သျှမ်းမြောက် ကျောက်မဲမြို့နယ် အတွင်း တိုင်းရင်းသားလက်နက်ကိုင်ကြား တိုက်ပွဲဖြစ်ပွားမှုကြောင့် ဒေသခံ (၁၀၀)ခန့် ထွက်ပြေးတိမ်းရှောင်ခဲ့ရပြီး အရေးပေါ် စားနပ်ရိက္ခာလိုအပ်နေကြောင်း စုံစမ်းသိရသည်။

ကျောက်မဲမြို့နယ် ပန်ကွမ်ကျေးရွာအုပ်စု ပန်ကွမ်နှင့် ပန်ဖြတ်ကျေးရွာတွင် သြဂုတ် ၁၀ ရက် တွင် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) နှင့် တအာင်း(ပလောင်) အမျိုးသားလွှတ်မြောက်ရေးတပ်မတော် (TNLA) တို့ တိုက်ပွဲဖြစ်ပွားခဲ့ခြင်းကြောင့် ဒေသခံ(၁၀၀)ခန့် ထွက်ပြေးခဲ့ရပြီး လက်ရှိမှာ စားနပ်ရိက္ခာ အရေးပေါ်လိုနေကြောင်း ကျောက်မဲမြို့ မှ ပရဟိတ အဖွဲ့များက ပြောသည်။

“လွယ်ကုန်ရွာ ဘုန်းကြီးကျောင်းမှာ စစ်ရှောင် (၁၀၀)လောက် ရှိနေတယ်၊ စားနပ်ရိက္ခာတွေ အရေးပေါ်လိုအပ်နေတယ်” ဟု ကျောက်မဲမြို့မှ ပရဟိတဆောင်ရွက်နေသည့် အမျိုးသားတစ်ဦး က သျှမ်းသံတော်ဆင့်ကို ပြောသည်။

ထိုစစ်ရှောင်များမှာ ပန်ကွမ်ကျေးရွာဒေသခံများဖြစ်ပြီး လွယ်ကုန်ကျေးရွာဘုန်းကြီးကျောင်းတွင် လာရောက်ခိုလှုံနေတာဖြစ်ပြီး၊ ၎င်းတို့သည်စားနပ်ရိက္ခာများ အရေးပေါ်လိုအပ်နေကြောင်း ဒေသခံများထံမှ သိရသည်။

အဆိုပါတိုက်ပွဲကြောင့် ပန်ကွမ်ဘုန်းကြီးကျောင်းနှင့် နေအိမ်တချို့ထိခိုက်ပျက်စီးမှုများရှိခဲ့သည့်အပြင် ကျောက်မဲမြို့ပေါ်ထိ ထွက်ပြေးတိမ်းရှောင်ခဲ့ရသူများလည်း ရှိကြောင်း စုံစမ်းသိရသည်။

လက်ရှိ အခြေအနေမှာ နယ်မြေ အခြေအနေ တည်ငြိမ်မှု မရှိသဖြင့် စစ်ဘေးရှောင်များကို သွားရောက်ကူညီရန် အခက်ခဲရှိနေကြောင်း ပရဟိတအသင်းဝင်တစ်ဦးက သျှမ်းသံတော်ဆင့်ကို ပြောသည်။

“ခုချိန် နယ်မြေအခြေနေမတည်ငြိမ်သေးတော့ ပန်ကွမ်စစ်ရှောင်တွေကို သွားကူဖို့ခက်ခဲနေတယ်၊ နောက်ပြီး ကိုဗစ်ရောဂါကလည်း မြို့ပေါ်မှာ စိုးရိမ်ရတဲ့ အနေအထားဖြစ်နေတယ်”ဟု ၎င်း က ပြောသည်။

သျှမ်းမြောက် သီပေါမြို့နယ် နမ့်လန်ဒေသအနီးရှိ ဝမ်ကောင်းနှင့်လွယ်လုံရွာကြားတွင်လည်း ယမန်နေ့ မနက်ပိုင်းတွင် RCSS/SSA နှင့် SSPP/SSA တို့ တိုက်ပွဲဖြစ်ပွားမှုကြောင့် ဒေသခံ (၃၀၀)ကျော် ထွက်ပြေးတိမ်းရှောင်ခဲ့ပြီး၊ ယနေ့မှ တိုက်ပွဲ ပြန်ငြိမ်သက်သွားသဖြင့် နေရပ်သို့ ပြန်သွားကြောင်း သိရသည်။

သျှမ်းမြောက် ကျောက်မဲနှင့် သီပေါမြို့နယ်တို့တွင် တိုင်းရင်းသားလက်နက်ကိုင်များဖြစ်သည့် RCSS/SSA နှင့် SSPP/SSA ၊ TNLA တို့ မကြာခဏ ထိတွေ့တိုက်ပွဲဖြစ်ပွားမှုများကြောင့် ဒေသခံများ ထွက်ပြေးတိမ်းရှောင်နေရပြီး ယနေ့အထိ ဒေသခံ (၁၀၀၀)ကျော် ထွက်ပြေးတိမ်းရှောင်နေရဆဲဖြစ်ကြောင်း သိရသည်။