပတ်ဝန်းကျင်ရှိ ရွာများ ပြည်သူများ ၆၀၀ ကျော်တို့သည် မုံးကိုးမြို့ပေါ်ရှိ မန်ပန်ဘုန်းကြီးကျောင်း၊ ခရိယာန်ဘုရားကျောင်း၊ စျေးတန်းလျားများတွင် စစ်ဘေးခိုနေကြောင်းလည်း မုံးကိုးမြို့ခံ ဒေသတစ်ဦးက သျှမ်းသံတော်ဆင့်ကို ပြောသည်။
“နမ့်ဟ ကျေးရွာက ရွာသား ၃၀၀ ကျော်က မန်ပန်ဘုန်းကြီးကျောင်းမှာ လာရောက်တည်းခိုကြရတယ်၊ ခရိယာန်ဘုရားကျောင်းမှာလည်း ရှိနေတယ်၊ စုစုပေါင်းက ၆၀၀ လောက်ရှိမယ်၊ ဒီနေ့လည်း တိုက်ပွဲတွေ ထပ်ဖြစ်တော့ စစ်ရှောင်တွေ ထပ်တိုးလာနိုင်ပါတယ်” – ဟု မုံးကိုး ဒေသခံ တစ်ဦးက သျှမ်းသံတော်ဆင့်ကို ပြောသည်။
ဇူလိုင်လဆန်းကတည်းက စစ်ကောင်စီနဲ့ MNDAA တို့အကြား တိုက်ပွဲပြင်းထန်နေခဲ့ခြင်းဖြစ်ပြီး ဖောင်းဆိုင်၊ မန့်ပန်၊ ပန်မွေဘက်မှ ဒေသခံပြည်သူ ၂၀၀ ခန့်ကလည်း မြန်မာ – တရုတ်နယ်စပ်ဖက်သို့ တိုက်ပွဲ တိမ်းရှောင်ခိုလှုံ နေရကြောင်းသိရသည်။
