သျှမ်းပြည်မြောက်ပိုင်း နမ္မတူမြို့နယ် ပန်လုံကျေးရွာအုပ်စု ထဲတွင် တအောင်းအမျိုးသားလွတ်မြောက်ရေးတပ်မတော် (TNLA) တို့က ပြည်သူနေအိမ်တွင် ဝင်ရောက်နေထိုင်နေကြကြောင်း စုံစမ်းသိရသည်။
TNLA တပ်သားများသည် နမ္မတူမြို့နယ် ပန်လုံကျေးရွာအုပ်စုထဲတွင် (၂) လကျော် နေထိုင်သဖြင့် ပြည်သူများစိတ်လုံခြုံမှုမရှိကြောင်း၊ ထို့ပြင် အိမ်တွင်းရှိ မီးဖိုချောင်ပစ္စည်းများကိုလည်း စည်းကမ်းမဲ့ယူသုံးစွဲနေကြောင်း ပန်လုံ ဒေသခံ အမျိုးသား တစ်ဦး က သျှမ်းသံတော်ဆင့် ကို ပြောသည်။
“ သူတို့နေလာတာကြာပြီး။ အရင်က နမ္မတူတိုက်ပွဲပြီးကတည်းက သူတို့ဒီနေရာမှာလာနေတာ။ စခန်းလာချတာ။ ကျနော်တို့အိမ်မှာဆို ၇ ယောက်လောက်ရှိတယ်။ သူတို့ဆန်၊ဆီ၊ဆားတွေ အကုန်ယူသုံးတယ်။ ပြီးတော့ အိပ်ယာဆိုလဲ ကျနော်အိပ်ယာမှာလာအိပ်တာ။ သူတို့က အိမ်ရှင်လာလုပ်နေတာ” ဟု ပန်လုံးကျေးရွာဒေသခံ တဦးက သျှမ်းသံတော်ဆင့်ကို ပြောသည်။
ထိုအပြင်လွန်ခဲ့သည် ဩဂုတ် ၇ ရက်နေ့တွင်လည်း တအောင်း (TNLA) တပ်သားများက ဒေသခံ တစ်ဦး ၏ ကားကိုငှားရာတွင် ဒေသခံ က မပေးသဖြင့် နေအိမ်တံခါးကို ဖျတ်ဆီးခဲ့သေးကြောင်း သိရသည်။
“ သူတို့က ဒီရွာကဦးလေးတယောက်ရဲ့ ကားကိုငှားတာ။ ဦးလေးက သွားပို့ပေးမယ်ပြောတာကိုသူတို့က မကြိုက်လို့ထင်တယ်။ အဲဦးလေးအိမ်တံခါးကို သွားဖြတ်လိုက်တာ” ဟု ဒေသခံတဦးက ပြောသည်။
တအောင်း (TNLA) တပ်သားတို့သည် ကျေးရွာတွင် လာရောက်နေထိုင်ရခြင်းသည် ပန်လုံကျေးရွာဒေသခံများ က သျှမ်းပြည်ပြန်လည် ထူထောင်ရေး ကောင်စီ RCSS/SSA ကို သတင်းပေးမည် ကို စိုးရိမ်ကျေးရွာတွင် လာရောက်နေထိုင်နေလျက်ရှိကြောင်း သိရသည်။
“ သူတို့က သျှမ်းအိမ်တွေမှာပဲလိုက်နေတာ။ တရုတ်အိမ်တွေ။ ပလောင်း(တအောင်း) အိမ်တွေတော့ မနေကြဘူး။ ကျနော်တို့ ဒီဖက်က RCSS ကို သတင်းပေးမှာကြောက်လို့ လာနေထားကြတာ” ဟု နေရာနှင့် အမည်မဖော်လိုသည့် ဒေသခံတဦးက ဆိုသည်။
ထိုကိစ္စနှင့်ပတ်သတ်ပြီး တအောင်းအမျိုးသားလွတ်မြောက်ရေးတပ်မတော် (TNLA) ပြောခွင့်ရင် ဗိုလ်မှူး မိုင်းအိုက်ကျော်ကို သျှမ်းသံတော်ဆင့်မှ ကြိုးစားဆက်သွယ်ခဲ့သော်လည်း ဆက်သွယ်၍ မရခဲ့ပေ။
TNLA တပ်သားများ ပန်လုံကျေးရွာတွင်းထဲ လာရောက်နေထိုင်မှုကို အမြန်ဆုံးထွက်ခွာသွားပေးရန်အတွက် ဒေသခံများက တောင်းဆိုလိုက်သည်။
နမ္မတူမြို့နယ် ပန်လုံကျေးရွာအနီးတဝှိက် RCSS/SSA နှင့် မြောက်ပိုင်းမဟာမိတ် တပ်ဖွဲ့ မကြာခဏ တိုက်ပွဲဖြစ်ပွားသည့် နေရာဖြစ်ကြောင်းသိရသည်။
Leave a Comments