မြန်မာ – ထိုင်း နယ်စပ်ဒေသဖြစ်သည့် တာချီလိတ်မြို့တွင် ကိုဗစ် – ၁၉ ရောဂါ ကာကွယ်ဆေး ၂ ချောင်း ထိုးထားသည့် သက်သေခံလက်မှတ် တစ်စောင်ကို ထိုင်းဘတ်ငွေ (၁,၅၀၀) ဘတ် ပေါက်နေကြောင်း သတင်းရရှိသည်။

တာချီလိတ် – မယ်ဆိုင် ချစ်ကြည်ရေးတံတား အမှတ် (၁) ကို ပြန်လည်ဖွင့်လှစ်လာပြီးနောက်ပိုင်း ထိုင်းနိုင်ငံ အတွင်းသို့ သွားရောက်လည်ပတ်ချင်သူ၊ အလုပ် လုပ်ကိုင်သူများ တစ်နေ့လျှင် ဦးရေ ထောင်နှင့်ချီ ဖြတ်သန်းသွားရန်အတွက် တံတားတွင် စောင့်ဆိုင်းနေခြင်း ဖြစ်သည်။

ထိုသို့ ဖြတ်သန်းသွားရန်အတွက် ကိုဗစ် – ၁၉ ရောဂါ ကာကွယ်ဆေးထိုးထားကြောင်း သက်သေခံ လက်မှတ် ရှိထားရမည် ဆိုသဖြင့် ပြင်ပ၌ ကာကွယ်ဆေးထိုးပြီး သက်သေခံ လက်မှတ်တစ်စောင်ကို ထိုင်းဘတ်ငွေ (၁,၅၀၀) မြန်မာကျပ်ငွေ ကာလပေါက်စျေး တသိန်းကျော် အထိ ပြုလုပ်ပေးနေကြောင်း တာချီလိတ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ ကိုဗစ် – ၁၉ ရောဂါ ကာကွယ်ဆေး မထိုးတဲ့သူတွေ အများကြီးပဲ။ တစ်ယောက်ကို ဘတ် (၁,၀၀၀) ကနေ (၁,၅၀၀) ထိ ပေးပြီး ကာကွယ်ဆေး ၂ ချောင်းထိုးပြီး သက်သေခံ လက်မှတ်လုပ်ပေးတယ်။ ဆေးဆိုင်၊ ဆေးခန်းတွေမှာ နေရာစုံသလောက် လုပ်ပေးနေတယ်။ ပိုက်ဆံရှိဖို့ တစ်ခုလိုတယ်၊ တိုကင်နံပါတ်တောင်မှ ဝယ်လို့ရသေးတယ် “ ဟု ၎င်းက ပြောသည်။

အဆိုပါ တာချီလိတ် – မယ်ဆိုင် ချစ်ကြည်ရေး အမှတ် (၁) တံတားကို နံနက်ပိုင်း ၆ နာရီမှ ည ၉ နာရီထိ ပုံမှန်အတိုင်း ပြန်လည် ဖွင့်လှစ်ထားပြီဖြစ်ကြောင်း သိရသည်။

ထို့အပြင် ဖြတ်သန်းသွားလာသူများအနေဖြင့် မှတ်ပုံတင် နှင့် ကိုဗစ် – ၁၉ ရောဂါကာကွယ်ဆေး ထိုးပြီးလက်မှတ် ယူဆောင်ပြီး နှစ်နိုင်ငံ ပြည်သူတွေ သွားလာလည်ပတ်နိုင်အောင် ၆ ညအိပ် ၇ ရက် နယ်စပ်ဖြတ်ကျော် လက်မှတ်တွေ ထုတ်ပေးကြောင်း သိရသည်။

“ သွားလည်ပတ်ချင်လည်းရတယ်၊ အလုပ်သွားလုပ်ချင်လည်း ရတယ်ဗျ။ ၇ ရက်ပြည့်ရင်တော့ ပြန်လာရမှာ မယ်ပေါ့နော်။ တကယ်လို့ သတ်မှတ်ထားတဲ့ရက် လွန်သွားရင် ပြန်ဝင်တဲ့အခါမှာ သူတို့က တစ်ရက်ကို ဘယ်လောက် ဘယ်လောက်နဲ့ ပြန်တွက်ပြီး ပိုက်ဆံတောင်းတယ် “ ဟု မယ်ဆိုင်အတွင်းသို့ သွားရောက်လည်ပတ်သူ စိုင်းဝမ်းက ပြောသည်။

ထိုင်း လူဝင်မှု ကြီးကြပ်ရေးဌာနက ထိုင်းဘက်ကို ဝင်လာသည့် မြန်မာတွေဟာ ၆ ရက်အိပ် ၇ ရက် နယ်စပ်ဖြတ် လက်မှတ်ကို ကိုင်ဆောင်ထားပြီး သတ်မှတ်သည့်ရက်မှ လွန်သွားရာ မြန်မာပြည်မပြန်တော့ဘဲ လက်မှတ်များကို ဖျောက်ဖျက်လိုက်ကာ ထိုင်းအတွင်း၌ အလုပ်လုပ်ကိုင်ကြခြင်းကို တွေ့နေရသဖြင့် ပြန်လည်ထွက်ခွာဖို့အတွက် သတိပေးနေသည်။