ထိုင်းနိုင်ငံ မြောက်ပိုင်း ဂူတွင်းပိတ်မိနေသည့် မူပါအကယ်ဒမီ ကျောင်းသား ဘောလုံးအသင်း နှင့် နည်းပြ စုစုပေါင်း ၁၃ ဦးအား ထိုင်းနိုင်ငံတော်၏ နရေးဆွန် တက္ကသိုလ်မှ Ph.D ဘွဲ့ရသည်အထိ အခမဲ့ပညာ သင် ခွင့်ပေးမည်ဖြစ်ကြောင်း ၊ နေစရိတ် စားစရိတ်များပါ ထောက်ပံ့မည်ဖြစ်ကြောင်းသိရသည်။

၁၅ ရက်အကြာ ချင်းရိုင်းခရိုင် မယ်ဆိုင်မြို့ရှိ ထမ့်လုံခွန်နမ့်နန်းနောန်းဂူအတွင်း ပိတ်မိနေသော ကလေးများအား ထိုင်းနိုင်ငံ နေဗီဆီးလ်တပ်ဖွဲ့နှင့် ပြည်တွင်းပြည်ပမှ ရေငုပ်ကျွမ်းကျင်ပညာရှင်များက ကြိုးစားကယ်ထုတ်ရာတွင် ဇွန်လ ၈ ရက် ၉ ရက်နှင့် ၁၀ ရက် နေ့တို့တွင် ၁၃ ယောက်လုံးအား အောင်မြင်စွာကယ်ထုတ်နိုင်ခဲ့သည်။

၄င်းကျောင်းသား ၁၂ ဦးနှင့်နည်းပြ ၁ ဦး စုစုပေါင်း ၁၃ ဦးတို့အား ထိုင်းနိုင်ငံ ဖိစနုလုတ် (ဗိသနိုး) ခရိုင်ရှိ နရေးဆွန်တက္ကသိုလ်က နွေးထွေးစွာကြိုဆိုကြောင်းနှင့် ၄င်းတို့ကြိုးစားပါက အမြင့်ဆုံး Ph.D ဘွဲ့ရသည်အထိ အခမဲ့ ပညာသင်ကြားခွင့်ပေးမည်ဖြစ်ကြောင်း တက္ကသိုလ်မှ ပါမောက္ခချုပ် ဒေါက်တာ ကန်ကျနာ ငေါ၀်းရန်းဆီ က ချင်းရိုင်းခရိုင်ဝန်ထံ စာရေးသားပေးဖို့ခဲ့ကြောင်း ထိုင်းအစိုးရပိုင်သတင်းဌာနများတွင်ဖော်ပြထားသည်။

ဘယ်သူတွေဘယ်လိုဘဲဝေဖန်ပါစေပေါ့။ ဒီကလေးတွေဟာ သီးခံမှုအပြည့်ရှိတယ်။ ဆုံးဖြတ်ချက် ခိုင်မာကြတယ်။ နည်းမှန်လမ်းမှန်ကိုကျင့်သုံးဖို့ အသိဉာဏ်ရှိတယ်။ သူတို့နည်းပြဟာ ခေါင်းဆောင် ကောင်းတယောက်ရဲ့အရည်အချင်းနဲ့ပြည့်ဝတယ်။ ကလေးတွေကလည်းလိမ်မာကြတယ်။ အနာဂတ်မှာ ထိုင်းနိုင်ငံအတွက် လူတော်လူကောင်းတွေ၊ ခေါင်းဆောင်ကောင်းတွေ ဖြစ်လာနိုင်တဲ့ လက္ခဏာတွေ တွေ့ရတယ်။ ဒါကြောင့် ကျနော်တို့တက္ကသိုလ်ကနေ သူတို့ ၁၃ ယောက်ကို ပညာသင်ခွင့်အခွင့် အလမ်း တွေပေးချင်တာကြောင့် ဒီလိုဆုံးဖြတ်လိုက်တာဖြစ်ပါတယ်။ – ဟု ထိုင်းသတင်းမီဒီယာများအားပြောဆိုသည်။

နည်းပြအပါအဝင် မူပါအကယ်ဒမီ ကျောင်းသားဘော်လုံးအသင်း ၁၃ ဦးမှာ နရေးဆွန်တက္ကသိုလ်မှ ဘွဲ့ရပြီး ပါက ဒေသအတွင်းဖွံ့ဖြိုးတိုးတက်ရေးအတွက် မိမိနေရပ်သို့ပြန်ကာ ဖွံ့ဖြိုးရေးလုပ်ငန်းများ လုပ်ဆောင်သွား ရမည်ဖြစ်ပြီး အလုပ်အကိုင်ရရှိရေးအတွက်လည်း တက္ကသိုလ်မှ စီစဉ်ဆောင်ရွက်ပေး မည်ဖြစ်ကြောင်း ရေးသားထားပါသည်။

မူပါ အကယ်ဒမီ ကျောင်းသားဘောလုံးအသင်း ၁၃ ဦးတွင် ထိုင်းနိုင်ငံသားမှတ်ပုံတင်မရသေးသည့် မယ်ဆိုင်မြို့နေ သျှမ်းပြည်သား မိဘများမှ မွေးဖွားသော ကလေး ၄ ဦးရှိကြောင်း၊ အဆိုပါ ၄ ဦအားလည်း ထိုင်းနိုင်ငံသားလက်မှတ် ထုတ်ပေးနိုင်ရေးအတွက် မွေးဖွားမှုသက်သေအထောက်အထားများ ရှာဖွေဆောင်ရွက်ပေးရန် ထိုင်းနိုင်ငံအစိုးရက ပြည်ထဲရေးဝန်ကြီးဌာနက မှာကြားထားကြောင်း ထိုင်းသတင်းမီဒီယာများတွင် ဖော်ပြထားသည်။