သျှမ်းပြည်မြောက်ပိုင်း တန့်ယန်းမြို့နယ် နားဟုတ်ကျေးရွာအုပ်စု တက်လျက်ကျေးရွာတွင် ကျောက်မီးသွေး တိုးချဲ့ပြီး တူးဖော်ရန် ကုမ္ပဏီ က ဒေသခံများကို လာရောက်စည်းရုံးနေကြောင်း စုံစမ်းသိရသည်။
ထို့ကြောင့် တန့်ယန်းမြို့နယ် နားဟုတ်ကျေးရွာအုပ်စု တက်လျက်ကျေးရွာ တွင် ကျောက်မီးသွေးတိုးချဲ့ တူးဖော်ရန် အတွက် မေ (၇)ရက်တွင် ကျေးရွာအုပ်စု ဥက္ကဌ က ပြည်သူများကို စည်းဝေးခေါ်ကာ ကျောက်မီးသွေးတူးဖော်ခွင့် သဘောတူညီကြောင်း လက်မှတ်ရေးထိုးခိုင်းကြောင်း သတင်းရရှိသည်။
ထိုအစည်းဝေးတွင် ပြည်သူ (၁၅) ဦးတက်ရောက်ခဲ့ကြောင်းသိရသည်။
ပြည်သူများကို အဓမ္မ လက်မှတ်ထိုးခိုင်းခဲ့ပြီး ပြည်သူ (၄) ဦးက လက်မှတ်ထိုးခဲ့ရကြောင်း၊ ကျန်ရှိသူများကို လက်မှတ်အတုလုပ်ဆောင်ခဲ့ကြောင်းလည်း အစည်းအဝေး တက်သည့် တန့်ယန်းဒေသခံ တစ်ဦးက ပြောသည်။
“ မေလ ၇ ရက်က သူစည်းဝေးခေါ်တယ်။ စည်းဝေးမှာက ကျနော်တို့လယ်ထဲမှာ ကျောက်မီးသွေးတူးဖို့ပြောတယ်။ အဲ့ဒါသဘောတူဖို့ လက်မှတ်ထိုးခိုင်းတာ။ အဓမ္မနဲ့ထိုးခိုင်းလိုက်တာ (၄) ယောက်တော့ထိုးပေးလိုက်ရတယ်။ ကျန်တဲ့ (၁၁)အတွက်ကို သူတို့ လက်မှတ်အတုလုပ်ပြီးထိုးလိုက်တယ် ” ဟု တန့်ယန်းမြို့ ဒေသခံတစ်ဦးကပြောသည်။
ထိုကျေးရွာအုပ်စု ဥက္ကဌသည် ပြည်သူများက တင်မြှောက်ထားသော ကျေးရွာအုပ်စု ဥက္ကဌ မဟုတ်ကြောင်း နားဟုတ်ရွာခံတဦးကပြောသည်။
“ သူက ကျနော်တို့ ပြည်သူတင်မြောက်ထားတဲ့ အုပ်ကြီးမဟုတ်ဘူး။ အာဏာသိမ်းပြီးနောက်တက်လာတဲ့ အုပ်ကြီးဖြစ်တယ်။ အုပ်ချုပ်တာမကြာသေးဘူး။ ပြည်သူတွေရဲ့ လက်မှတ်တုတွေလုပ်တက်နေပြီး” ဟု နားဟုတ်ရွာခံတဦးကပြောသည်။
ကုမ္ပဏီများမှာ လက်ရှိတွင် နာဟုတ်ကျေးရွာအုပ်စု တက်လျက်ကျေးရွာတွင် ကျောက်မီးသွေးတူးဖော်နေပြီး ပိန်းမုံကျေးရွာ၊ ဝမ်းကောင်း၊ ဝမ်းလုံ နှင့် မန်းကျောင်း ကျေးရွာတို့တွင် တိုးချဲ့တူးဖော်ရန် အတွက် ပြည်သူများထံ သဘောတူ လက်မှတ်တောင်းခဲ့ကြောင်းသိရသည်။
“ ကျနော်တို့ SNLDပါတီ၊ SSPP/SSA နဲ့ ပြည်သူစစ်တွေမှာ သူတို့လာမတူးဖို့ စာတင်ထားတယ်။ စစ်ရေးနိုင်ငံရေးမကောင်းတော့ ပြည်သူကတော့ အစစရာရာ စိုးရိမ်မှုများနေတာပဲ။” ဟု တန့်ယန့်မြို့နယ် နားဟုတ်ကျေးရွာအုပ်စုတွင်နေထိုင်သည့် အမျိုးသားတဦး ကပြောသည်။
ယခု ကျောက်မီးသွေးတူးဖော်ချင်သည့်နေရာသည် နမ့်ပန်ချောင်းဦး ဒေသဖြစ်သောကြောင့် ချောင်းရေပျက်စီးသွား မည်ကိုလည်း ဒေသခံများက စိုးရိမ်နေကြသည်။
“ သူတို့က ချောင်းဘေးနားမှာတူးချင်တာ။ နမ့်ပန်ပျက်စီးသွားရင် အကုန်ထိမှာ။ မိုင်းရှူးမှာရှိတဲ့ ဟိုင်းပါး၊ ကွန်းဟိန်းမြို့တို့အကုန်လုံးပျက်စီးသွားနိုင်တယ်။ ဒီနမ့်ပန်က ကျနော်တို့ သျှမ်းပြည်ရဲ့ အသက်သွေးကြောလဲဟုတ်တယ်။” ဟု အထက်ပါ နားဟုတ်ကျေးရွာဒေသခံက ပြောသည်။
အလားတူ ၂၀၂၀ ခုနှစ်က တန့်ယန့်မြို့နယ် တက်လျက်ကျေးရွာတွင် ကျောက်မီးသွေး တူးဖော်မှုကြောင့် ပြည်သူနေအိမ် (၁၁) အိမ် မဖြစ်မနေပြောင်းရွေ့ခဲ့ရကြောင်းသိရသည်။
တန့်ယန်းမြို့နယ်အတွင်းတွင် ကျောက်မီးသွေးကုမ္ပဏီ၊ ရာဘာကုမ္ပဏီ များ မှ ရပ်ရွာ လယ်ယာမြေများအား အဓမ္မသိမ်းပိုက် ဝယ်ယူခြင်း၊ ဒေခံများ မွေးမြူရေး၊ စိုက်ပျိုးရေး၊ သောက်သုံးရေ အတွက်အားကိုးအားထားရသည့် ရေထွက်ဦးများ သိမ်းပိုက် ဖျက်ဆီး နေသည့် ပြသနာများ ၁၀ စု နှစ်ချီ ရှိလာနေသည်။
ယခု ကျောက်မီးသွေးတူးဖေါ်နေသည့် ကုမ္ပဏီလည်း ဗိုလ်ချုပ်ခင်ညွန့်ခေတ် စစ်အစိုးရခေတ် ၂၀၀၀ ပြည့်နှစ်ကတည်းက ဝင်ရောက်လာသည့် ကုမ္ပဏီများဖြစ်ကြောင်း သိရသည်။