သျှမ်းရှေ့ ကျိုင်းတုံမြို့တွင် သြဂုတ်လ (၂၂)ရက်နေ့ ယမန်နေ့က ကိုဗစ် − ၁၉ အတည်ပြုလူနာ တစ်နေ့တည်းကို (၁၂၃)ဦးထိ စံချိန်တင် တွေ့ရှိခဲ့ကြောင်း သိရသည်။
ကျိုင်းတုံတွင် အဆိုပါနေ့က မနက်ပိုင်းတွင် (၈၂)ဦးတွေ့ရှိခဲ့ပြီးနောက် ညနေပိုင်းတွင် (၄၁)ဦး ထပ်မံတွေ့ရှိခဲ့ရတာဖြစ်ကြောင်း စုံစမ်းသိရသည်။
“ကိုဗစ်လူနာတွေ့တာက အရမ်းကို တက်လာတယ်၊ မနေ့ကတော့ (၁၂၃)ယောက်နဲ့ စံချိန်တင်တွေ့ခဲ့တာပေါ့၊ သံဃာတော်တွေလည်းပါတယ်၊ ကျေးရွာမှာနေတဲ့သူတွေလည်း ပါတယ်” ဟု ကျိုင်းတုံမှ ပရဟိတအသင်းဝင် အမျိုးသား တစ်ဦးက သျှမ်းသံတော်ဆင့်ကို ပြောသည်။
ထိုနေ့တွင် မြို့ပေါ်ဒေသခံများအပြင် သံဃာတော်(၂၅)ပါးနှင့် မိုင်းလန်း၊ မိုင်းခွန်၊ မိုင်းဇင်း၊ နောင်ကုန်နှင့် မိုင်းလပ်ကျေးရွာအုပ်စုများတွင်လည်း ကိုဗစ်ပိုး တွေ့ရှိခဲ့တာဖြစ်ကြောင်း သိရသည်။
ထို့အပြင် ပရဟိတအသင်းမှ အသင်းဝင်များလည်း ကိုဗစ်ပိုး ကူးစက်ခံနေရသည့်အတွက် လုပ်ငန်းဆောင်ရွက်မှုများအား ယာယီရပ်နားထားရကြောင်း သိရသည်။
“မနေ့က ကိုဗစ်စစ်တဲ့ထဲမှာ အသင်းဝင် (၇)ယောက်လည်း ကိုဗစ်ပိုးတွေ့ခဲ့တယ်၊ PPE ဝတ်စုံတွေနဲ့ အရမ်းကို သတိထားပြီး ဆောင်ရွက်နေတဲ့ကြားက ကိုဗစ်ကူးစက်ခံရတာပါ၊ ခုတော့ လူအင်အားမရှိတော့လို့ ယာယီရပ်နားထားပါတယ်”ဟု အဆိုပါ ပရဟိတအသင်းမှ အသင်းဝင် အမျိုးသားတစ်ဦးက ပြောသည်။
ကျိုင်းတုံမြို့ကို ပြီးခဲ့သည့် သြဂုတ်လ (၁၉)ရက်နေ့က Stay at home အဖြစ် စစ်ကောင်စစ်လက်အောက်ခံ ကျန်းမာရေးဝန်ကြီးဌာနက ထုတ်ပြန်ကြေညာထားကြောင်း သိရသည်။
သျှမ်းရှေ့ ကျိုင်းတုံမြို့တွင် ယမန်နေ့အထိ ကိုဗစ်အတည်ပြုလူနာ (၁၀၈၀)ဦးရှိပြီး ဆေးရုံဆင်းခွင့်ရသူ (၅၃၉)ဦးနှင့် ယမန်နေ့ည သေဆုံးသူအပါအတွင် သေဆုံးသူစုစုပေါင်း (၁၅)ဦးထိ ရှိနေကြောင်း သိရသည်။
Leave a Comments