သျှမ်းပြည်မြောက်ပိုင်း နမ့်ခမ်းမြို့တွင် ကိုဗစ်-၁၉ ကြောင့် သေဆုံးမှု မြင့်တက်လာသည့်အတွက် မီးသဂြိုလ် စက်ကို အသစ်ထပ်မံ ပြုလုပ်သွားမည်ဖြစ်ကြောင်း စုံစမ်းသိရှိရသည်။
လက်ရှိ မီးသဂြိုလ်စက်သည် လူသေလောင်း တစ်ကြိမ် သဂြိုလ်လျှင် (၂) နာရီခန့် ရှိပြီး ထင်းနှင့် သဂြိုလ် ရသဖြင့် အချိန် ကြန့်ကြာမှု ရှိသောကြောင့် အသစ်ထပ်မံ ပြုလုပ်မည်ဖြစ်ကြောင်း နမ့်ခမ်းပရဟိတ အဖွဲ့ဝင် တစ်ဦး က သျှမ်းသံတော်ဆင့် ကိုပြောသည်။
“တစ်လောင်း တစ်ဂြိုလ်ရင် တစ်နာရီခွဲ ၂ နာရီလာက်ရှိတယ်။ အချိန်ကြန့်ကြာမှုရှိတယ်။ ၆ လောင်း ၇ လောင်းဆို အပူဒဏ်ကြောင့် ကွဲတာတွေလည်းရှိမှာပေါ့။ ခုလက်ရှိသုံးနေတာက ထင်းနဲ့ သုံးတဲ့ဟာ အဲ့ဒါကို သူ့ထက် အဆင့်မြင်တဲ့ဟာ သုံးမယ်။ လေ့လာတုန်းရှိသေးတယ်” ဟု နမ့်ခမ်း ပရဟိတအဖွဲ့ဝင် တစ်ဦး ကပြောသည်။
လက်ရှိ နမ့်ခမ်းမှာ ကိုဗစ်-၁၉ အတည်ပြု လူနာ ဇူလိုင် (၂၈) ရက်နေ့ထိ အတည်ပြု လူနာ စုစုပေါင်း (၆၄၀) ကျော်ရှိပြီး သေဆုံးသူ (၃၆) ဦးရှိသွားပြီဖြစ်ကြောင်း ပရိဟတိ တစ်ဦးကပြောသည်။
“သေဆုံးသူ တစ်နေ့ကို (၂) ဦး (၃) ဦးရှိတယ်။ မရှိတဲ့နေ့လည်း မရှိဘူး။ ဒီနေ့ဆိုရင်လည်း မနက်က တစ်ဦး ဆုံးသွားပြီ။ အဲ့သေဆုံးသူ (၃၆) ဦးက အတည်ပြုလူနာတွေပဲ။ သံသယတွေ မပါသေးဘူး” ဟု နမ့်ခမ်း ပရဟိတ တစ်ဦး သျှမ်းသံတော်ဆင့် ကိုပြောသည်။
ကိုဗစ်-၁၉ ကူးစက်မြန် ရောဂါကြောင့် သေဆုံးမှုနှုန်းမြင့်မားပြီး မူဆယ်မြို့နယ်တွင်လည်း တစ်နေ့တည်းလျှင် သေဆုံးသူ (၇) ဦးထိရှိခဲ့ပါသည်။
Leave a Comments