သျှမ်းပြည် မြောက်ပိုင်း မိုင်းရယ်မြို့နယ် အတွင်းရှိ နားငူးကျေးရွာမှ ရွာသားတစ်ဦး ကို SSPP/SSA မှ မှားယွင်းပစ်သတ်ခဲ့ကြောင်း စုံစမ်းသိရသည်။
ဖြစ်စဉ်မှာ သြဂုတ်လ ၂၇ ရက်နေ့ ည ၉ နာရီ ဝန်းကျင်ခန့်တွင် ကင်းစောင့်ရန်အတွက် သွားသည့် နားငူးရွာသား စိုင်းစံအွန် ဆိုသူသည် သျှမ်းပြည်တိုးတက်ရေးပါတီ (SSPP/SSA) တပ်ဖွဲ့က မှားယွင်း ပစ်ခတ် မှုကြောင့် သေဆုံးသွားရကြောင်းသိရသည်။
“ကျနော်တို့ရွာမှာက တစ်နေ့(၂၄ နာရီ)ကို ရွာသားတစ်ယောက် အလှည့်ကျ ကင်းစောင့်ရတာမျိုးရှိတယ်၊ စိုင်းစံအွန်ကလည်း အဲ့နေ့က သူ့ကင်းအလှည့်ကျလို့ပါ၊ နေ့ပိုင်းမှာ သူစောင့်ပြီးပြီ ညနေဖက်ရောက်တော့ သူ့သားသမီးတွေအတွက် ထမင်းဟင်းချက်ပြန်ပြီး ညဖက်ပြန်အလာ SSPP/SSA နဲ့ တိုးမိပြီး သေနတ်နဲ့ ပစ်ခတ်ခံရတာ” ဟု ဒေသခံရွာသားတစ်ဦးက သျှမ်းသံတော်ဆင့်ကို ပြောသည်။
စိုင်းစံအွန်ကို သေနတ်ဖြင့် ပစ်ခဲ့သည့် SSPP/SSA စစ်သားများ အဖွဲ့သည် စုစုပေါင်း ၄ ယောက်ရှိပြီး သေနတ်ဒဏ်ရာ နှစ်ချက်အပြင် ခါးနောက်ဖက်မှ ချက်အောက်ဖက် သေနတ်ကျည်ဆန်ဖောက်ဝင်သွားတဲ့ ဒဏ်ရာကြောင့် သေဆုံးသွားရကြောင်း သိရသည်။
“သူတို့က နှစ်ချက်ပစ်တာ၊ ခါးနောက်ဖက်နေ သူ့ချက်အောက် ကျည်ဖောက်ဝင်တဲ့ ဒဏ်ရာကြောင့် သေဆုံး သွားရတယ်လို့ ပြောကြတယ်၊ သူတို့ ပစ်ပြီပြီးချင်း ရွာကို ပြန်လာပြီးတော့ ရွာကဆေးမှူးကို သူတို့မှားပစ်မိလို့ သေဆုံးသွားပြီဆိုတဲ့ အကြောင်း လာဝန်ခံပြီးတော့ ညတွင်းချင်း မြေမြုပ်ပစ်လိုက်တာ “ ဟု အဆိုပါ ဖြစ်စဉ်များကို သိရှိရသူ ဦးဇင်းတစ်ပါးကလည်း သျှမ်းသံတော်ဆင့်ကို ပြောသည်။
ပစ်ခတ်ခံရပြီး သေဆုံးသွားသည့် စိုင်းစံအွန်တွင် သားသမီး ၄ ဦး၊ အမေအိုကြီးတစ်ဦးနှင့် ဇနီးတို့ ကျန်ရစ်ခဲ့ ကြောင်း နှင့် အဆိုပါ စိုင်းစံအွန်ကို မှားယွင်းပစ်ခတ်မိကြောင့် မိုင်းရယ်မြို့နယ် ကော်လျန်ကျေးရွာမှာ ရုံးစိုက် SSPP ဘက်က ငွေ (၁၀)သိန်းနဲ့ ဆန် (၁၀)တင်း လျော်ကြေးပေးခဲ့ကြောင်း သိရသည်။
အဆိုပါ ကိစ္စနဲ့ ပတ်သက်ပြီးတော့ SSPP တပ်ဖွဲ့၏ပြောရေးဆိုခွင့်ရှိသူ ဗိုလ်မှူး စိုင်းသန်းအောင်က ၎င်းတို့ တပ်ဖွဲ့ မူးယစ်ဆေးဝါး ရှာဖွေတိုက်ဖျက်ရေးအဖွဲ့၏ စစ်ဆေးမှုမေးမြန်းမှု ကို လက်မခံသည့် အပြင် ဆဲဆို ကြိမ်းမောင်းပြီး ထွက်ပြေးရန်ပါ ပြုလုပ်သည့် အတွက် ပစ်ခတ်ရခြင်းဟု ၎င်းသိရှိထားရကြောင်း သျှမ်းသံတော်ဆင့်ကို ပြောသည်။
“ဖြစ်စဉ် အသေးစိတ်ကိုတော့ ကျနော်လည်း မသိရသေးဘူး၊ ဒါမယ့် မူးယစ်ဆေးဝါး လိုက်စစ်တဲ့ အဖွဲ့နဲ့ တိုးမိပြီး မေးမြန်းမှုကိုလက်မခံဘဲ ထွက်ပြေးလို့ ပစ်လိုက်တာလို့တော့ ကြားမိပါတယ်၊ ကျနော်တို့ ပေါ်လစီ အရဆိုရင် မေးမြန်းမှု ကို အသာတကြည် ဖြေဆိုမှုပေးရင် ပစ်ခွင့်မရှိပါဘူး၊ ဒါပေမဲ့ လက်မခံဘဲ ထွက်ပြေး မှုတွေ လုပ်ရင်တော့ ပစ်မိန့်က ရှိပါတယ်” ဟု ဗိုလ်မှူးစိုင်းသန်းအောင်က သျှမ်းသံတော်ဆင့်ကို ပြောသည်။
ခိုင်လုံသည့် အကြောင်းပြချက်မရှိဘဲနှင့် ပစ်ခွင့်မရှိကြောင်း၊ လက်လွန်ခြေလွန်ပစ်ခတ်မှု ဖြစ်သွားပါက တပ်သားကိုလည်း ကြီးလေးစွာ အပစ်ပေးရန် ရှိကြောင်း နှင့် ယခုဖြစ်စဉ်ကိုလည်း သေချာစုံစမ်း စိစစ်မည့် အကြောင်းလည်း ဗိုလ်မှူး စိုင်းသန်းအောင်က ပြောပါသည်။
