သျှမ်းမြောက် ကျောက်မဲမြို့နယ်တွင် တိုင်းရင်းသားလက်နက်ကိုင်များ တိုက်ပွဲဖြစ်ပွားမှုကြောင့် သြဂုတ်လ (၁၇)ရက် ယမန်နေ့အထိ စစ်ဘေးရှောင်နေရသူ (၁၅၀၀)ကျော်ထိ ရှိလာကြောင်း စုံစမ်းသိရသည်။
ကျောက်မဲမြို့နယ်တွင် တိုင်းရင်းသားလက်နက်ကိုင်များဖြစ်သည့် RCSS/SSA နှင့် SSPP/SSA ၊ TNLA တို့ နယ်မြေထိန်းချုပ်ရေးကြောင့် တိုက်ပွဲများ ဆက်လက်ဖြစ်ပွားနေပြီး ထွက်ပြေးတိမ်းရှောင်နေရသည့် ဒေသခံများလည်း ပိုမိုများပြားလာကြောင်း ဒေသခံများထံမှ သိရသည်။
“ပြီးခဲ့တဲ့ ဖေဖော်ဝါရီလကတည်းက စစ်ရှောင်ထွက်ပြေးလာတဲ့သူတွေ ခုထိ နေရပ်မပြန်နိုင်သေးဘူး၊ ခုရက်ပိုင်း တိုက်ပွဲက ပြင်းထန်လာတော့ တစ်ရွာလုံးနီးပါးကို ထွက်ပြေးလာရတာတွေ ရှိနေတယ်”ဟု စစ်ရှောင်များကို ကူညီနေသည့် ကျောက်မဲဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
မိုင်းငေါ့ရှိ စစ်ရှောင်စခန်းတချို့နှင့် ကျောက်မဲမြို့ပေါ်တို့တွင် (၅)လကျော်ကြာပြီဖြစ်သည့် တော့ဆန်ကျေးရွာအုပ်စုမှ စစ်ဘေးရှောင်များလည်း ကျန်ရှိနေသေးပြီး တိုက်ပွဲများ ပြင်းထန်နေသည့်အတွက် နေရပ်သို့ မပြန်နိုင်သေးတာဖြစ်ကြောင်း အဆိုပါ စစ်ရှောင်များက ပြောသည်။
“တိုက်ပွဲကြောင့် ထွက်ပြေးလာရတာ (၅)လကျော် ရှိနေပြီ၊ နေရပ်ပြန်ချင်ပေမယ့် မပြန်ရဲသေးဘူး၊ လက်နက်ကိုင်တပ်တွေက စစ်ရေးတင်းမာနေဆဲဖြစ်လို့ မပြန်နိုင်သေးတာ” ဟု မိုင်းငေါ့ စစ်ရှောင်စခန်းမှ စစ်ရှောင် အမျိုးသားတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် ဖေဖော်ဝါရီလမှ ယမန်နေ့အထိ တိုင်းရင်းသားလက်နက်ကိုင်တိုက်ပွဲများကြောင့် ကျောက်မဲမြို့ပေါ်တွင် စစ်ရှောင်ရောက်ရှိလာသူ (၆၀၀)ကျော်ရှိပြီး၊ ကျောက်မဲမြို့အနီး မိုင်းတင်းကျေးရွာအုပ်စု မိုင်းတင်းနှင့် နမ့်ဆော့ စာသင်ကျောင်းတို့တွင် (၂၀၀)ခန့်၊ ကြူရှော(မြောက်ရွာ)ရွာဦးကျောင်းတွင် (၁၀၂)ဦး၊ ဟူးဆွန်ရွာဘုန်းကြီးကျောင်းတွင် (၁၈၀)ကျော်၊ မိုင်းငေါ့မြို့နယ်ခွဲရှိ စစ်ရှောင်စခန်းများတွင် (၄၇၀)ဦး ရှိနေသေးကြောင်း စစ်ဘေးရှောင်ကူညီသူများထံမှ သိရသည်။
တိုင်းရင်းသားလက်နက်ကိုင်များ တိုက်ပွဲဖြစ်ပွားမှု အမြန်ဆုံး အဆုံးသတ်ရန် ဒေသခံများမှ တောင်းဆိုမှုများ ပြုလုပ်ခဲ့သော်လည်း ယနေ့အချိန်ထိ တိုက်ပွဲဆက်လက်ပြင်းထန်နေဆဲဖြစ်သည့်အတွက် တိုက်ပွဲရှောင်များ ထပ်တိုးလာနိုင်ကြောင်း ဒေသခံများထံမှ သိရသည်။
ထို့အပြင် သျှမ်းမြောက် သီပေါမြို့နယ် နမ့်လန်ဒေသတွင်လည်း သျှမ်းတပ် (၂)တပ် တိုက်ပွဲကြောင့် စစ်ဘေးရှောင် (၅၀၀)ကျော် ရှိနေသေးပြီး သောက်သုံးရေနှင့် စားနပ်ရိက္ခာများ ခက်ခဲနေဆဲဖြစ်ကြောင်း သိရသည်။
Leave a Comments