သျှမ်းပြည် အတွင်း ကိုဗစ်-၁၉ ကာကွယ်ဆေးထိုးပေးနေသည့်နေရာများတွင် လူစုလူဝေး ဖြစ်ပွားမှုကြောင့် သျှမ်းလူထုများက စိုးရိမ်နေကြကြောင်းသိရသည်။

သြဂုတ် ၁ရက် မှစတင်ကာ သျှမ်းပြည်တဝှမ်းတွင် ကိုဗစ်-၁၉ ကာကွယ်ဆေးကို သျှမ်းမြောက် သီပေါမြို့နယ်၊ သျှမ်းတောင် အေးသာယာနှင့် သျှမ်းရှေ့ ကျိုင်းတုံမြို့တွင် လူစုလူဝေးများဖြစ်ပွားခဲ့ကြောင်း စုံစမ်းသိရသည်။

လက်ရှိအချိန်မှာ ကိုဗစ်-၁၉ ကာကွယ်ဆေးကို အသက် (၆၅)နှစ်အထက်နှင့် ပရဟိတ လူမှုကူညီရေးအသင်းများကိုသာ ဦးစားပေးထိုးနေသော်လည်း ကိုဗစ်-၁၉ ကြောင့် သေမှုနှုန်းများပြီး ပြည်သူများက ကိုဗစ်ကာကွယ်ဆေးကို အလျန်အမြန်ထိုးချင်သည့်စိတ်ကြောင့် ထိုးနှံသည့်နေရာတွင် လာရောက်တိုးဝှေ့တန်းစီနေခြင်းဖြစ်ကြောင်း သိရသည်။

သီပေါမြို့ စန်းမာလာဥယျဉ်ရှိ မြို့တော်ခန်းမတွင် ကိုဗစ်ကာကွယ်ဆေးကို ဦးစားပေးထိုးသည့် စာရင်း သတ်မှတ်ထားသော်လည်း ပြည်သူများက ကိုဗစ် ကာကွယ်ဆေးကို အလျင်ထိုးလိုသည့်စိတ်ကြောင့် တိုးဝှေ့တန်းစီ စောင့်ဆိုင်းသည့်အတွက် ကိုဗစ်ကူးစက်မှုနှုန်း ပြန်မြင့်တက်လာမည်ကို စိုးရိမ်ရကြောင်း သီပေါဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“မြို့တော်ခန်းမမှာ ထိုးပေးတာ၊ လာထိုးတဲ့လူတွေ တန်းစီပြီး စောင့်နေတာ အတန်းအရှည်ကြီးပဲ၊ အဲတော့ ပိုးတွေ့နှုန်း လျော့နေတာကနေ ပြန်တက်လာမှာကို စိုးရိမ်မိတယ်” ဟု သီပေါဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

သီပေါမြို့နယ်တွင် သြဂုတ်လ (၁)ရက်နေ့ကတည်းက ကိုဗစ်ကာကွယ်ဆေး အလုံးရေ (၁၅၀၀) ရရှိထားတာဖြစ်ကြောင်း သိရသည်။

ထိုနည်းတူ သျှမ်းတောင် တောင်ကြီးမြို့နယ် အေးသာယာမြို့ရှိ မြို့လယ်ဓမ္မာရုံရှေ့တွင်လည်း ယမန်နေ့ မနက်ပိုင်းတွင် ကာကွယ်ဆေးထိုးရန်အတွက် လူစုလူဝေး တိုးဝှေ့စောင့်ဆိုင်းနေသည့်အတွက် ကိုဗစ်ပြန့်ပွားမည်ကိုလည်း ဒေသခံများက စိုးရိမ်ရကြောင်း အေးသာယာပြည်သူများက ပြောသည်။

ကိုဗစ်-၁၉ ထိုးပေးသည့်နေရာတွင် လူစုလူဝေးတိုးဝှေ့နေခြင်းသည် သက်ဆိုင်ရာမှ စနစ်တကျ မဆောင်ရွက်ခြင်း၊ နည်းစနစ်မမှန်မကန်ဆောင်ရွက်မှုကြောင့် ကိုဗစ်ကို ပိုပြီးကူးစက်စေကြောင်းလည်း အေးသာယာပြည်သူများက ဝေဖန်ထောက်ပြသည်။

“တာဝန်ရှိသူတွေ သေချာစီစဉ်လုပ်ဆောင်ဖို့ လိုအပ်ပါတယ်၊ အခုလို ကာကွယ်ဆေးထိုးမယ်ဆိုတိုင်း လူအုပ်ကြီးက စုလာရင် အဆင်မပြေပါဘူး၊ တမင်သက်သက် ပိုးဖြန့်နေသလားတောင် ထင်ရတယ်” ဟု အသက် ၄၅ နှစ်အရွယ် အေးသာယာနေ ပြည်သူတစ်ဦးက သျှမ်းသံတော်ဆင့်ကို ပြောသည်။

ကိုဗစ်-၁၉ ကာကွယ်ဆေးထိုးမည်ဆိုပါက မြို့နယ် အလိုက်၊ ရပ်ကွက် အလိုက်၊ ကျေးရွာအလိုက် လူဦးရေကန့်သတ်ပြီး အလှည့်ကျ စီစဉ်သင့်ကြောင်း၊ ထို့ပြင် မြို့ထဲတွင်လည်း ထိုးပေးသည့်နေရာများခွဲပြီး ထိုးပေးစေချင်ကြောင်း ၎င်းကဆိုသည်။

ဆက်လက်ပြီး သျှမ်းပြည် အရှေ့ပိုင်း ကျိုင်းတုံမြို့တွင်လည်း ယမန်နေ့က ကိုဗစ်ကာကွယ်ဆေးထိုးနှံရန် စောင့်ဆိုင်းနေသူများ စုဝေးနေသည်ကို တွေ့မြင်ရသည်။
သျှမ်းပြည်အတွင်းရှိ မြို့နယ်ဒေသအသီးသီးတွင် တရုတ်နိုင်ငံထုတ် ကိုဗစ် -၁၉ ကာကွယ်‌ဆေး (Sinopharm)များကို ထိုးပေးနေကြောင်းသိရသည်။

လက်ရှိ ကိုဗစ်-၁၉ ကာကွယ်ဆေးထိုးပေးပြီး လူစုလူဝေးဖြစ်ပွားနေသည့် သီပေါနှင့် အေးသာယာမြို့တို့သည့် Stay at home မြို့အဖြစ် သတ်မှတ်ခံရသည့် ဒေသဖြစ်ကြောင်းသိရသည်။