သျှမ်းပြည်မြောက်ပိုင်း နမ့်လန်မြို့ တွင် ကိုဗစ်-၁၉ အတည်ပြုလူနာ အမျိုးသမီးတစ်ဦးသည် ယနေ့ (ဇွန် ၁၉ )ရက် နေ့လည် ( ၁၂) နာရီတွင် သေဆုံးသွားကြောင်း သိရသည်။
အဆိုပါ ကိုဗစ်-၁၉ ကြောင့် သေဆုံးသွားသည့် လူနာသည် သီပေါမြို့တွင် ဆေးကုသနေသည့် မအေးရွှေ (၄၁) နှစ် ဖြစ်ပြီး၊ ယနေ့ နေ့လည်ပိုင်းတွင် သေဆုံးသွားကြောင်းသိရသည်။
“ ဒီနေ့ နေ့လည်က ဆုံးသွားတယ်။ သူမှာ အဆုတ်ရောဂါအခံရှိထားတယ်။ နမ့်လန် ကနေ ကိုဗစ် ပိုးရှိလို့ဆိုပြီး သီပေါကိုပို့ထားလိုက်တာ” ဟု နမ့်လန်မြို့ ဖြူစင်နှလုံးသား လူမှုကူညီရေးအသင်း က သျှမ်းသံတော်ဆင့်ကိုပြောသည်။
အဆိုပါ သေဆုံးသွားသည့် အမျိုးသမီးကို ယနေ့ သီပေါတွင် သဂြိုလ်သွားမည်ဖြစ်ကြောင်းသိရသည်။
နမ့်လန်မြို့တွင် ကိုဗစ်-၁၉ အတည်ပြုလူနာ ၄ ဦးရှိရာ တစ်ဦးသေဆုံးသွားသောကြောင့် လက်ရှိတွင် ၃ ဦးကျန်ရှိနေသေးကြောင်းသိရသည်။
သျှမ်းပြည်မြောက်ပိုင်းတွင် ကိုဗစ် -၁၉ အတည်ပြုလူနာ (၄၅)ဦး အထက်ရှိပြီး၊ အလားတူ သျှမ်းမြောက် လာရှိုးမြို့တွင် မြို့ဝင်မြို့ထွက် ကိုဗစ် -၁၉ စစ်ဆေးရေးဂိတ်ကို ဇွန် (၁၂) ရက်က စတင်ပြန်လည်ဖွင့်လှစ် ခဲ့ကြောင်း သိရသည်။
Leave a Comments