သျှမ်းပြည်မြောက်ပိုင်း မူဆယ်ခရိုင် ပန်ဆိုင်းမြိုန့ယ်ခွဲ အတွင်းရှိ ဖောင်ဆိုင်းကျေးရွာအုပ်စု ဖိုကောင်ကျေးရွာ အတွင်းသို့ စစ်ကောင်စီတပ်မှ ကျေးရွာထဲ လက်နက်ကြီး ပစ်ခတ်မှုကြောင့် တောထဲ ထွက်ပြေးတိမ်းရှောင်ရသည့် စစ်ရှောင်ပြည်သူများသည် အခက်အခဲများစွာ ကြုံတွေ့နေရကြောင်း သိရသည်။
ပြီးခဲ့သည့် သြဂုတ်လ ၂ ရက်နေ့မှ စတင်ကာ ကိုးကန့်လက်နက်ကိုင်တပ်ဖွဲ့ (MNDAA) တပ်ဖွဲ့နှင့် စစ်ကောင်စီ တပ်တို့သည် တိုက်ပွဲများဖြစ်ပွားခဲ့ကြပြီး စစ်ကောင်စီ တပ်ဖွဲ့က ပြည်သူများနေထိုင်သည့် ကျေးရွာတွေဖက် လက်နက်ကြီး ပစ်ခတ်မှုကြောင့် တစ်ရွာလုံးနီးပါး စစ်ဘေးတိမ်းရှောင်ခဲ့ရကြောင်း သိရသည်။
“ဖောင်ဆိုင်းရွာကတချို့က ၂ ရက်နေ့ကတည်းက တောထဲကို ထွက်ပြေးလာတာရှိတယ်၊ ဒါပေမဲ့ အများစုက ၃ ရက်နေ့ကမှ ထွက်ပြေးလာတဲ့သူတွေပေါ့၊ ၄ ရက်နေ့မှာလည်း တောထဲစစ်ဘေးရှောင်တွေ ထပ်ရောက်လာ တယ်၊ မိုးရာသီ ခြင်ထောင်၊ မိုးကာတွေ ရော အစားအသောက် တွေရာ လိုအပ်ပါတယ်” ဟု စစ်ရှောင်များကို ကူညီချိတ်ဆက်ပေးနသူ တစ်ဦးက သျှမ်းသံတော်ဆင့်ကို ပြောသည်။
ဖောင်းဆိုင်ကျေးရွာအုပ်စုက ပြည်သူများသည် သြဂုတ်လ ၃ ရက်နေ့ မှစတင်ပြီး တရုတ်နယ်စပ်လောက်တိန့် ၁၀၂ ဖက် တောထဲသို့ ထွက်ပြေးတိမ်းရှောင်နေရသောကြောင့် အစားအသောက်၊ ခြင်ထောင်များနှင့် မိုးကာ များ အရေးတစ်ကြီး လိုအပ်နေကြောင်း ၎င်းကပြောသည်။
အဆိုပါ တောထဲတွင် စစ်ဘေးတိမ်းရှောင်လာသည့် ပြည်သူ ၁၀၀ ကျော်ခန့်နေပြီးတိုက်ပွဲပိုမိုဆိုးရွားလာပါက အခြားရွာများမှ စစ်ဘေးတိမ်းရှောင် ပြည်သူများနှင့် ပိုများလာနိုင်ကြောင်းလည်း အထက်ပါ ပုဂ္ဂိုလ်က ပြောသည်။
“မနေ့က ကျနော်တို့ ကြားသိရသလောက်တော့ ဒီတရုတ်နယ်စပ်ဖက်က စစ်ဘေးရှောင်တွေကို တရုတ်ဖက် မိုးကာလာပေးတယ်လို့ကြားပါတယ်၊ ဒါမယ့်လုံလောက်မှုတော့ မရှိသေးဘူး၊ စစ်ရှောင်တွေ တိုးလာရင် ပိုပြီး ခက်ခဲဦးမယ်၊ ဒီ့ပြင် တခြားတောထဲ ထွက်ပြေးနေရတဲ့ စစ်ဘေးရှောင်တွေလည်း ရှိနေပါတယ်” ဟု ၎င်းက ဆက်ပြောသည်။
ဖောင်းဆိုင်ဒေသအတွင်း ဖြစ်ပွားနေသည့် အဆိုပါ ကိုးကန့်တပ်ဖွဲ့ နှင့် စစ်ကောင်စီတပ်ဖွဲ့တို့၏ တိုက်ပွဲများ ကြောင့် စစ်ဘေးရှောင် ပြည်သူများ စုစုပေါင်း ၃၀၀ ခန့်ရှိနေပြီး စစ်ကောင်စီ တပ်ဖွဲ့မှ ရွာထဲ ပစ်လိုက်သည့် လက်နက်ကြီးကြောင့် ဖိုင်ကောင်းကျေးရွာက လူနေအိမ်အများ အပြား ထိခိုက်ပျက်စီးရကြောင်းလည်းသိ ရသည်။
