စစ်ကောင်စီမှ ထိုးပေးသည် ကိုဗစ်-၁၉ ကာကွယ်ဆေးသည် သျှမ်းပြည်မြောက်ပိုင်း နမ့်ခမ်းမြို့ရှိ ပြည်သူများလည်း ကာကွယ်ဆေးအပေါ် စိတ်ဝင်စားမှု များပြားလာပြီး၊ ဆေးထိုးရန် မျှော်လင့်နေကြ ကြောင်း စုံစမ်းသိရသည်။
သျှမ်းပြည်တွင်းရှိ တချို့မြို့နယ်များတွင် ဇူလိုင် (၃၀) ရက်နေ့က စတင်ပြီး ကာကွယ်ဆေး စတင်ထိုးပေးနေပြီး တစ်ချို့မြို့နယ်များတွင် လူစုလူဝေး ဖြစ်ပွားပြီး သွားရောက်ထိုးနှံခြင်း ၊ တစ်ချို့မြို့နယ်များတွင် ကာကွယ်ဆေးများ ပြတ်သည့်အထိ သွားရောက်ထိုးနှံကြကြောင်း သတင်းရရှိသည်။
“သေဆုံးမှုနှုန်းများလာတော့ ကိုဗစ်ကာကွယ်ဆေးကို ပိုစိတ်ဝင်စားလာကြတယ်။ အခုသေတဲ့သူတွေက အရင် ပထမ မထိုးတဲ့သူတွေပဲ။ ထိုးထားတဲ့လူတွေ ရောဂါပြန့်ကူးတာလဲ မပြင်းထန်တာ တွေ့ရတယ်” ဟု နမ့်ခမ်း ဒေသခံ တစ်ဦး ကသျှမ်းသံတော်ဆင့် ကိုပြောသည်။
ယခု ကိုဗစ်-၁၉ တတိယလှိုင်းသည် သေဆုံးမှုနှုန်းများပြားလာပြီး ပြည်သူများ ကာကွယ်ဆေးကို ပိုမို ထိုးချင်ကြကြောင်း ဒေသခံ ပြည်သူများက ပြောဆိုကြသည်။
“ကျနော်တို့ မိသားစု အပါအဝင် သွားထိုးချင်နေတာ။ စာရင်းသွားပေးမလို့ ရှိသေးတယ်။ ဆေးက ကုန်သွားပြီ အပြင်မှာ ဝယ်ထိုးလို့ရရင် ကျနော်တို့ မိသားစု ဝယ်ထိုးကြပြီ။ ဆေးထိုးပြီးမှ ဆိုင်ပြန်ဖွင့်လို့ရမှာ” ဟု နမ့်ခမ်းမြို့မှာ ဆိုင်ဖွင့်ထားသည့် ဒေသခံ တစ်ဦးက ပြောသည်။
ကာကွယ်ဆေးထိုးထားသည့် သူတစ်ချို့သည် ကိုဗစ်-၁၉ ရောဂါပိုးပြန်လည်ခံစားရသော်လည်း ပြင်းထန်သည့် ဝေဒနာ မခံစားရတော့ကြောင်း နမ့်ခမ်းပရဟိတ တစ်ဦး ကပြောသည်။
“ကျနော်အတွေ့အကြုံအရ ကာကွယ်ဆေးထိုးပြီးတော့ ကူးတာလဲရှိတယ်။ အဲ့ချိန်မှာ လူနာတွေ သက်သက်သာသာဖြစ်တယ်။ သူများလို အရမ်းအခြေနေမဆိုးဘူး” ဟု နမ့်ခမ်း ပရဟိတ အဖွဲ့ဝင် တစ်ဦး ကပြောသည်။
အလားတူ တစ်ချို့မြို့နယ်များတွင်လည်း ကာကွယ်ဆေးလာရောက်ထိုးနှံကြသည့်အတွက် ဆေးများ ပြတ်လတ်သွားသည့် အထိ သိရကြောင်း စုံစမ်းသိရှိရသည်။
စစ်ကောင်စီက တရုတ်ထုတ် ကိုဗစ်-၁၉ ကာကွယ်ဆေးကို အသက် (၆၅) နှစ်အထက်၊ ပရဟိတများ၊ ဝန်ထမ်းများ၊ ဈေးသည်များကို စတင်ထိုးပေးနေကြောင်း သိရသည်။
စစ်ကောင်စီမှ ပြည်သူများကို ထိုးပေးသည့် ကာကွယ်ဆေးသည် တရုတ်နိုင်ငံထုတ် (Sinopharm Vaccine) ဖြစ်ပြီး ကာကွယ်ဆေးထိုးပြီးချိန်တွင် ကိုက်ခဲခြင်း၊ ယောင်ခြင်း၊ ဆေးထိုးနေရာမှာ နီခြင်း၊ ခေါင်းကိုက်ခြင်း၊ အကြောကိုက်ခြင်း၊ အရေပြားပေါ် အနီးစက်များ ထွက်ပေါ်ခြင်း၊ အဖျားရှိခြင်း များ ဖြစ်ပွားလာနိုင်ကြောင်း သိရှိရသည်။
Sinopharm Vaccine ကာကွယ်နိုင်မှုစွမ်းအားသည် ၇၉.၃ ရာခိုင်နှုန်းဖြစ်ပြီး ဆေးကို ၂ ပတ်ခြား ခြင်းဖြင့် (၂) ကြိမ်ထိုးရမည်ဖြစ်ကြောင်း သိရှိရသည်။
