သျှမ်းပြည် မြောက်ပိုင်း ကျောက်မဲမြို့နယ် စစ်ဘေးရှောင် (၅၀၀)ကျော် ရောက်ရှိခိုလှုံနေသည့် မိုင်းငေါ့မြို့တွင် ကိုဗစ် ကူးစက်ခံရမည်ကို စိုးရိမ်နေရကြောင်း စုံစမ်းသိရသည်။

ကျောက်မဲမြို့နယ်တွင် တိုင်းရင်းသားလက်နက်ကိုင်များဖြစ်သည့် RCSS/SSA နှင့် SSPP/SSA ၊ TNLA တို့ တိုက်ပွဲဖြစ်ပွားမှုကြောင့် ဒေသခံ ရာချီ ထွက်ပြေးတိမ်းရှောင်နေရတာဖြစ်ကြောင်း၊ မိုင်းငေါ့မြို့တွင် ကိုဗစ် − ၁၉ ကူးစက်ခံရသူ မြင့်တက်နေပြီး ထိုစစ်ရှောင်များအတွက် စိုးရိမ်ရကြောင်း ဒေသခံများထံမှ သိရသည်။

“မိုင်းငေါ့က ကိုဗစ်လူနာတွေ များပြားလာနေပြီ၊ ပြီးခဲ့တဲ့ ရက်ပိုင်းက တစ်ရက်ထဲကို (၅)ယောက်ထိတွေ့ခဲ့တယ်၊ အဲ့တော့ စစ်ရှောင်စခန်းမှာ ရောက်နေတဲ့သူတွေအတွက်က စိုးရိမ်ရတယ်” ဟု မိုင်းငေါ့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

မိုင်းငေါ့တွင် စစ်ရှောင်စခန်း (၇)ခုခန့်ရှိနေပြီး သြဂုတ်လ (၂၂)ရက် ယမန်နေ့ညက ထပ်မံရောက်ရှိလာသူ (၄၀)ကျော်ရှိကာ အကူအညီ လိုအပ်နေကြောင်း၊ ထို့အပြင် ကျန်းမာရေးမကောင်းသူများလည်း ရှိနေကြောင်း စစ်ရှောင်ကူညီသူများထံမှ သိရသည်။

“မနေ့က စစ်ရှောင် (၄၆)ဦး ထပ်ရောက်လာတယ်၊ စစ်ရှောင်စခန်းမှာလည်း နေမကောင်းတဲ့သူတွေ ရှိနေတယ်၊ နောက်ပြီး အစားအသောက်နဲ့ဆေးဝါးတွေကလည်း လိုနေတယ်” ဟု မိုင်းငေါ့စစ်ရှောင်များကို ကူညီနေသူ အမျိုးသားတစ်ဦးက သျှမ်းသံတော်ဆင့်ကို ပြောသည်။

ထပ်မံရောက်ရှိလာသည့် စစ်ရှောင်များမှာ ပန်လင်ကျေးရွာအုပ်စု နားလင့်ရွာဒေသခံများဖြစ်ပြီး ထိုစစ်ရှောင်များအပါအဝင် မိုင်းငေါ့တွင် စစ်ရှောင်သူ (၅၀၀)ကျော်ရှိနေပြီဖြစ်ကြောင်း သိရသည်။

မိုင်းငေါ့မြို့တွင် ပြီးခဲ့သည့် သြဂုတ်လ (၂၁)ရက်နေ့အထိ ကိုဗစ်အတည်ပြုလူနာ (၂၁)ဦး ရှိပြီး ၎င်းနှင့် အနီးဆုံးမြို့ဖြစ်သည့် ကျောက်မဲမြို့တွင် ကိုဗစ်အတည်ပြုလူနာ (၇၀၀)ကျော် ရှိနေကြောင်း သိရသည်။