သျှမ်းပြည် မြောက်ပိုင်း လားရှိုးမြို့ အမှတ် ၈ ရပ်ကွက် ဟိတကာရီ မယ်သီလရှင် စာသင်တိုက်တွင် မယ်သီလရှင်အပါး (၅၀) ပါး ကိုဗစ် – ၁၉ ပိုးတွေ့ရှိကြောင်း သတင်းရရှိသည်။
ဟိတကာရီမယ်သီလရှင် စာသင်တိုက်တွင် သီတင်းသုံးနေသည့် မယ်သီလရှင် ၂ပါး ဖျားနာနေကြောင်း ကျန်းမာရေးရေးဆိုင်ရာတာဝန်ရှိသူများကို အကြောင်းကြားပြီးနောက် ကျောင်းတိုက်ရှိ သီလရှင် (၁၁၃) ပါးကို ကိုဗစ်ရောဂါပိုးရှိ/မရှိ စစ်ဆေးခဲ့ရာ သီလရှင် (၅၀)ပါး ကိုဗစ်ရောဂါပိုး ကူးစက်ခံထားရကြောင်း သတင်းရရှိသည်။
“အစက မယ်သီလရှင် နှစ်ပါးက ဖျားကြောင်း ကျန်းမာရေး ဌာနကို ဖုန်းဆက် အကြောင်းကြားလာတယ်၊ အပြင်းအထန်ဖျားနေတယ်ပေါ့၊ ကိုဗစ် – ၁၉ ကိုလည်းကြောက်ရတာ ရှိနေတော့ သက်ဆိုင်ရာ ကျန်းမာရေး ဝန်ထမ်းတွေက ကိုဗစ် ရှိ/မရှိ RTD နဲ့စစ်ကြေည့်တာ၊ သီလရှင် အပါး (၅၀) မှာ ပိုးတွေ့ရတာပဲ” ဟု လားရှိုးမြို့မှ ကျန်းမာရေးအသိုက်အဝိုင်း တစ်ဦးက သျှမ်းသံတော်ဆင့်ကို ပြောသည်။
အဆိုပါ ဟိတကာရီမယ်သီလရှင် စာသင်တိုက်မှ ပိုးတွေ့ရှိရသည့် မယ်သီလရှင်များကို လားရှိုး လူငယ်များ လူမှုကူညီရေးအဖွဲ့မှ ကွာရန်တင်းစင်တာသို့ ကိုဗစ် – ၁၉ ကျန်းမာရေး စည်းကမ်းချက်များနှင့် အညီ သယ်ဆောင်ပေးခဲ့ကြောင်း လူမှုကူညီရေးအသင်းမှ စိုင်းဝသုန်က သျှမ်းသံတော်ဆင့်ကို ပြောသည်။
“ကျန်းမာရေးဖက်က ကျနော်တို့ကို ဖုန်းဆက် အကြောင်းကြားလာတော့ ကျနော်တို့က သွားသယ်ပေးခဲ့ပါ တယ်၊ ကား ၁၀ စီး၊ တစ်စီးကို ၅ ပါးနှုန်းနဲ့ သယ်ခဲ့တာပါ” ဟု စိုင်းဝသုန်က ပြောပါသည်။
ကိုဗစ် – ၁၉ တတိယလှိုင်းအတွင်း ပိုးတွေ့လူနာ အများဆုံး မြို့ဖြစ်သည့် လားရှိုးမြို့သည် Stay At Home ကြေညာထားသည့် မြို့ဖြစ်သည့် အပြင် လက်ရှိတွင် ကိုဗစ်-၁၉ အတည်ပြု ပိုးတွေ့လူနာ စုစုပေါင်း (၃၀၀၀) ရှိလာသည့် အပြင် ကိုဗစ် – ၁၉ ကြောင့် သေဆုံးသူများလည်း (၃၀၀) ဝန်းကျင်ရှိကြောင်းသိရသည်။
Leave a Comments