သျှမ်းပြည်မြောက်ပိုင်း မိုင်းငေါ့မြို့နယ် ချုံကျေးရွာအုပ်စု ဟေဝိုးကျေးရွာတွင် နေထိုင်သည့် အမျိုးသား (၂) ဦးကို တအောင်းအမျိုးသားလွတ်မြောက်ရေးတပ်မတော် (TNLA) ကဖမ်းဆီးခေါ်ဆောင်သွားခဲ့ပြီး ရိုက်နှက်ခဲ့ကြောင်း စုံစမ်းသိရသည်။

လွန်ခဲ့သည့် ဇူလိုင် ၂၈ ရက် မနက်ပိုင်း အချိန်တွင် TNLA မှ ဟေဝိုးကျေးရွာ နေထိုင်သည့် အမျိုးသား (၂)ဦးကို ဖမ်းဆီးခေါ်ဆောင်သွားခဲ့ပြီး၊ရိုက်နှက်မှုပြုလုပ်ခဲ့ကာ ဇူလိုင် ၃၁ရက်နေ့တွင် ပြန်လည်လွတ်ပေးခဲ့ကြောင်း သတင်းရရှိသည်။

လက်ရှိမှာတော့ TNLA မှ ပြန်လွှတ်ပေးသည့် အသက် (၅၄)နှဏ် အရွယ်ရှိ လုံးစိုင်းဆွေ တစ်ဦးသည် မိုင်းငေါ့မြို့ ရှိ စစ်ရှောင်စခန်းသို့ရောက်ရှိနေပြီး၊ ကျန်တစ်ဦးမှာ မည်သည့်နေရာသို့ ရောက်ရှိနေသည်ကို မသိရှိရကြောင်း မိုင်းငေါ့မှ စစ်ရှောင်ကူညီပေးနေသူ တစ်ဦးက သျှမ်းသံတော်ဆင့်ကို ပြောသည်။

ဟေဝိုးကျေးရွာအနီးပတ်ဝန်းကျင် တွင် တိုင်းရင်းသားအချင်းချင်းတိုက်ပွဲဖြစ်ပွားသည့်နေရာဖြစ်ပြီး၊ တိုက်ပွဲကြောင့် ဒေသခံများ မိုင်းငေါ့မြို့ အနီးပတ်ဝန်းကျင်သို့ ထွက်ပြေး တိမ်းရှောင်နေချိန် ၎င်း ၂ဦးသည် စစ်ရှောင်စခန်းသို့မရောက်လာဘဲ လက်ဖက်ခြံတွင်နေထိုင်ကြောင်းသိရသည်။

“ သူတို့နေတဲ့နေရာက တိုက်ပွဲဖြစ်တယ်။ အဲ့ (၂)ယောက်က လက်ဖက်ခြံထဲမှာသွားနေတယ်။ ဆန်ကုန်တော့ ရွာပြန်သွားချိန်မှာ TNLA တပ်သားတွေနဲ့တွေ့ပြီး ဖမ်းခေါ်သွားခံရတယ်။ နောက် ရိုက်နှက်ခံရတယ်။ ဒဏ်ရာတွေက တော်တော်များတယ်” ဟု မိုင်းငေါ့မြို့စစ်ရှောင် ကူညီပေးနေသည့် သူက ဆိုသည်။

မိုင်းငေါ့ စစ်ရှောင်စခန်းသို့ ပြန်လည်ရောက်ရှိလာသည့် လုံးစိုင်းဆွေသည် လက်ရှိမှာ မိုင်းငေါ့ဆေးရုံတွင် ဆေးကုသခံယူနေကြောင်းသိရသည်။
“ TNLAက သူတို့ကို ကြိုးတုတ်ပြီး ခြေထောက်ပေါ် ထင်တုံးနဲ့ လူးလိမ်စစ်ဆေးတယ်။ ရိုက်တယ်လို့ပြောတယ်။ လုံးစိုင်းဆွေက နားနည်းနည်းလေတယ်” ဟု အထက်ပါ ပုဂ္ဂိုလ်က ဆိုသည်။

လုံးစိုင်းဆွေတို့သည် သျှမ်းပြည်ပြန်လှည်ထူထောင်ရေးကောင်စီ၊ သျှမ်းပြည်တပ်မတော် RCSS/SSA ၏ သတင်းပေးသူဟုထင်ကာ စွတ်စွဲကာ TNLA မှဖမ်းဆီးထားပြီး နှိက်စက်ခဲ့ကြောင်း ဒေသခံများပြောပြချက်အရသိရသည်။

ထိုသို့ဖြစ်စဉ်နဲ့ ပတ်သတ်ပြီးတအောင်းအမျိုးသားလွတ်မြောက်ရေးတပ်မတော် TNLA ပြောခွင့်ရ ဗိုလ်မှူးကြီး မိုက်အိုက်ကျော်က “ ဖမ်းဆီးပြီးရိုက်တာတော့ မရှိပါဘူး။ အဲဖြစ်စဉ်တွေမရှိပါဘူး။” ဟု ပြောသည်။

ဇွန်လ ၂၃ ရက်နေ့ နမ္မတူမြို့နယ် နာခိုးလျံကျေးရွာ ဒေသခံ ရွာသား ၃ ဦးကိုလဲ TNLA တပ်ဖွဲ့မှ ရိုက်နှိက်ပြီးဖမ်းဆီးခေါ်ဆောင်သွားခဲ့ကြောင်းသိရသည်။