သျှမ်းပြည်အတွင်း လှုပ်ရှားနေကြသည့် ပြည်သူ့ကာကွယ်ရေးတပ်ဖွဲ့  PDF  များကို နှိမ်နင်းရန်အတွက် အာဏာသိမ်း စစ်ကောင်စီက ဌာနေပြည်သူ့စစ်များကို အင်အားဖြည့်တင်းစေပြီး စစ်ကူတောင်းလာကြောင်း သတင်းသိရသည်။

သျှမ်းပြည်တောင်ပိုင်း အတွင်း လှုပ်ရှားနေသည့် လူထုကာကွယ်ရေးတပ်အား နှိမ်နင်းရန်အတွက် ပြည်သူ့စစ် တပ်ဖွဲ့တိုင်းအင်အားဖြည့်တင်းရန်၊ ကိုင်ဆောင်ထားသည့် သေနတ်များ၊ လူစာရင်းများ စစ်တိုင်းရုံးထံ စာရင်းပေးပို့ရန်၊ လူထုကာကွယ်ရေးတပ်ထံ သေနတ်များ လှုပ်ရှားမှုဆိုင်ရာများ ကူညီ ပံ့ပိုးခြင်းလုံးဝ မပြု လုပ်ရန်  စသဖြင့် ခိုလမ်အခြေစိုက် အရှေ့အလယ်ပိုင်းတိုင်း စစ်ဌာနချုပ် စစ်တိုင်းရုံးက သြဂုတ်လ ၇ ရက်နေ့က ဆင့်ခေါ်ပြောကြားကြောင်း ကြားသိရသည်။

“အဓိက ကတော့ ကိုင်ဆောင်ထားတဲ့ သေနတ်တွေ ပြည်သူ့စစ်နဲ့ မသက်ဆိုင်တဲ့သူဆိုပေးမကိုင်ဖို့၊  တရုတ်တို့ စီးပွားရေးသမားတို့ပါ ပေးမကိုင်ဖို့ ၊ နောက်ပြီး ဒီသျှမ်းပြည်ထဲက လှုပ်ရှားတဲ့ PDF တွေကို ကူညီ နှိမ်နင်းဖို့  စစ်ကူတောင်းတဲ့ တွေ့ဆုံမှုကြီးပါ၊ အဲဒါ ပြောတဲ့သူက ဒုတိုင်းမှူးပါ” – ဟု အမည်မဖေါ်လိုသည့် ပြည်သူ့စစ်အ ရာ ရှိတဉီးကပြောသည်။

အပြင် ပြည်သူ့စစ်တပ်ဖွဲ့များ မောင်းနှင်နေသည့် လိုင်စင်မဲ့ကားများလည်း သျှမ်းပြည်နယ်အတွင်းမှ ကျော်လွန်ပြီး မောင်းနှင်ခြင်းမပြုဖို့လဲ တားမြစ်ကြောင်းကြားသိရသည်။

“ဆန္ဒပြတာတွေကတော့ သျှမ်းပြည်ထဲမှာ မရှိတော့ဘူးလေ၊ ဒါပေမဲ့ သျှမ်းပြည်ထဲမှာက တိုင်းရင်းသားလက် နက်ကိုင်တွေများတယ်၊ နမ့်စန်ထဲမှာ သျှမ်းတပ်လဲရှိတယ်၊ တခြား PDF တွေကလည်း ရှိလာနိုင်တော့ တစ်ခုခုတိုက်ခိုက်မှု ရှိလာရင် စစ်သားတွေအစား ပြည်သူ့စစ်တွေကို အရင်ဆုံးထိုးကြွေးလိုက် တာလို့ပဲမြင်တယ်” ဟု နမ့်စန်ဒေသခံ စိုင်းခမ်း (နာမည်လွဲ) က သျှမ်းသံတော်ဆင့်ကို ပြောသည်။

အာဏာသိမ်း စစ်ကောင်စီ တပ်မှ PDF များကို နှိမ်နင်းရန်အတွက် ဌာနေပြည်သူ့စစ်များထံ စစ်ကူတောင်း ခံခြင်းနှင့် ပက်သက်ပြီး တော်လှန်ရေးလှုပ်ရှားမှုများကို တွန့်ဆုတ်စေနိုင်မည် မဟုတ်ကြောင်း သျှမ်းပြည် အခြေစိုက် PDF တစ်ဖွဲ့မှ တပ်ဖွဲ့ခေါင်းဆောင်တစ်ဦးဖြစ်သူက သျှမ်းသံတော်ဆင့်ကို ပြောသည်။  

“စစ်ကောင်စီကနေ ပြည်သူ့စစ်စီကနေ စစ်ကူတောင်းတဲ့ကိစ္စနဲ့ပတ်သက်ပြီး သူတို့က PDF တွေကို နှိမ်နှင်း တာ မနှိမ်နင်းတာက သူတို့ အပိုင်းပေါ့နော်၊ ပြည်သူ့စစ်တွေပါလာလို့ ဆိုပြီးတော့ ကျနော်တို့က ထိတ်လန့် စိုးရွံ့တာမျိုးရှိမှာ မဟုတ်ဘူး၊ ကျနော်တို့ လုပ်ဆောင်ချက်ရဲ့ နဂို ရည်မှန်းချက်တွေကိုက စစ်ကောင်စီတွေကို ချေမှုန်းပစ်မယ်၊ သူတို့မဟာမိတ်တွေကိုပါ ရှင်းထုတ်ဖို့လည်း ဝန်မလေးပါဘူး၊ အာဏာရှင် စနစ်ပျက် သွား အောင် ကျနော်တို့ အောင်ပွဲစီကိုပဲ ချီတက်သွားမှာပါ” – ဟု ၎င်းက ပြောသည်။

PDF များကို တောနင်းရှာရန်နှင့် နယ်မြေရှင်းလင်းရေးလုပ်ရန် စစ်ကောင်စီက ဌာနေပြည်သူ့စစ်များကို ဖိအား ပေးထားကြောင်း၊ PDF များကို နှိမ်နင်းရန်အတွက် စစ်ကောင်စီမှ ဌာနေပြည်သူ့စစ်များထံသို့ တစ်ဖွဲ့လျှင် အင်အား ၁၀၀ တောင်းခံထားကြောင်းလည်း သျှမ်းတောင်အခြေစိုက် ပြည်သူ့ကာကွယ်ရေးတပ်ဖွဲ့ တစ်ခု SSSG – PDF  ထံမှလည်း သိရသည်။

လွိုင်လင်ခရိုင်အတွင်း ပြည်သူ့စစ်တပ်ဖွဲ့ဝင် ၇ ဖွဲ့ ခန့်ရှိကြောင်း၊ ပင်လုံ – လွယ်ခြယ်အခြေစိုက် အထူးဒေသ ၆ ပအိုဝ်းအဖွဲ့၊ လဲချား – နမ့်စန် နမ့်ဟူးဖရားထမ့်အဖွဲ့၊ ၀န်ပန်အဖွဲ့၊  ကွန်ဟိန်း – ကာလိအဖွဲ့၊ နမ့်စန် – မတ်ကျိုင်း အဖွဲ့၊ နားရိုင်းအဖွဲ့ နှင့် မဟာကြာ ဉီးဆောင်သည့် ဟိုမိန်းပြည်သူ့စစ်အဖွဲ့တို့ ရှိသည်။