သျှမ်းပြည် တောင်ပိုင်းနှင့်မြောက်ပိုင်း နယ်စပ်တွင် ရောက်ရှိနေသည့် စစ်ဘေးရှောင်များထဲတွင် ကျန်းမရေးမကောင်းသူများ ရှိနေသည့်အတွက် ကျန်းမာရေးစောင့်ရှောက်ပေးခြင်းနှင့် ဆေးဝါးထောက်ပံ့ပေးခြင်းများ လိုအပ်ကြောင်း သတင်းရရှိသည်။
သီပေါမြို့နယ် နမ့်လန်ဒေသ ဝမ်လီကျေးရွာတွင် ရောက်ရှိနေသည့် စစ်ဘေးရှောင်ပြည်သူ(၂၀၀)ကျော်နှင့် မိုင်းကိုင်မြို့နယ် တုံလောကျေးရွာအုပ်စု ပန်လန့်ကျေးရွာတွင် ရောက်ရှိနေသည့် စစ်ဘေးရှောင် (၁၀၀)ခန့်အား ကျန်းမာရေးစောင့်ရှောက်မှု လိုအပ်နေကြောင်း စစ်ဘေးရှောင်များကို ကူညီပေးနေသည့် အမျိုးသမီး တစ်ဦးက ပြောသည်။
“စစ်ရှောင်စခန်းတွေမှာ နေမကောင်းတဲ့သူ၊ နှာစေး၊ ချောင်းဆိုးတဲ့ သူတွေ၊ ညောင်းကိုက်နေတဲ့သူတွေ ရှိနေတယ်ကြားလို့ ကျန်းမာရေးစောင့်ရှောက်မှုသွားလုပ်ပေးတာ ” ဟု သွားရောက်ကူညီပေးသည့် အမျိုးသမီး က ဆိုသည်။
ပြီးခဲ့သည့် သြဂုတ်လ (၂၃)ရက် တွင် နမ့်လန်ဒေသ ဝမ်လီကျေးရွာရှိ စစ်ရှောင်နေရာကို သွားရောက် ထောက်ပံ့ခဲ့ဖြစ်ပြီး သြဂုတ်လ (၂၄)ရက်နေ့(ယနေ့)တွင် မိုင်းကိုင်မြို့နယ် တုံလောကျေးရွာအုပ်စု ပန်လန့်ရွာသို့ သွားရောက်ကူညီပေးခဲ့ကြောင်း သိရသည်။
အဆိုပါကျေးရွာများတွင် ဆေးဝါးများ ရရှိရန် ခက်ခဲနေကြောင်းနှင့် ကိုဗစ်ရောဂါကိုလည်း စိုးရိမ်ရကြောင်း သိရသည်။
“ရွာတွေမှာဆို ဆေးဝါးက ခက်ခဲတယ်၊ ခုက ဆေးဝါးအလှူရှင် ရှိလာတာနဲ့ လာပြီး ထောက်ပံ့ပေးတာပါ၊ နောက်ပြီး ကိုဗစ်အတည်ပြုလူနာ ရှိတဲ့ ဒေသနဲ့လည်းနီးတော့ ကိုဗစ်ကူးစက်မှာကိုလည်း စိုးရိမ်မိတယ်”ဟု အဆိုပါ ဒေသခံက ဆိုသည်။
ထိုဒေသတွင် ပြီးခဲ့သည့် သြဂုတ်လ (၁၁)ရက်နေ့က သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA)နှင့် သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA)တို့ တိုက်ပွဲဖြစ်ပွားမှုကြောင့် ထွက်ပြေးတိမ်းရှောင်နေရသူ (၅၀၀)ကျော်ရှိနေကြောင်း သိရသည်။
Leave a Comments