သျှမ်းပြည်တောင်ပိုင်း မိုင်းကိုင်မြို့နယ် တုံလောကျေးရွာအုပ်စုမှာ ရောက်ရှိနေသည့် စစ်ရှောင်များ တစ်ချို့ နေရပ်သို့ ပြန်သွားပြီဖြစ်ကြောင်း စုံစမ်းသိရှိရသည်။
ဝမ်ဖက်ဟီ့ကျေးရွာ ပန်လန့်ဘုန်းကြီးကျောင်းမှာ ရောက်ရှိနေသည့် စစ်ဘေးရှောင်များ ယနေ့ သြဂုတ် (၂၇) ရက်မှာ စစ်ရှောင် (၁၃၁) ဦး ပြန်သွားပြီး (၇၆) ဦး စာသင်ကျောင်းတွင် ကျန်ရှိနေသေးကြောင်း စုံစမ်းသိရှိရသည်။
“ကျန်နေတဲ့ (၇၆) ယောက်က မနေ့မှ ထပ်ရောက်လာကြတယ်။ သူတို့တော့ မပြန်သေးဘူး” ဟု တုံလောကျေးရွာမှ စစ်ရှောင်များကို ကူညီပေးနေသည့် သူ တစ်ဦးကပြောသည်။
ပြန်သွားသည့် (၁၃၀) ကျော်သည် သြဂုတ် (၂၃) ရက်နေ့က သီပေါမြို့နယ် နမ့်လန်ဒေသ ဝမ်စိမ်းကျေးရွာအုပ်စုထဲ သျှမ်းတပ် (၂) တပ် တိုက်ပွဲကြောင့် ထွက်ပြေးတိမ်းရှောင်လာကြသည့် သူများဖြစ်ကြသည်။
“ဘာကြောင့်ပြန်သွားလဲဆိုတာ ကျနော်တို့လည်း ကောင်းကောင်းမသိရဘူး။ မနေ့က လက်နက်သံတွေ ကြားနေရသေးတယ်တဲ့ အလုပ်လုပ်ချိန်ဆိုတော့ အလုပ်ကို ပြန်ကြည့်တာ ထင်တယ်” ဟု ဝမ်ဖက်ဟီ့ကျေးရွာမှ စစ်ရှောင်များကို ကူညီပေးနေသူ တစ်ဦးကပြောသည်။
သျှမ်းပြည်မြောက်ပိုင်း နှင့် တောင်ပိုင်းနယ်စပ်ကြား သျှမ်းတပ် (၂) တပ် ဖြစ်သည့် သျှမ်းပြည်ပြန်လည်ထူထောင်ရေးကောင်စီ (RCSS/SSA) နှင့် သျှမ်းပြည်တိုးတက်ရေးပါတီ (SSPP/SSA) တို့သည် နယ်မြေအငြင်းပွားမှုကြောင့် တိုက်ပွဲ ဖြစ်ပွားပြီး ဒေသခံ ရာချီ ထွက်ပြေးတိမ်းရှောင်နေရသည်။
သျှမ်းမြောက် ကျောက်မဲ နှင့် သီပေါမြို့နယ်တို့တွင် နယ်မြေအငြင်းပွားမှုကြောင့် တိုင်းရင်းသား လက်နက်ကိုင် အချင်းချင်းကြား တိုက်ပွဲ ဆက်လက်ပြင်းထန်လာနိုင်ကြောင်း နှစ်ဖက်တပ်က ပြောဆိုကြသည်။
သျှမ်းပြည်မြောက်ပိုင်း သီပေါမြို့နယ်အတွင်း သြဂုတ် (၂၃) ရက်တွင် သျှမ်းတပ် (၂) တပ်ဖြစ်ပွားသည့် တိုက်ပွဲကြောင့် ဒေသခံပြည်သူ အများအပြား ထွက်ပြေးတိမ်းရှောင်ခဲ့ရသည်။
သျှမ်းတပ် (၂) တပ်သည် ဇွန်လဆန်းပိုင်းက စတင်ကာ နယ်မြေ အငြင်းပွားမှု ပြဿနာဖြင့် အပြန်အလှန် တိုက်ခိုက်နေကြပြီး ထိုတိုက်ပွဲကြောင့် လယ်ယာလုပ်ငန်းကို စွန့်ခွာရပြီး စစ်ရှောင်နေရသည်။
Leave a Comments