သျှမ်းပြည်မြောက်ပိုင်း သီပေါမြို့နယ် နမ့်လန်မြို့ရှိ ပြောင်းဖူးစက်ရုံများတွင် အသုံးပြုသည့် ကျောက်မီးသွေးအနံ့ဆိုး ထွက်နေသည့်ဟု စုံစမ်းသိရှိရသည်။
နမ့်လန်မြို့ ကောင်းလန်းရပ်ကွက်ရှိ ပြောင်းဖူးလှော်စက် စက်ရုံတွင် ပြောင်းဖူးအခြောက်လှော်ရာ အသုံးပြုသည့် ကျောက်မီးသွေးများမှ အနံ့ဆိုး ထွက်ပေါ်သည့်အတွက် ဒေသခံများ အခက်ကြုံတွေ့နေရကြောင်း စုံစမ်းသိရှိရသည်။
“ကျောက်မီးသွေးတင်တဲ့ တွဲကားကြီးတွေ လာလာပို့တာတော့ တွေ့ရတယ်။ တွင်းနား ရောက်နေသလို မဆိုးပေမယ့်လို့ တော်တော်နံတယ်။ အဲ့ဒီအနံ့ရရင် အသက်ရှူလို့မကောင်းဘူး။ ရေစိုရင် အနံ့ပိုထွက်တယ်” ဟု နမ့်လန်ဒေသခံ အမျိုးသား တစ်ဦးက ပြောသည်။
လက်ရှိရာသီသည် ပြောင်းဖူး အရောင်းအဝယ် ရာသီဖြစ်ပြီး ပြောင်းဖူးပွဲရုံများတွင် ပြောင်းဖူးများကို လာရောင်းကာ ပြောင်းလှော်စက်ထဲ အခြောက်ပြန်လှော်ရကြောင်း သိရှိရသည်။
“ပြောင်းဖူးလှော်စက်မှာ သုံးတဲ့ ကျောက်မီးသွေးသုံး စက်တွေရှိလို့။ ပြောင်းဖူးအခြောက်လှော်တာ။ နေလှန်းတာမနိုင်လို့လေ။ ပြောင်းဖူးလာရောင်းတာ မခြောက်သေးလို့ အဲ့ဒီစက်ထဲကပဲ လှော်ရတာထင်တယ်။ စက်ရုံက သုံးထားတာတော့ သိတယ်။ ဘယ်လို ပုံစံလဲတော့ မပြောတတ်ဘူး” ဟု နမ့်လန်ဒေသခံ တစ်ဦးက ပြောသည်။
ကျောက်မီးသွေးအနံ့ ရှူရှိုက်မိပါက ကိုယ်ဝန်ဆောင်မိခင်များ ကိုယ်ဝန်ပျက်ကျနိုင်ခြင်း၊ အသက်ရှူလမ်းကြောင်း ကြပ်ခြင်း၊ ဦးနှောက်အကြိတ် ဖြစ်လာနိုင်ခြင်းနှင့် ကင်ဆာရောဂါဖြစ်လာနိုင်ခြင်း စတဲ့ ဆိုးကျိုးများရှိနေကြောင်း သိရှိရသည်။
Leave a Comments