သျှမ်းတပ် (၂) တပ် ဖြစ်ပွားနေသော တိုက်ပွဲ ကိစ္စနှင့်ပတ်သက်ပြီး သက်ဆိုင်ရာ တပ်မှူးများနှင့် ချိတ်ဆက်ပြီး အပစ်ခတ်ရပ်စဲရေး ဖြစ်အောင် ကြိုးပမ်းနေဆဲဟု ရှမ်းတိုင်းရင်းသားများ ဒီမိုကရေစီအဖွဲ့ချုပ်( SNLD) က ပြောဆိုလိုက်သည်။

သျှမ်းတပ် (၂)တပ်သည် ဇွန်လဆန်းပိုင်းက စတင်ကာ တိုက်ပွဲဖြစ်ပွားခဲ့ပြီး ယနေ့ထိတိုင်း စစ်ရေးတင်းမာနေသေးကာ တိုက်ပွဲကြောင့် စစ်ရှောင်ထောင်ချီထွက်ပြေးတိမ်းရှောင်နေရသည်။

ထို့ကြောင့် သျှမ်းတပ်(၂)တပ် စစ်ရှိန်လျော့ပြီး တွေ့ဆုံဆွေးနွေးရန်အတွက် (၂)ဖက် သက်ဆိုင်ရာ တပ်မှူးများနှင့် ချိတ်ဆက်ပြီး အပစ်ခတ်ရပ်စဲရေး ဖြစ်အောင် ကြိုးပမ်းနေဆဲ ဟု SNLD မှ ပြောရေးဆိုခွင့်ရှိသူ စိုင်းလိတ်က သျှမ်းသံတော်ဆင့်ကို ပြောသည်။

“အခုလည်းပဲ နှစ်ဖက် သက်ဆိုင်ရာ တပ်မှူးတွေနဲ့ ချိတ်ဆက်ပြီးတော့မှ အပစ်ခတ်ရပ်စဲရေး ဖြစ်အောင်ဆိုပြီးတော့မှ ကြိုးပမ်းနေဆဲဖြစ်တယ်။ ၂ဖက်စလုံးက စစ်ရှိန်ကို လျော့ပြီး တွေ့ဆုံဆွေးနွေးဖို့ ဆန္ဒရှိတယ်။ ဒါပေမယ့် ဘယ်နေ့ ဘယ်ချိန် ဘယ်နေရာမှာ တွေ့ဆုံမလဲ ဘယ်လို ပုံစံမျိုးနဲ့ ထပ်ပြီးတော့ ဆွေးနွေးမလဲဆိုတာတော့ အခုထက်ထိ ညှိနှိုင်းနေဆဲ ဖြစ်ပါတယ်” ဟု စိုင်းလိတ် က ဆိုသည်။

ဆက်လက်ပြီး နှစ်ဖက်တပ် တာဝန်ရှိသူများ၊ရဲဘော်များ၊ (၂) ဖက်တပ်ကို ထောက်ခံအားပေးသည့် လူထုအနေဖြင့် မိမိ၏ စိတ်ခံစားချက်ပေါ် မူတည်ပြီး သတင်းမှား လွှင့်ခြင်း၊ မဟုတ်မမှန်သော သတင်းများကို ရှယ်ခြင်း (share) ခြင်းသည် စစ်ရှိန်ကို ပိုမိုမြင့်မားစေခဲ့သည့်အတွက် ဝိုင်းဝန်းရှောင်ကျဉ်ရန် တိုက်တွန်းလိုကြောင်း စိုင်းလိတ် ကပြောသည်။

“နှစ်ဖက်တပ်ကို ထောက်ခံအားပေးတဲ့ လူထုအနေနဲ့ ကိုယ့်ရဲ့ စိတ်ဆန္ဒအခံ ကိုယ့်ရဲ့ ခံစားချက်ပေါ် မူတည်ပြီးတော့ သတင်းမှားတွေ လွှင့်တာ၊ မဟုတ်မမှန်သတင်းတွေ ရှယ်တာ၊ အမုန်းစကားတွေ ပြောနေတာမျိုးတို့ ရပ်ဖို့ လိုအပ်ပါတယ်။ အဲ့ဒီကိစ္စတွေကလည်း အကျိုးမရှိတဲ့အပြင်ကို စစ်ရှိန်ကို ပိုမိုပြီးတော့မှ မြင့်မာစေခဲ့တဲ့အတွက် ဝိုင်းဝန်းရှောင်ကြဉ်ကြဖို့ တိုက်တွန်းလိုပါတယ်” ဟု ပါတီ၏ပြောရေးဆိုခွင့်ရှိသူ စိုင်းလိတ် ကပြောသည်။

ဇူလိုင် (၂၆) ရက်နေ့က ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) ပါတီမှ အာဏာရှင် စနစ်ဆန့်ကျင်ရေး၊ ဖက်ဒရယ် ဒီမိုကရေစီ ပြည်ထောင်စုတည်ဆောက်ရေး၊ အမျိုးသား ပြန်လည်သင့်မြတ်ရေး နှင့် ပြည်သူလူထု၏ အကျိုးတို့ကို ရှေးရှုပြီး သက်ဆိုင်သူများသို့ အချက် (၄) ချက်ဖြင့် တိုက်တွန်းနိုးဆော်ထားသည်။

သျှမ်းတပ်ဖွဲ့ နှစ်ဖွဲ့အကြား ဖြစ်ပွားနေသည့် တိုက်ပွဲများ ရပ်တန့်နိုင်ရေး အမြန်ဆုံး တွေ့ဆုံဆွေးနွေးကြရန်၊ ကိုဗစ်-၁၉ ကမ္ဘာကပ်ရောဂါအား လက်တွဲပူးပေါင်း တားဆီးကာကွယ်တိုက်ဖျက်ကြရန်။ ပြည်သူတို့၏ အကျိုးစီးပွား ထိခိုက်နစ်နာစေမည့် မည်သည့် လုပ်ဆောင်ချက်မျိုးကိုမဆို ရှောင်ကြဉ်ကြရန် SNLD ၏ ထုတ်ပြန်ချက်တွင်ရေးသားထားသည်။