သျှမ်းပြည်မြောက်ပိုင်း သီပေါမြို့နယ် နမ့်လန်မြို့ တပေါင်းပွဲခင်းကျင်းပမည့် နေရာတွင် ယမန်နေ့(မတ် ၂၀)ရက် ညသန်းခေါင်၌ သစ်ကိုင်းကျိုးကျပြီး ပွဲခင်းတွင်အိပ်စောင့်သည့် အမျိုးသားတစ်ဦး ကိုင်းပိသေဆုံးကာ အမျိုးသမီး ၂ဦး ဒဏ်ရာ ရရှိခဲ့ကြောင်း သတင်းသိရသည်။

ဖြစ်စဉ်မှာ ယမန်နေ့ (မတ် ၂၀)ရက် ညသန်းခေါင် ၁၂ ဝန်းကျင် နမ့်လန် တပေါင်းပွဲကျင်းပမည့် ကွင်းပြင်တွင် သစ်ကိုင်းကြီး ကျိုးကျကာ ပွဲခင်းထဲတွင် တဲလုပ်ကာ အိပ်စောင့်နေသည့် လူငယ် အမျိုးသားတစ်ဦးပေါ် ကိုင်းပိမိသဖြင့် သေဆုံးခဲ့ရပြီး၊ အမျိုးသမီး ၂ ဦး ဒဏ်ရာရရှိခဲ့ကြောင်း နမ့်လန်လူငယ်ပရဟိတအသင်းဝင်တစ်ဦး က သျှမ်းသံတော်ဆင့်ကို ပြောသည်။

“ကားပေါ်မှာ ၂ယောက်အိပ်နေတာ၊ ယောက်ျားလေးတွေပါ၊ ကားက အမိုးမပါတော့ သူတို့က ပွဲစျေးသည်ဆိုတော့ ထီးတဲကို ကားပေါ်မှာ ပြန်မိုးထားတာ၊ အဲ့မှာ ထီးတဲပေါ်ကို သစ်ကိုင်းကျိုးကျပြီး ထီးရဲ့ သံကိုင်းက ကောင်လေးတစ်ယောက်ရဲ့ ဗိုက်ကို စိုက်သွားတာ။ ဗိုက်ပွင့်ပြီး အူတွေပါ ထွက်နေပြီ၊ ကျနော်တို့ သွားကူပြီး ဆေးရုံပို့တုန်းက အသက်ရှိသေးတယ်၊ ဆေးရုံမှာပဲ ဆုံးသွားတယ်” ဟု ၎င်းက ဆိုသည်။

ထိခိုက်သေဆုံးသူ အမျိုးသားမှာ အသက် ၂၅ နှစ် ဝန်းကျင်ရှိပြီး လားရှိုးမြို့မှ နမ့်လန်မြို့သို့ လာကာ တပေါင်းပွဲစျေးဆိုင်ခန်းဖွင့်ရန် လာရောက်ကြိုတင်နေရာယူထားသူဖြစ်ကြောင်း သိရသည်။

သစ်ကိုင်းကျိုးကျသည့် ညောင်ပင်မှာ သက်တမ်းရင့်အပင်အိုဖြစ်ပြီး အကိုင်းအခတ်များလည်း ခြောက်သွေ့နေပြီ ဖြစ်ကြောင်း၊ ကျိုးကျလာသည့် သစ်ကိုင်းမှာ ရေအိုးလောက်ပင် ရှိနေပြီး စျေးဆိုင်ခန်းဖွင့်လှစ်သူ အမျိုးသမီးနှစ်ဦးလည်း ထိခိုက်ဒဏ်ရာရရှိကာ နမ့်လန်ဆေးရုံသို့ ပို့ဆောင်ထားရကြောင်း သိရသည်။

နမ့်လန် တပေါင်းပွဲ ကျင်းပသည့်နေရာတွင် ညောင်ပင်ကြီးများရှိကာ ပွဲကော်မတီ အနေဖြင့် စျေးရောင်းချမည့်သူများကို အန္တရာယ်လွတ်ကင်းသည့်နေရာသို့ ပြောင်းရွှေ့ပေးရန်လိုအပ်ကြောင်း နမ့်လန်ဒေသခံအမျိုးသားတစ်ဦးက ပြောသည်။

“ ဒီလိုက တစ်ခါမှ မကြုံဖူးဘူး၊ တာဝန်ရှိတဲ့သူ‌ ပွဲကော်မတီတွေ၊ ရပ်မိရပ်ဖတွေအနေနဲ့ အန္တရာယ်နဲ့ မလွတ်ကင်းတဲ့နေရာတွေမှာ စျေးသူစျေးသားတွေကို မရောင်းချစေသင့်ဘူး၊ ပြီးတော့ ဒီရက်ပိုင်း မုန်တိုင်းဝင်ဖို့ ရှိတယ်လို့ လည်း ကြားမိတယ်၊ ပွဲစည်နေတုန်း ဒီလိုထပ်ဖြစ်ရင် ဒုက္ခရောက်ကုန်မှာ” ဟု နမ့်လန်ဒေသခံ လူငယ်အမျိုးသားတစ်ဦးက အကြံပြုထားသည်။

နှစ်စဉ်ကျင်းပသည့် သီပေါမြို့နယ် နမ့်လန် တပေါင်းပွဲသည် လာမည့် မတ်လ ၂၄ ရက်နေ့တွင် စတင်ကျင်းပမည်ဖြစ်ပြီး ၅ ရက်သာ ကျင်းပပြုလုပ်သွားမည်ဖြစ်ကြောင်း သိရသည်။