သျှမ်းပြည် တောင်ပိုင်း တောင်ကြီးမြို့ရှိ ရက်ကွက်တချို့တွင် ညကြီးအချိန်မတော် အိမ်ထောင်စုစာရင်းများ လာရောက်ကောက်ယူ မေးမြန်းနေသဖြင့် ပြည်သူများက စိုးရိမ်ထိတ်လန့်နေကြောင်း သတင်းသိရသည်။

ပြီးခဲ့သည့် သြဂုတ်လ ၂၄ ရက်နှင့် ၂၅ ရက်နေ့တို့တွင် တောင်ကြီးမြို့ စိန်ပန်းရပ်ကွက်၊ ရွှေတောင်ရပ်ကွက်၊ ကျောင်းကြီးစု ရပ်ကွက်နှင့် ပြည်တော်သာ ရပ်ကွက်တို့တွင် ရပ်ကွက်အုပ်ချုပ်ရေးမှူး နှင့် နယ်မြေမှူးများ ပါဝင်သည့် စစ်ကောင်စီ တပ်သား အဖွဲ့သည် အိမ်ထောင်စုစာရင်းများကို လိုက်လံမေးမြန်းကောက်ယူမှုများ ရှိနေကြောင်း သိရသည်။

“ရဲနဲ့ စစ်သားတွေ က သေနတ်တွေ လက်ထိပ်တွေ ပါတယ်။ အုပ်ကြီးသန်းရွှေနဲ့ သူ့နယ်မြေမှူးတွေလည်းပါတယ် ။ ဧည့်စာရင်းလာစစ်တာ အိမ်ထောင်စုစာရင်း ပြပေးပါ ဆိုပြီးတော့ စောင့်တဲ့ သူကစောင့် တချို့ကလည်း အိမ်ဝိုင်းထဲ ရှာဖွေမှုတွေ ပြုလုပ်သွားတယ်” ဟု အစစ်ဆေးခံရသည့် ရွှေတောင် ရပ်ကွက်မှ အိမ်ရှင်တစ်ဦးက သျှမ်းသံတော်ဆင့်ကို ပြောသည်။

အိမ်ထောင်စုစာရင်း လာရောက်စစ်ဆေးသည့် စစ်ကောင်စီ အဖွဲ့သည် တချို့ အိမ်ထောင်စုတွင် အသက် ၁၈ နှစ်ပြည့်ပြီးသူ၊ အသက် မပြည့်သေးသူ ဦးရေ မေးမြန်းမှုများ ပြုလုပ်သည့် အပြင် ရှာဖွေမှုများလည်း ပြုလုပ်သွားကြောင်းလည်း သိရသည်။

ညကြီးအချိန်မတော် စစ်ကောင်စီမှ အိမ်ထောင်စု စာရင်းများကို လိုက်လံမေးမြန်း ကောက်ယူခြင်း များအပေါ် ရပ်ကွက်နေ ပြည်သူများက စိုးရိမ်ထိတ်လန့်နေကြပြီး တချို့သော လူငယ်များက အိမ်မှာပင် မအိပ်ရဲဘဲ ရှောင်တိမ်း နေရကြောင်းလည်း သိရသည်။

“သူတို့က လာပြီဆိုလည်း သေနတ်တွေ ဘာတွေနဲ့၊ နိုင်ငံရေးက လည်းမကောင်းဘူးဆိုတော့ ဘာဖြစ်လာနိုင် မယ်ဆိုတာ မသိနိုင်ဘူး၊ လူငယ်တွေ့တိုင်း PDF ထင်ပြီး ဖမ်းလွန်းလို့ တချို့လူငယ်တွေဆို အိမ်မှာတောင် မနေ ရဲကြတော့ဘူး၊ ပြည်သူတွေကလည်း အရမ်းလန့်နေပြီ၊ နေအိမ်တိုင်းကိုစစ်တာလည်း မဟုတ် သူတို့ ဝင်ချင် တဲ့အိမ်ဝင်တာ” ဟု စိန်ပန်းရပ်ကွက်မှ ပြည်သူတစ်ဦးကလည်း သျှမ်းသံတော်ဆင့်ကို ပြောသည်။

အိမ်ထောင်စု စာရင်းလိုက်လံမေးမြန်း ကောက်ယူနေသည့် စစ်ကောင်စီတို့သည် PDF များကို ရှာဖွေနှိမ်နင်းရန်နှင့် ပြည်သူများကို ကြောက်စိတ်သွင်းနေကြောင်း တောင်ကြီးမြို့ခံ အသက် ၆၀ အရွယ်ရှိ အဘ ဦးလှိုင် (နာမည်လွဲ) ကလည်း သျှမ်းသံတော်ဆင့်ကို ပြောသည်။

“ကြည့်တာနဲ့တင် သိနိုင်ပါတယ်၊ သူတို့က PDF တွေကိုလိုက်မွှေနေတာပေါ့၊ အရင် ဖမ်းဆီးမိတဲ့သူရဲ့ ထွက်ဆို ချက်နဲ့ လိုက်ရှာနေတာ နေမှာပေါ့၊ သူတို့ကတရားဝင် အစိုးရမှ မဟုတ်တာ၊ လူထုကိုတမင်ဒုက္ခပေးဖို့ အတွက် မွေးဖွားလာကြတာလေ၊ သူတို့ဒီလို ဝင်ချင်တဲ့အိမ်ဝင်ပြီး ဖမ်းချင်တိုင်း ဖမ်းနေကြတဲ့ ဥပဒေမဲ့လုပ် ရပ်တွေကို လုံးဝ မကျေနပ်နိုင်ဘူး” ဟု ဦးလှိုင် (နာမည်လွဲ) က သျှမ်းသံတော်ဆင့်ကို ပြောသည်။

နိုင်ငံတော်အာဏာသိမ်းယူသည့် စစ်ကောင်စီတပ်တို့သည် ညကြီးအချိန်မတော် အချိန်အခါများတွင် လက်နက်အပြည့်အစုံနှင့် ပြည်သူနေအိမ်ဝန်းများအထိ ဝင်ရောက်စီးနှင်းပြီး ပြည်သူမြောက်များစွာကို အကြမ်းဖက် ဖမ်းဆီးခေါ်ဆောင်သွားကြောင်းလည်း သိရသည်။