သျှမ်းမြောက် ကျောက်မဲမြို့ပေါ် တလနီးပါး ရောက်ရှိနေသည့် စစ်ဘေးရှောင် (၂၆၀)ကျော်အတွက် စားနပ်ရိက္ခာ ခက်ခဲနေကြောင်း စုံစမ်းသိရသည်။
ထို စစ်ဘေးရှောင် (၂၆၀)ကျော်သည် ပြီးခဲ့သည့် ဇူလိုင်လ တွင် ကျောက်မဲမြိုု့နယ် အတွင်း တိုင်းရင်းသားလက်နက်ကိုင် အချင်းချင်းဖြစ်ပွားသည့် တိုက်ပွဲကြောင့် ထွက်ပြေးတိမ်းရှောင်လာကြပြီး၊ လက်ရှိမှာ ဆွေမျိုးအိမ်တွင် နေထိုင်ကြကြောင်း သတင်းရရှိသည်။
“ စစ်ရှောင်တွေ က တစုတစည်းတည်းမရှိဘူး။ သူတို့တွေက ဆွေမျိုးအိမ်မှာနေတယ်။ ကျနော်စာရင်းကောက်ရသလောက် ကတော့ (၂၆၀) ကျော်ရှိတယ်။ သူတို့ တွေက အလုပ်မလုပ်ရတော့ စားဝတ်နေရေးခက်ခဲတယ်။ စားနပ်ရိက္ခာ အကူအညီလိုတယ်” ကျောက်မဲ သျှမ်းစာပေနှင့်ယဉ်ကျေးမှုအသင်း ဥက္ကဌ လုံးလျန်းဟန်က သျှမ်းသံတော်ဆင့်ကို ပြောသည်။
လက်ရှိကာလသည် ကိုဗစ်-၁၉ ကူးစက်မြင့်တက်နေသည့်အချိန်ကာလဖြစ်သည့်အတွက် ဆွေမျိုးများထံသွားရောက် ခိုလှုံသည့် စစ်ဘေးရှောင်များသည် အလုပ်လုပ်ရန် အဆင်မပြေသဖြင့် စားဝတ်နေရေးခက်ခဲနေကြောင်း လုံးလျန်းဟန် က ပြောသည်။
“ရောဂါကိုလည်း ကြောက်ရ၊ အလုပ်အကိုင်လည်းမရှိတော့ စားဝတ်နေရေး ခက်ခဲနေကြတာ”ဟု ၎င်း ကဆိုပြန်သည်။
ထိုစစ်ရှောင်များသည် တော့ဆန်ကျေးရွာအုပ်စု၊ ချုံးကျေးရွာအုပ်စုနှင့် အခြားကျေးရွာတချို့မှ ထွက်ပြေးလာသည့်သူများ ဖြစ်သည်။
ပြီးခဲ့သည့် မတ်လတွင် ကျောက်မဲမြို့ နှင့် မိုင်းငေါ့မြို့ ကြား နမ့်မန်းကျေးရွာရှိ အိမ်ခြေ (၃)အိမ်မီးရှုခဲ့ရပြီး၊ ထိုကျေးရွာပြည်သူများသည်လည်း ထွက်ပြေးတိမ်းရှောင်နေရသဖြင့် အခက်အခဲကြုံတွေ့နေရကြောင်း သတင်းရရှိသည်။
ကျောက်မဲမြို့နယ် တွင် စစ်ကောင်စီ တပ်ဖွဲ့၊ သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA)၊ သျှမ်းပြည်တိုးတက်ရေးပါတီ၊ သျှမ်းပြည်တပ်မတော်(SSPP/SSA)နှင့် တအာင်း(ပလောင်) အမျိုးသား လွတ်မြောက်ရေးတပ်မတော်(TNLA)တို့လှုပ်ရှားရာဒေသဖြစ်ပြီး၊ မကြာခဏ တိုက်ပွဲဖြစ်ပွားသည့်နေရာဖြစ်သည်။
