သျှမ်းပြည် မြောက်ပိုင်း ကျောက်မဲမြို့နယ် အတွင်းဖြစ်ပွားသည့် တိုင်းရင်းသားလက်နကကိုင် တပ်ဖွဲ့တို့၏ တိုက်ပွဲဆက်လက်ဖြစ်ပွားနေကြောင်း သတင်း သိရသည်။
ကျောက်မဲမြို့နယ် အတွင်းတွင် တိုင်းရင်းသားလက်နက်ကိုင်များဖြစ်ကြသည့် သျှမ်းပြည် ပြန်လည်ထူ ထောင်ရေးကောင်စီ (RCSS/SSA)နှင့် သျှမ်းပြည်တိုးတက်ရေးပါတီ (SSPP/SSA)၊ တအာင်း(ပလောင်) အမျိုးသားလွှတ်မြောက်ရေးတပ်မတော် (TNLA)တို့၏ တိုက်ပွဲသည် ယနေ့ထိ ပြင်းထန်နေလျက်ရှိကြောင်း ပန်စလော့ကျေးရွာခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ဒီနေ့လည်း တိုက်ပွဲသံက ပြင်းထန်နေတုန်းပဲ ၊ လက်နက်ကြီးသံတွေလည်း ကြားနေရသေးတယ်” ဟု ပန်စလော့ကျေးရွာနေ ဒေသခံ အမျိုးသားတစ်ဦးက ပြောသည်။
ယနေ့ သြဂုတ်လ ၂၇ ရက်နေ့ မနက် ၁၀နာရီဝန်းကျင်မှ နှစ်ဖက်ပစ်ခတ်သံများ စတင်ကြားရတာ ဖြစ်ပြီး တိုက်ပွဲဖြစ်ပွားရွာ အနီးရှိ ဟူးကွက်ကျေးရွာ အတွင်းသို့ လက်နက်ကြီး ၂လုံးကျရောက်ကြောင်းလည်း သိရသည်။
အဆိုပါ တိုက်ပွဲဖြစ်ပွားမှုနှင့် ပက်သက်ပြီး သျှမ်းပြည် ပြန်လည်ထူထောင်ရေးကောင်စီ RCSS မှ ပြောရေးဆို ခွင့် ရှိသူ ဗိုလ်မှူးခမ်းစံကို ဆက်သွယ်မေးမြန်းရာ တိုက်ပွဲကြီးကြီးကျယ်ကျယ်ဖြစ်ပွားခြင်းမဟုတ်ကြောင်း တပ်သားများ ထိတွေ့မှုကြောင့် ပစ်ခတ်မှုဖြစ်သွားခြင်းသာ ဖြစ်ကြောင်း သျှမ်းသံတော်ဆင့်ကို ပြောသည်။
“ဒီနေ့မှာ တိုက်ပွဲကြီးကြီးကျယ်ကျယ် ဖြစ်ပွားတယ်လို့တော့မကြားရပါဘူး၊ ကျနော်တို့ မကြားမိဘူးပေါ့၊ တကယ်လို့သာ တိုက်ပွဲကြီးကြီးကျယ်ကျယ် ဖြစ်ရင်တော့ ကျနော်တို့လည်း သိရမှာပေါ့၊ ခုတော့ နှစ်ဖက် တပ်သားအချင်းချင်း ထိတွေ့မှရှိတော့ ပစ်ခတ်မှုတော့ ရှိမှာပေါ့” ဟု ဗိုလ်မှူးခမ်းစံက သျှမ်းသံတော်ဆင့်ကို ပြောသည်။
ပြီးခဲ့သည့် ဇွန်လမှစတင်ပြီး ဖြစ်ပွားခဲ့သည့် အဆိုပါ သျှမ်းပြည် မြောက်ပိုင်းဖက်မှ တိုင်းရင်းသားလက်နက် ကိုင် တပ်ဖွဲ့အချင်းချင်း တိုက်ပွဲကြောင့် ဒေသခံပြည်သူများ (၁၅၀၀) ကျော်ခန့်က စစ်ဘေးတိမ်းရှောင်နေကြ ရပြီး တိုက်ပွဲအမြန်ဆုံး အဆုံးသတ်ရန် ပြည်သူများ မျှော်လင့်နေကြောင်းလည်း သိရသည်။
Leave a Comments