မိုးကုတ်မြိုတွင် ယနေ့( သြဂုတ် ၁၂)ရက် မနက်ပိုင်းတွင် ရေကြီး မြေပြိုမှုကြောင့် လူ(၃)ဦး မြေပိသေဆုံးခဲ့ကြောင်း သိရသည်။
“ဒီမနက် အစောပိုင်းမှာပဲ ကျောက်ဖြူရပ်ကွက်ထဲက မြေပြိုပြီး လူ(၃)ဦး မြေပိ သေဆုံးသွားတယ်” ဟု ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
(ယနေ့) နံနက် (၆)နာရီဝန်းကျင်က မိုးကုတ်မြို့ အနောက်ပိုင်း ကျောက်ဖြူရပ်ကွက် ဓါတ်ဆီဆိုင်အနီးတွင် မိုးရွာသွန်းမှုကြောင့် မြေပြိုကာ (၅)နှစ်ကလေး တစ်ဦးအပါအဝင် မိသားစု (၃)ဦး မြေပိသေဆုံးခဲ့တာဖြစ်ကြောင်း သိရသည်။
အဆိုပါမိသားစုတွင် နေအိမ်တွင် မရှိဘဲ တောင်ယာသို့သွားသည့် အမျိုးသားတစ်ဦးသာ အသက်ဘေးမှ လွတ်မြောက်ခဲ့ကြောင်း သတင်းရရှိသည်။
အဆိုပါရေကြီးမှုကြောင့် မိုးကုတ် အရှေ့ပိုင်း၊ မင်းတံတားရပ်ကွက်တွင် နေအိမ်အတွင်းသို့ ရေဝင်ရောက်မှုများ ဖြစ်ပေါ်ခဲ့ကြောင်း၊ ထို့အပြင် ရေပူနှင့် ညောင်သုံးပင်ကြား အဆင်းလမ်းတွင်လည်း မြေပြိုမှုကြောင့် လမ်းပိတ်ဆို့ထားကြောင်း သိရသည်။
မိုးကုတ်မြို့တွင် နှစ်စဉ် မိုးရာသီရောက်တိုင်း ရေကြီးရေလျှံမှုနှင့်အတူ မြေပြိုကျမှုများကြောင့် လူသေဆုံးမှုများ ဖြစ်ပေါ်တတ်ကြောင်း ဒေသခံများထံမှ သိရသည်
Leave a Comments