သျှမ်းမြောက် ကျောက်မဲမြို့နယ် နောင်ဆင်ကျေးရွာတွင် ယမန်နေ့ ( သြဂုတ် ၁၃)ရက် မွန်းလွဲ (၂)နာရီခန့် ၌ စစ်ရှောင်(၂)ဦး မိုင်းနင်းမိပြီး (၁)ဦး ပြင်းထန်ဒဏ်ရာ ရရှိခဲ့ကြောင်း သိရသည်။

ထိုမိုင်းနင်းမိသူများသည် ကျောက်မဲမြို့နယ် ပန်လင်ကျေးရွာအုပ်စု နောင်ဆင်ကျေးရွာတွင် ရောက်ရှိနေသည့် စစ်ရှောင်များဖြစ်ပြီး လက်ဖက်ခြံအနီး မှိုသွားရှာချိန်တွင် ကြိုးမိုင်းထိမိကာ ပြင်းထန်ဒဏ်ရာရရှိခဲ့ကြောင်း ဒေသခံများထံမှ သိရသည်။

“သူတို့ လက်ဖက်ခူးတဲ့ ခြံနားမှာပဲ မှိုသွားရှာရင်း ကြိုးမိုင်းကို သွားထိမိတာ၊ ကလေး (၄)ယောက်လည်းပါတယ်၊ ကလေးတွေကတော့ ဒဏ်ရာမရဘူး၊ လူကြီး (၂)ယောက် မိုင်းစ ထိပြီး ဒဏ်ရာရခဲ့တယ်” ဟု ပန်လင်ကျေးရွာမှ ဒေသခံတစ်ဦးက သျှမ်းသံတော်ဆင့်ကို ပြောသည်။

ဒဏ်ရာရသူမှာ ယာအေးစိန် (၄၀)နှစ်၊ မိုင်းအိုက်ညီ (၃၁)နှစ်တို့ဖြစ်ပြီး မိုင်းအိုက်ညီတွင် မျက်လုံးနှင့် ဗိုက်(ချက်အောက်)တွင် မိုင်းစနစ်ဝင်ကာ ပြင်းထန်ဒဏ်ရာရရှိထားကြောင်း၊ ယာအေးစိန်တွင် ခြေသလုံးနှင့် ခါးတို့တွင် ဒဏ်ရာရရှိထားတာဖြစ်ကြောင်း အဆိုပါ ဒေသခံထံမှ သိရသည်။

ထိုဒေသတွင် တိုင်းရင်းသားလက်နက်ကိုင်များဖြစ်သည့် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA)နှင့် တအာင်း(ပလောင်)အမျိုးသားလွှတ်မြောက်ရေးတပ်မတော် (TNLA)တို့သည့် ယနေ့ (သြဂုတ် ၁၄)ရက်နေ့တွင်လည်း တိုက်ပွဲ ဆက်လက်ဖြစ်ပွားနေကြောင်း သိရသည်။

ထိုတိုက်ပွဲကြောင့် ကျေးရွာအဝင်အထွက်လမ်းများလည်း ပိတ်ထားရပြီး ကျောက်မဲမြို့ပေါ်တွင်လည်း ကိုဗစ်ကူးစက်မှု မြင့်တက်နေသည့်အတွက် လူနာများ ဆေးကုသရန် ခက်ခဲနေကြောင်း ဒေသခံက ပြောသည်။

“တိုက်ပွဲသံတွေက ဒီနေ့လည်း ကြားနေရသေးတယ်၊ ရွာအဝင်လမ်းတွေလည်းပိတ်ထားတယ်၊ နောက်ပြီး မြို့ပေါ်မှာလည်း ကိုဗစ်က အရမ်းပျံ့နေတော့ သူတို့နှစ်ယောက်ကို ဆေးကုသပေးဖို့ အရမ်းခက်ခဲနေတယ်”ဟု ထိုလူနာကို ကူညီပေးနေသည့် ဒေသခံ အမျိုးသားတစ်ဦးက ပြောသည်။

အဆိုပါ လူနာနှစ်ဦးသည် ယခင်က ပန်မ ရွာသစ်တွင် နေထိုင်သူများဖြစ်ကြောင်း၊ ပြီးခဲ့သည့် (၅)လခန့်ကတည်းက တိုင်းရင်းသားလက်နက်ကိုင်များ တိုက်ပွဲဖြစ်ပွားမှုကြောင့် ပန်လင်ကျေးရွာအုပ်စု နောင်ဆင်ကျေးရွာသို့ စစ်ရှောင်ရောက်ရှိလာပြီး လက်ဖက်ခူးအငှားလိုက်ကာ စားဝတ်နေရေးအတွက် လုပ်ကိုင်နေရတာဖြစ်ကြောင်း ဒေသခံများထံမှ စုံစမ်းသိရသည်။
ဒေသခံများ စားဝတ်နေရေးအတွက် သွားလာလှုပ်ရှားနေရသည့် နေရာအနီးတွင် လက်နက်ကိုင်တပ်ဖွဲ့များ မိုင်းထောင်ခြင်း မပြုလုပ်ကြရန် အနူးအညွှတ်တောင်းပန်ကြောင်း ဒေသခံ တစ်ဦးက ပြောသည်။

“ဘယ်လက်နက်ကိုင်တပ်ဖွဲ့မဆို ဒေသခံတွေ နေ့တိုင်း သွားလာလှုပ်ရှားနေရတဲ့ နေရာအနီးမှာ မိုင်းထောင်တာတွေ မပြုလုပ်ကြဖို့ အနူးအညွှတ်ကို တောင်းပန်ပါတယ်၊ အဲ့လို မိုင်းထောင်ထားလို့ ဒေသခံတွေ ဒဏ်ရာရပြီး အခက်ခဲတွေ ကြုံနေကြရတယ်” ဟု ပန်လင်းကျေးရွာဒေသခံ အမျိုးသားတစ်ဦးက ဆိုသည်။

ပြီးခဲ့သည့် ဇူလိုင်လအတွင်းမှာလည်း ပန်လင်ကျေးရွာမှ အသက် (၂၅)နှစ်အရွယ်ရှိ ဒေသခံ အမျိုးသားတစ်ဦး လက်ဖက်ခြံသို့သွားစဉ် ကြိုးမိုင်းထိမိကာ ခြေထောက်နှစ်ဖက်နှင့် ရင်ဘက်တို့တွင် ဒဏ်ရာရရှိခဲ့ကြောင်း၊ အဆိုပါအမျိုးသားသည် ယနေ့အချိန်ထိ လမ်းလျှောက်နိုင်ခြင်းမရှိသေးကြောင်း ဒေသခံများထံမှ စုံစမ်းသိရသည်။

သျှမ်းမြောက် ကျောက်မဲမြို့နယ်တွင် ယခုရက်ပိုင်းအတွင်း တိုင်းရင်းသားလက်နက်ကိုင်များဖြစ်သည့် RCSS/SSA နှင့် SSPP/SSA ၊ TNLA တို့ ထိတွေ့တိုက်ပွဲဖြစ်ပွားနေမှုကြောင့် ဒေသခံ (၂၀၀)ကျော် ထပ်မံထွက်ပြေးတိမ်းရှောင်ခဲ့ရကာ စားနပ်ရိက္ခာများလည်း အရေးပေါ်လိုအပ်နေဆဲဖြစ်ကြောင်း စုံစမ်းသိရသည်။