စစ်ကော်မရှင်သည် သီပေါမြို့နယ်အတွင်း ယနေ့ (အောက်တိုဘာ ၁၄)ရက် ညနေ ၄နာရီခွဲတွင် လေကြောင်းဖြင့် အဆက်မပြတ်ကြဲနေကြောင်း သတင်းရရှိသည်။

ထိုစစ်ကော်မရှင်လေကြောင်းဗုံးကြဲသည့်နေရာသည် သီပေါမြို့နယ် ဘော်ကြို၊ တိုးဂိတ်ဘက်တို့ဖြစ်ကြောင်း သီပေါမြို့ ဒေသခံတစ်ဉီးပြောပြချက်အရသိရသည်။

“ မြို့ထဲတော့ မပစ်သေးဘူး။ ၁၁ လုံးလောက်ရှိနေပြီ။ ဘယ်နားပစ်ချတာလဲတော့ အတိကျမသိဘူး။ မြို့နဲ့တော့ဝေးနေသေးတယ်။ တိုးဂိတ် ၊ ဘော်ကြိုတို့ သူတို့စစ်ကောင်စီတပ် တုံစင့်ဘက်ကို ပစ်တာထင်တယ်။ လေယာဉ်သံတော့ဝဲနေသေးတယ်” ဟု ၎င်းဒေသခံကဆိုသည်။

လက်ရှိ သီပေါမြို့အတွင်း တိတ်ဆိတ်နေပြီ ပြည်သူတွေ သွားလာမှုကလည်းမရှိဘူးလို့ ဆိုပါတယ်။

“ မြို့ထဲမှာတော့ တိတ်ဆိတ်ငြိမ်သက်နေတာပဲ ။ လမ်းမှာလူသွားလူလာလည်းရှင်းနေတယ်။ ဘာမှမရှိတော့ဘူး။ မိန်းလမ်းမကြီးက အိမ်တွေအကုန်လုံးပိတ်ထားတယ်။ ဂိတ်တွေရောပိတ်ထားတယ်။ အိမ်တိုင်းအသံတိတ်ပြီး တံခါးပိတ်ပြီးနေနေကြတယ်” ဟု အထက်ပါ သီပေါမြို့ ဒေသခံတစ်ဦးက ပြောသည်။

ထိုစစ်ကော်မရှင်ဗုံးကြဲတိုက်ခိုက်မှု၏ ထိခိုက်ပျက်စီးမှုကိုတော့ အသေးစိတ်မသိရှိရသေးပေ။

လက်ရှိ စစ်ကော်မရှင်သည် သီပေါမြို့နှင့် ၃ မိုင်ခန့်သာကွာဝေးသည့် နားခဲကျေးရွာထိ ရောက်ရှိနေပြီးဖြစ်ကြောင်း သိရသည်။

ထို့ကြောင့် ပြည်ထောင်စုလမ်းမကြီးပေါ်ရှိသည့် ကျေးရွာ ဒေသခံများက ထွက်ပြေးတိမ်းရှောင်တိမ်းရှောင်နေကြကြောင်း ဒေသခံအမျိုးသားတစ်ဦးက ဆက်ပြောသည်။

“ ကျနော်မိဘတွေကတော့ ခြံထဲသွားနေကြပြီ။ အခုသတင်းကြားရသလောက်တော့ စစ်ကော်မရှင်တပ်က နားခဲရွာကိုရောက်နေပြီတဲ့။ ဘော်ကြိုမှာလည်းအများကြီးရှိနေသေးတယ်။ အခုက တွန်ခေါ့ရွာ ၊ တွန်ကာရွာ ၊ နားခဲရွာကလူတွေက ခြံထဲပြောင်းနေကြတာ။ အဲရွာတွေက တစ်ဆက်ထဲပဲ ။ ပြီးတော့ ပြည်ထောင်စုလမ်းမကြီးပေါ်ရှိတဲ့ရွာတွေပဲ”

လာမည့် ဒီဇင်ဘာလ စစ်ကော်မရှင်ပြုလုပ်မည့် ရွေးကောက်ပွဲ အပိုင်း ၁ထဲတွင် TNLA ထိန်းချုပ်ထားသည့် နောင်ချိုမြို့ပါဝင်သော်လည်း လက်ရှိ TNLA ထိန်းချုပ်ထားနိုင်ဆဲဒေသတွေမှာ စစ်ကော်မရှင်က စစ်အင်အားအလုံးရင်းနဲ့ထိုးစစ်ဆင်နေသည်။

စစ်ကော်မရှင်သည် နောင်ချိုမြို့ကို ဇူလိုင်လ ၁၅ ရက်တွင် ပထမဆုံးမြို့အနေဖြင့် ပြန်သိမ်းပိုက်နိုင်ခဲ့ပြီး စက်တင်ဘာ ၁ ရက်နေ့တွင် ကျောက်မဲမြို့ကို ဆက်သိမ်းပိုက်နိုင်ခဲ့သည်။

လက်ရှိ သီပေါမြို့ကို ဆက်လက်သိမ်းပိုက်နိုင်ရန် စစ်ကော်မရှင်က အပြင်းအထန်ပြန်ထိုးစစ်ဆင်နေကြောင်း သိရသည်။

ထိုအပြင် ပြီးခဲ့တဲ့ အောက်တိုဘာ ၉ ရက်က တိုက်ပွဲဖြစ်ပွားမှုမရှိသည့် မိုးမိတ်မြို့နယ် ဝဲပေါင်းကျေးရွာထဲကို စစ်ကော်မရှင်က ပေါင် ၂၅၀ ဗုံး ၃ လုံးကြဲချခဲ့သောကြောင့် အမျိုးသမီး ၃ ဦး နဲ့ ကလေး ၂ ဦးအပါဝင် အရပ်သား ၇ ဦးသေဆုံးသွားခဲ့သည်။

အလားတူ နမ္မတူမြို့နယ်ထဲကိုလည်း စစ်ကော်မရှင်က အောက်တိုဘာလကစ လေကြောင်း ဗုံးကြဲတိုက်ခိုက်မှု ဆက်တိုက်ပြုလုပ်ခဲ့သောကြောင့် အရပ်သား ၄ ဦးသေဆုံးပြီ ၇ ဦးဒဏ်ရာရရှိကာ ဒေသခံ ၁၀၀ ကျော်လောက်က ထွက်ပြေးတိမ်းရှောင်နေကြသည်။

ထိုအပြင် TNLA ဌာနချုပ်ရှိရာ နမ့်ဆန်မြို့နယ်အထိလည်း စစ်ကော်မရှင်က လေကြောင်းဗုံးကြဲတိုက်ခိုက်မှုတွေ ဆက်တိုက်ပြုလုပ်ကာ ယမန်နေ့ နှင့် ယနေ့ အောက်တိုဘာလ ၁၄ ရက်နေ့အထိ စစ်ကော်မရှင် လေကြောင်း နဲ့ဗုံးကြဲခဲ့တာကြောင့် အသက် ၁၇ နှစ်အရွယ်အမျိုးသမီးသေဆုံးပြီး ၁၅ နှစ်အရွယ် မိန်းကလေးတစ်ဦး ထိခိုက်ဒဏ်ရာရရှိခဲ့သည်။