သျှမ်းပြည်မြောက်ပိုင်း နမ့်လန်မြို့ပြင်ဖက်တွင် လမ်းမီးမရှိသောကြောင့် ယခုနှစ် အတွင်း ယာဉ်တိုက်မှုကြောင့် သေဆုံးသူ (၄) ဦးရှိခဲ့ပြီးဖြစ်ကြောင်း စုံစမ်းသိရှိရသည်။
နမ့်လန်မြို့ပြင်တွင် ယမန့်နေ့ ဩဂုတ် (၂၅) ည ၁၀ နာရီဝန်းကျင်အချိန်က စိတ်မနှံ့သည့် အမျိုးသား တဦးကို ကားတစီးဝင်တိုက်သွားပြီး ထိုနေရာတွင် ပွဲချင်းပြီးသေဆုံးသွားခဲ့ကာ ယာဉ်တိုက်မှု ကျူးလွန်သူလည်း ထွက်ပြေးတိမ်းရှောင်နေကြောင်း သတင်းရရှိသည်။
“ သူကို ကားက ဝင်တိုက်ပြီး ချက်ချင်းသေဆုံးသွားတယ်။ ရဲတွေက ကားတိုက်တယ်လို့မှတ်ချက်ယူသွားတယ်။ သူက စိတ်မနှံ့ဘူး။ ကားသမားကတော့ ထွက်ပြေးသွားပြီးထင်တယ်။ ကျနော်တို့ ရောက်သွားတာတောင်မှ သူက သေနေပြီး။ ဘာသူမှ မရှိတော့ဘူး။” ဟု နမ့်လန်မြို့ ပရဟိတဝင် တဦးက သျှမ်းသံတော်ဆင့်ကို ပြောသည်။
ထိုနေရာတွင် လမ်းမီးမရှိသောကြောင့် မကြာခဏ ယာဉ်တိုက်မှုဖြစ်ပွားခဲ့ကြောင်း ယာဉ်တိုက်မှုကြောင့် ထိုနေရာတွင် ယခုနှစ်တွင်း သေဆုံးသူ (၄) ဦးရှိသွားပြီဖြစ်ပြီး ယာဉ်တိုက်မှု ကျူးလွန်သူကိုလည်း ဖမ်းမိခဲ့ခြင်းမရှိကြောင်းသိရသည်။
“ အဲနေရာမှာက မကြာခဏဖြစ်တယ်။ လမ်းမီးမရှိတာကြောင့်လည်းပါတာပေါ့။ မှတ်မိသလောက်တော့ (၄) လောင်းလောက်ရှိပြီးပေါ့။ ဖြစ်နိုင်ရင်တော့ အစိုးရတွေလမ်းမီးတက်ပေးရင်ကောင်းတာပေါ့။ ကားမီးလဲ အဝေးကြီးထိ မမြင်ရဘူးလေ။” ဟု အထက်ပါလူက ပြောသည်။
ယခုနှစ်ထဲ ထိုနေရာတွင် ဆိုင်ကယ်မှောက်ပြီးသေဆုံးသူ တဦး၊ ထော်လဂျီတိုက်မှုကြောင့် သေဆုံးသူတဦးနှင့် ယမန့်နေ့ညက ကားတိုက်မှုကြောင့် သေဆုံးသူ တဦးတို့ရှိကြောင်းသိရသည်။
Leave a Comments