သျှမ်းမြောက် ကျောက်မဲမြို့နယ်ရှိ ကျေးရွာအနီးတွင် တိုင်းရင်းသားလက်နက်ကိုင် တပ်ဖွဲ့အချင်းချင်း တိုက်ပွဲဖြစ်ပွားကာ ကျယ်လောင်သည့် ပေါက်ကွဲမှုကြောင့် ရွာလုံးကျွတ် ထွက်ပြေးတိမ်းရှောင်ခဲ့ရကြောင်း စုံစမ်းသိရသည်။
သျှမ်းမြောက် ကျောက်မဲမြို့နယ်တွင် တိုင်းရင်းသားလက်နက်ကိုင်များဖြစ်သည့် သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA)နှင့် သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA)၊ တအာင်း(ပလောင်) အမျိုးသားလွှတ်မြောက်ရေးတပ်မတော် (TNLA)တို့ တိုက်ပွဲဖြစ်ပွားပြီး ရွာအနီးထိ ဗုံးကျပေါက်ကွဲမှုကြောင့် ရွာလုံးကျွတ်ထွက်ပြေးခဲ့ရတာဖြစ်ကြောင်း စစ်ရှောင်များက ပြောသည်။
“ပေါက်ကွဲသံက အကျယ်ကြီးပဲ၊ တကိုယ်လုံးကို တုန်သွားတာ၊ ရွာနဲ့လည်း အရမ်းကို နီးတယ်၊ အဲ့တော့ ချက်ချင်းကို ထွက်ပြေးကြတာပေါ့၊ တစ်ရွာလုံးနီးပါးပဲ” ဟု စစ်ရှောင် အမျိုးသမီး တစ်ဦးက သျှမ်းသံတော်ဆင့်ကို ပြောသည်။
သြဂုတ်လ (၂၄)ရက် ယမန်နေ့က တိုက်ပွဲပြင်းထန်မှုကြောင့် လွယ်ကုန်ရွာဒေသခံများသည် ပန်စလော့စစ်ရှောင်စခန်းရှိရာသို့ (၁)နာရီကျော်ကြာ လမ်းလျှောက်လာခဲ့ရကြောင်း စစ်ရှောင်များက ပြောသည်။
“ မနေ့က ပေါက်ကွဲသံက ကြောက်စရာကောင်းလွန်းလို့ မိသားစု (၅)ယောက်စလုံး ထွက်ပြေးလာရတယ်။ လမ်းကိုလည်း တနာရီနီးပါး လျှောက်ရတယ်။ ကြောက်ကြောက်နဲ့ ပြေးလာရတာ ” ဟု ပန်စလော့ စစ်ရှောင်စခန်းတွင်ရောက်လာသည့် အမျိုးသမီးတစ်ဦးက ပြောသည်။
ပြီးခဲ့သည့် သြဂုတ်လ (၁၁)ရက်နေ့နောက်ပိုင်း ကျောက်မဲမြို့နယ် ပန်ကွမ်၊ ပန်လင်၊ လွယ်ကုန်ကျေးရွာအုပ်စုတို့တွင် တိုက်ပွဲများ သဖန် ပြန်လည်ပြင်းထန်လာခဲ့တာဖြစ်ပြီး ထွက်ပြေးတိမ်းရှောင်ခဲ့ရသူ ရာချီရှိနေသဖြင့် စားဝတ်နေရေး အတွက်လည်း ခက်ခဲမှုရှိနေကြောင်း သိရသည်။
ထို့အပြင် တိုင်းရင်းသားလက်နက်ကိုင်တပ်များ တိုက်ပွဲဆက်လက်ဖြစ်နေပါက စစ်ရှောင်များအတွက် စားနပ်ရိက္ခာ ပိုမိုခက်ခဲနိုင်ကြောင်း စစ်ရှောင်ကူညီသူများက ပြောသည်။
“ဒီနေ့ မနက်ပိုင်းက စစ်ရှောင်တွေကို သွားကူတာ တိုက်ပွဲသံတွေက ကြားနေရတုန်း၊ အဲ့တော့ စစ်ရှောင်တွေ ထပ်တိုးလာနိုင်ပြီး စားနပ်ရိက္ခာအတွက် ပိုပြီးခက်ခဲမှာ စိုးရိမ်မိတယ်” ဟု စစ်ရှောင်များကို သွားရောက်ကူညီသူ ကျောက်မဲဒေသခံ အမျိုးသားတစ်ဦးက ပြောသည်။
သျှမ်းမြောက် အတွင်းဖြစ်ပွားနေသည့် တိုက်ပွဲသည် အရပ်သားများနေထိုင်သည့် ကျေးရွာ နှင့် နီးစပ်နေကြောင်း၊ ထို့သို့ နီးစပ်မှုကြောင့် ပြည်သူများသည် လယ်ယာစိုက်ပျိုးချိန်ရောက်နေသော်လည်း လယ်ယာကို ပြစ်ပြီး စစ်ရှောင်နေရကြောင်း သိရသည်။
သျှမ်းမြောက် ကျောက်မဲမြို့နယ်တွင် တိုင်းရင်းသားလက်နက်ကိုင်တပ်များ တိုက်ပွဲဖြစ်ပွားမှုကြောင့် စစ်ဘေးရှောင် (၁၅၀၀)ကျော်ထိ ရှိနေပြီး တိုက်ပွဲများအမြန်ဆုံး အဆုံးသတ်ရန် ဒေသခံများက မျှော်လင့်နေကြသည်။
သို့သော် သျှမ်းမြောက်တွင် နယ်မြေအငြင်းပွားမှုများ ဆက်ဖြစ်လာပါက တိုက်ပွဲများလည်း အဆုံးသတ်နိုင်သေးမှာမဟုတ်ကြောင်း သျှမ်းတပ် (၂)တပ်၏ ပြောရေးဆိုခွင့်ရှိသူတို့က ယမန်နေ့က သျှမ်းသံတော်ဆင့်ကို ပြောထားသည်။
Leave a Comments