သျှမ်းပြည် မြောက်ပိုင်း ကျောက်မဲမြို့ပေါ် နေအိမ်တလုံးအား အာဏာသိမ်းတပ်ဖွဲ့ မှ အင်အား အလုံးအရင်းဖြင့် ဝန်းရံပိတ်ဆို့ပြီး အိမ်အတွင်းရှိလူငယ်တဉီးအား ဖမ်းဆီးခေါ်ဆောင်ကာ ရိုက်နှက်စစ်ဆေးရာ ခြေထောက်နှစ်ချောင်းလုံးကျိုးသွားကြောင်းသတင်းရရှိသည်။
အိမ်စောင့်တပ်ဖမ်းသွားသည့် အသက် ၂၂ အရွယ် ကျောက်မဲ ရပ်ကွက် ၇ သားတဉီး တပ်အချုပ်ခန်း မှ ထွက်ပြေးရန် ကြိုးစားစဉ် ခြေထောက် ကျိုးသွားသည်ဟု လူငယ်၏မိသားစုထံသို့ ၂၀၂၁ ခု သြဂုတ်လ ၈ ရက်နေ့က စစ်တပ်က ဖုန်းဆက်အကြောင်းကြားလာကြောင်း လူငယ်နှင့်နီးစပ်သည့် အသိုင်းအဝိုင်းပြောပြ ချက်အရ သိရသည်။
“အခုထက်ထိ မိဘ နဲ့ တွေ့ခွင့်မပေးသေးဘူး။ ဆေးကုသခွင့်လည်းမရဘူး၊ ဆေးဝါးဆိုင်ရာ ထောက်ပံ့ မှု အတွက် ပြောတဲ့သူတွေကိုလဲ တပ်ကခြိမ်းခြောက်ထားတယ်။ ဆေးဝါးကုသ ခွင့်မရတဲ့အတွက် မိဘက အရမ်းစိတ်ပူနေတယ်” – ဟု လုံခြုံရေးအရ အမည်မဖော်လိုသည့် ဒေသခံ တစ်ဉီးက သျှမ်းသံ တော် ဆင့်ကို ပြောသည်။
သြဂုတ်လ ၆ ရက်နေ့ညပိုင်းက ကျောက်မဲမြို့ အမှတ် ၇ ရပ်ကွက်ရှိ နေအိမ်တလုံးအား အင်အား ၂၀ ခန့်ရှိ အရပ်ဝတ် စစ်ကောင်စီတပ်များ ဝန်းရံပိတ်ဆို့ပြီး ဝင်ရောက်ရှာဖွေကြောင်း၊ ပုဒ်မ ၅၀၅ ထိထားသူ အစ်ကိုဖြစ်သူအား ဖမ်းဆီးရန်မေးမြန်းရာ အစ်ကိုဖြစ်သူနေအိမ်တွင်မရှိသဖြင့် နေအိမ်ရှိ ညီဖြစ်သူအား ဖမ်းဆီးခေါ်ဆောင်သွားရာ ရိုက်နှက် စစ်ဆေးရာ မှ ညီဖြစ်သူ ခြေနှစ်ချောင်းလုံး ကျိုးသွားကြောင်း ရပ်ကွက်သူ၊ ရပ်ကွက်သားများ ပြောပြချက် အရသိရသည်။
“ ကျနော်တို့ မြို့မှာက စစ်ကောင်စီတပ်တွေက အရပ်ဝတ်နဲ့ဘဲ လှုပ်ရှားတာ များတယ်၊ အရင်ကလည်း လူငယ် တွေကို အဲလိုဘဲ လိုက်ဖမ်း တာရှိတယ်၊ ဘယ်ကို ဖမ်းခေါ်သွားမှန်းမသိဘူး၊ တချို့ က စရဖ ရုံး၊ တချို့ ရဲစခန်းတဲ့။ တွေ့ဖို့ သွားမေးတော့ မရှိဘူးတဲ့ ” ဟု ကျောက်မဲမြို့နေ အသက် ၄၅ နှစ်အရွယ် အာဏာရှင် ဆန့်ကျင်ရေး လှုပ်ရှားသူတဉီးက သျှမ်းသံတော်ဆင့်ကို ပြောသည်။
ဇူလိုင်လ နှင့် ဩဂုတ်လအတွင်း ကျောက်မဲမြို့ပေါ်ရှိ ရပ်ကွက်များတွင် ညအချိန် အရပ်ဝတ် နှင့် ယူနီဖောင်းဝတ် အဖွဲ့တို့ ညစဉ် ပူးတွဲ ကင်းလှည့် ကြောင်း၊ ဖမ်းသွားသည့် အဆိုပါလူငယ်အားလည်း ရဲစခန်းသို့ အပ်နှံခြင်းမရှိသေးသည့်အပြင် မိသားစုဝင်များနှင့်လည်းတွေ့ဆုံခွင့်မပေးသည့်အတွက် မိသားစုဝင်များစိုးရိမ်နေကြောင်း သိရှိရသည်။
ဗိုလ်ချုပ်မှူးကြီးမင်းအောင်လှိုင်ဉီးဆောင်သည့် မြန်မာ့တပ်မတော် မှ တိုင်းပြည်အာဏာအား ၂၀၂၁ ခု ဖေဖေါ်ဝါရီလ ၁ ရက် သိမ်းယူလိုက်သည့်နောက်ပိုင်း ဆန္ဒပြသည့်ကျောက်မဲဒေသခံ လူငယ် ၂၀ ကျော် အားဖမ်းဆီးသည်ဟုသိရသည်။ အဖမ်းခံရလူငယ်များတွင်မိသားစု နှင့် တွေ့ခွင့်မရသေးသည့်အပြင် ချုပ်နှောင်ထားသည့်နေရာလည်း မသိရှိရသေးသည့်အတွက် မိဘများ အထူးစိုးရိမ်နေကြသည်။
Leave a Comments