သျှမ်းပြည် မြောက်ပိုင်း လားရှိုးခရိုင် မိုင်းရယ်မြို့တွင် ကိုဗစ် -၁၉ ရောဂါကြောင့် အမျိုးသမီးတစ်ဦး သေဆုံးသွားကြောင်းစုံစမ်းသိရသည်။
ယမန်နေ့ ဇူလိုင် ၂၈ ရက်နေ့ မိုင်းရယ်မြို့ အမှတ် ၁ ရပ်ကွက်တွင် နေထိုင်သူ အမျိုးသမီးတစ်ဦးသည် အောက်စီဂျင်ကျပြီး ဆေးရုံသို့ ရောက်လာကာ အရေးပေါ်ခန်းတွင် ကုသမှုခံယူနေစဉ် သေဆုံး သွားကြောင်း သိရသည်။
“သေဆုံးသူက ရောဂါအခံ ရှိတယ်လို့လည်း ကြားပါတယ်၊ ကိုဗစ် Positive ဖြစ်တာကို အိမ်မှာပဲ ကြိတ်ကုပြီး အခြေအနေတွေဆိုးပြီး အောက်စီဂျင်လည်း အရမ်းကျမှ ဆေးရုံကိုလာတာ၊ ဆေးရုံကလည်းချက်ချင်းအရေး ပေါ်ခန်းမှာတင်ပြီး အောက်စီဂျင်ပေးပြီး ကုသပေမယ့် မမီတော့ပါဘူး၊ အရေးပေါ် ခန်းမှာပဲ သေဆုံးသွားပါ တယ်” ဟု မိုင်းရယ်မြို့ ဟိဓတရ လူမှုကူညီရေးအသင်းမှ အဖွဲ့သားတစ်ဦးက သျှမ်းသံတော်ဆင့်ကို ပြော သည်။
အဆိုပါ မိုင်းရယ်မြို့တွင်း ကိုဗစ် -၁၉ ကြောင့် ပထမဆုံးအကြိမ်အဖြစ် သေဆုံးရသူသည် အသက် ၄၀ ဝန်းကျင် အရွယ်ရှိသည့် အမျိုးသမီးဖြစ်ပြီး ရောဂါ မကျွမ်းသေးသည့် အချိန်တွင် ဆေးကုသမှု ခံယူပါက အချိန်မှီ ကုသ အသက်ကယ်နိုင်ကြောင်းလည်း အထက်ပါ ပုဂ္ဂိုလ်က ပြောသည်။
“သေဆုံးသူက အသက် ၄၀ အရွယ်ပဲ ရှိသေးတယ်ဆိုတော့ ရောဂါ စစဖြစ်ချိန်မှာ သက်ဆိုင်ရာကို အသိပေး ပြီးကုသမှုခံယူရင် ဒီထက်စောပြီး ဆေးရုံကို ရောက်လာမယ်ဆိုရင် သူ့အသက်ကို ကယ်တင်နိုင်လိမ့်မယ်လို့ တော့ ကျနော်တို့ ထင်ပါတယ်၊ အခုလို ဖြစ်သွားတော့ စိတ်မကောင်းပါဘူး” ဟု ၎င်းကပြောသည်။
အဆိုပါ ကိုဗစ်ကြောင့် သေဆုံးသွားရသည့် အမျိုးသမီးအလောင်းကိုလည်း မိုင်းရယ်မြို့ ဟိတဓရ လူမှုကူညီရေး အသင်းမိုင်းရယ်မြို့မှ ပို့ဆောင် မီးသဂြိုလ်ပေးခဲ့ကြောင်း သိရသည်။
မိုင်းရယ်မြို့အတွင်းတွင် ဆေးရုံတက်ကာ ကုသမှု ခံယူသည့် ကိုဗစ် -၁၉ တတိယလှိုင်း အတည်ပြု ပိုးတွေ့လူနာ ၈၀ ဦးရှိနေပြီး ကိုဗစ် – ၁၉ ကြောင့် သေဆုံးသူ တစ်ဦးရှိလာနေပြီ ဖြစ်သည့် အတွက် ပြည်သူများနေဖြင့်အရင်ကထက် ပိုပြီးဂရုစိုက်ကြရန်နှင့် ရောဂါအခြေအနေများတွေ့ရှိပါက ဆေးရုံသို့ ချက်ချင်းလာရောက်ပေးကြရန်လည်း မိုင်းရယ်မြို့ ဟိတဓရ အသင်းဝင်များက တိုက်တွန်းပြောဆို ထားပါသည်။
