သျှမ်းပြည်မြောက်ပိုင်း မူဆယ်မြို့ရှိ ပြည်သူ့စစ်အဖွဲ့ တစ်ဖွဲ့သည် ကိုဗစ်-၁၉ ကာလ ပြည်သူများကို စားနပ်ရိက္ခာ ထောက်ပံ့ပေးရာ ကိုဗစ်-၁၉ စည်းမျဉ်း၊စည်းကမ်း နှင့် ကိုက်ညီမှှု မရှိသဖြင့် ပြည်သူများ ကိုဗစ် ထပ်မံပြန့်ပွားလာမည်ကို စိုးရိမ်နေကြောင်း စုံစမ်းသိရှိရသည်။

ထို ထောက်ပံ့ပေးသည့် ပြည်သူ့စစ်အဖွဲ့သည် လုံထန်ပြည်သူ့စစ်ပိုင် မူဆယ်စီးပွားရေး လုပ်ငန်းရှင်များအသင်း (MCA Co,Ltd) ကုမဏီ ဖြစ်ပြီး စားနပ်ရိက္ခာများကို ထောက်ပံ့ပေးမှုသည် ကောင်းမွန်ကြောင်း၊ သို့သော် ကိုဗစ်စည်းမျဉ်းဖြင့် ဝေငှပေးရန် မူဆယ်ဒေသခံများက ပြောဆိုကြသည်။

“ကူးစက်ပြန့်ပွားမှု မဖြစ်အောင် အိမ်တိုင်ရာရောက်တဲ့အထိ လုပ်ပေးလို့ရတယ်။ ခုက လူစုလူဝေးတွေ ဖြစ်တယ်။သူတို့ ထောက်ပံ့ပေးတာ မကောင်းတာမဟုတ်ဘူး။ လုပ်ပုံလုပ်နည်းက နည်းစနစ် မကျသေးတာ။ ရောဂါကို ထိန်းချုပ်နေတဲ့ကြားက သူတို့ ဒီလိုလာလုပ်တော့ မဖြစ်သင့်ဘူး၊ ကိုက်ညီမှု ဖြစ်မနေဘူး” ဟု ပရဟိတ အမျိုးသား မူဆယ်ဒေသခံ တစ်ဦး က သျှမ်းသံတော်ဆင့် ကိုပြောသည်။

မူဆယ်မြို့သည် ကိုဗစ်-၁၉ ကူးစက်မြန် ရောဂါပြန့်ပွားမှုနှုန်း များပြားလာသဖြင့် စစ်ကောင်စီက မူဆယ်မြို့ကို Stay at home သတ်မှတ်ထားပြီး မူဆယ်မြို့ရှိ ပရဟိတသမားများ က စားနပ်ရိက္ခာများကို ရပ်ကွက်တွင်း ဒေသခံ နေအိမ်များထံ အိမ်တိုင်ရာရောက် ထောက်ပံ့ပို့ဆောင်ပေးနေကြောင်း မူဆယ်ဒေသခံ တစ်ဦး ကပြောသည်။

“ပရဟိတ သမားတွေ လူစုလူဝေး မဖြစ်စေချင်လို့ အိမ်တိုင်ရာရောက် စားနပ်ရိကာတွေ ထောက်ပံ့နေတဲ့ချိန်မှာ သူတို့က လူစုလူဝေး နဲ့ ရိကာတွေ ပေးနေတယ်ဆိုတော့ ရပ်ကွက်တွင်းထဲ ရောဂါ ပြန်လည် ပြန့်ပွားမှာကို စိုးရိမ်တာပေါေ့နာ်။ အဲ့ကြောင့် ကိုက်ညီမှု မရှိဘူးလို့ ထင်တယ်” ဟု မူဆယ်ဒေသခံ အသက် (၄၀) ဝန်းကျင် အမျိုးသား တစ်ဦး က သျှမ်းသံတော်ဆင့် ကိုပြောသည်။

လုံထန်ပြည်သူ့စစ်ပိုင် မူဆယ်စီးပွားရေး လုပ်ငန်းရှင်များအသင်း (MCA Co,Ltd) ကုမဏီများသည် ဇူလိုင် (၃၀) ရက်မှ စတင်ပြီး သြဂုတ် (၂၈) ရက်နေ့ထိ စားနပ်ရိက္ခာများကို ထောက်ပံ့ပေးသွားမည်ဖြစ်ကြောင်း စုံစမ်းသိရှိရသည်။