သျှမ်းတောင် ညောင်ရွှေမြို့နယ် အင်းလေးဒေသတွင် ကိုဗစ်ကူးစက်ခံရသည့် လူနာ လျော့ကျခြင်းမရှိသေးဘဲ ပိုတိုးလာကြောင်း စုံစမ်းသိရသည်။
အင်းလေးဒေသတွင် ကိုဗစ်ကာကွယ်ထိန်းချုပ်ခြင်း၊ ရွာအဝင်အထွက်ကန့်သတ်ခြင်း၊ ဈေးပိတ်ခြင်းများ ဆောင်ရွက်ထားသော်လည်း ကိုဗစ် ကူးစက်ခံရသူ လျော့နည်းလာခြင်း မရှိသေးကြောင်း ဒေသခံများထံမှ သိရသည်။
“အတည်ပြုလူနာနဲ့ ထိတွေ့ဖူးတဲ့ သူတွေကို သေခြာမထိန်းချုပ်နိုင်တာ၊ နောက်ပြီး ဈေးပိတ်တာလည်း နောက်ကျတော့ ပိုးက ပျံ့သွားခဲ့ပြီ၊ အဲ့ဒါကြောင့် လူနာတွေက တိုးနေတုန်းပဲ” ဟု အင်းလေးဒေသမှ ဆရာဝန်တစ်ဦးက သျှမ်းသံတော်ဆင့်ကို ပြောသည်။
ထို့အပြင် ဆေးရုံမှ စစ်ဆေးသည့် လူနာဦးရေ အနည်းငယ် လျော့နည်းသွားသော်လည်း ကျေးရွာများထဲတွင် ကိုဗစ်ပိုး ပျံ့နှံ့နေသည့် အနေအထားဖြစ်ကြောင်း ဒေသခံများက ဆိုသည်။
“ခုက ဆေးရုံမှာစစ်ဆေးတဲ့ ဦးရေ ကျသွားလို့ ပိုးတွေ့ နည်းလာတယ် ထင်ရပေမယ့် တကယ့်အပြင်မှာက အများကြီးပါ၊ ကူးစက်မှုက မလျော့သေးဘူး” ဟု အထက်ပါ ဆရာဝန်က ပြောသည်။
အင်းလေးဒေသတွင် ကိုဗစ်ကူးစက်ပျံ့နှံ့နေခြင်းသည် ကိုဗစ်ကာကွယ်ရေးနည်းလမ်းကို ဒေသခံများ လိုက်နာမှု အားနည်းနေခြင်းကြောင့်လည်း ပါဝင်ကြောင်း၊ ထို့ကြောင့် ရောဂါကူးစက်မှု နည်းပါးစေဖို့ ပိုမို သတိထားသင့်ကြောင်း အဆိုပါ ဆရာဝန်က တိုက်တွန်းထားသည်။
Stay at home သတ်မှတ်ခံထားရသည့် ညောင်ရွှေမြို့နယ်တွင် ယနေ့တွေ့ရှိသည့် ကိုဗစ်လူနာ (၃၅)ဦး အပါအဝင် ကိုဗစ်ကူးစက်ခံရသူ (၁၆၀၀)ကျော်၊ သေဆုံးသူ (၇၀)ကျော်နှင့် ဆေးရုံဆင်းခွင့်ရသူ (၁၂၀၀)ကျော် ရှိနေကြောင်း သိရသည်။
Leave a Comments