သျှမ်းမြောက် ကျောက်မဲမြို့တွင် ကျန်းမာရေးမကောင်းသည့် သူများ၊ ငွေကြေးခက်ခဲသူများ အလွယ်တကူ လာရောက်ပြသနိုင်ရန်နှင့် အိမ်တွင်းပုန်း ကုသနေသူများ လျော့နည်းသွားစေရန် ရည်ရွယ်ပြီး ဇူလိုင် ၂၆ ရက်နေ့(ယနေ့)မနက်ပိုင်း မှစတင်ကာ Fever Clinic အခမဲ့ဆေးခန်း ဖွင့်လှစ်ကာ ကုသပေးနေပြီဖြစ်ကြောင်း သိရသည်။

ကျောက်မဲမြို့တွင် ကိုဗစ် ကူးစက်မှုနှုန်းမြင့်တက်နေပြီး ကာကွယ်ထိန်းချုပ်ကုသမှု အားနည်းနေသည့်အတွက် အခမဲ့ဆေးခန်းကို ဖွင့်လှစ်ရခြင်းဖြစ်ကြောင်း အဆိုပါဆေးခန်းတွင် ကုသပေးမည့် စေတနာ့ ဆရာဝန်တစ်ဦးက ခုလိုပြောသည်။

“ကိုဗစ် 1st wave ၊ 2nd wave တုန်းကလို ကာကွယ်ထိန်းချုပ်ကုသမှုတွေက အပြည့်အဝမလုပ်နိုင်တော့ပဲ အိမ်တွင်းပုန်းရောဂါသည်တွေ အဖြစ်များလာတယ်၊ ကူးစက်သေဆုံးမှုတွေက အရမ်းတိုးလာနေတယ်၊ ပိုး ရှိ မရှိ၊ လူနာနဲ့ထိတွေ့သူတွေ၊ သံသယလူနာတွေကိုပါ မစစ်ဆေးနိုင်တော့ဘူး၊ ဒါကြောင့် ရပ်ကွက်ထဲက ဖျားနာသူတွေအများစုဟာ ကိုဗစ်ကြောင့်ပဲဖြစ်မယ်လို့ ယူဆနိုင်ပြီး လူနာတွေအတွက် သီးခြားခွဲထုတ် စစ်ဆေးကုသ လွှဲပြောင်းမှုတွေလုပ်ပေးနိုင်ဖို့ ရည်ရွယ်ဖွင့်လှစ်တာပါ” ဟု ဆေးခန်းတွင်ကုသပေးမည့် စေတနာ့ ဆရာဝန်တစ်ဦးက က သျှမ်းသံတော်ဆင့်ကို ပြောသည်။

အဆိုပါဆေးခန်းကို ကျောက်မဲပြည်သူ့ဆေးရုံရှေ့ရှိ မူကြိုကျောင်း(နေ့ကလေးထိန်းကျောင်း)တွင် ဖွင့်လှစ်ထားတာဖြစ်ပြီး ကုသရေးပိုင်းတွင် စေတနာ့ဆရာဝန်များဖြစ်သည့် ဒေါက်တာ သိန်းဇော်၊ ဒေါက်တာ ဇေယျာမင်းနိုင်နှင့် ဒေါက်တာ သန့်ဇင်တို့က တာဝန်ယူ ကုသပေးသွားမှာဖြစ်ကြောင်း သိရသည်။

“ကျန်းမာရေးမကောင်းပေမယ့် အိမ်တွင်းပုန်းပြီး ကြိတ်ကုတဲ့သူတွေရှိတယ်၊ အဲ့လို ကြိတ်ကုရင်းနဲ့ သေဆုံးသွားတာတွေလည်း ကြားနေရတာပဲ၊ အဲလို အိမ်တွင်းပုန်းပြီး ကြိတ်ကုတာတွေကို မလုပ်ကြပါနဲ့၊ ရောဂါတွေ ပိုပြီးတော့ ပျံ့နှံ့သွားရင် ပိုပြီးခက်ခဲသွားမှာစိုးရိမ်တယ်၊ အဲ့တော့ ဆေးခန်းကို လာပြကြ၊ ငွေကြေးမတတ်နိုင်လည်း လာပြကြပါ၊ ကိုဗစ်ရောဂါလက္ခဏာရှိတဲ့ လူနာတွေကို ကိုဗစ် စစ်ပေးမယ်၊ ရောဂါပိုး တွေ့ခဲ့ရင်လည်း ဆေးရုံတက် ကုသလို့ရအောင် ဆေးရုံအုပ်နဲ့ စီစဉ်ထားပါတယ်” ဟု အောင်မင်္ဂလာအဖွဲ့ ဥက္ကဌ ကိုကျော်ကျော်ဦးက ပြောသည်။

ယခုဖွင့်လှစ်သည့် Fever Clinic အခမဲ့ဆေးခန်းသည် အောင်မင်္ဂလာအခမဲ့ဆေးခန်းဖွင့်လှစ်သည့် အဖွဲ့နှင့် ခရိုင်ကျန်းမာရေးဌာန၏ အထောက်အပံ့ဖြင့် ပူးပေါင်းဖွင့်လှစ်ထားတာဖြစ်ကြောင်း၊ ကျောက်မဲမြို့တွင် ယခင်က အောင်မင်္ဂလာ အခမဲ့ဆေးကုခန်းကို စေတနာ့ဆရာဝန်ဖြင့် ဖွင့်လှစ်ကုသပေးခဲ့တာဖြစ်ပြီး ကိုဗစ်လူနာများပြားလာသည့်နောက်တွင် ဆေးခန်းအား ယာယီပိတ်ထားခဲ့သော်လည်း ဆေးဝါးဝေငှပေးမှုကို ဆက်လက်လုပ်ဆောင်နေဆဲဖြစ်ကြောင်း သိရသည်။

“ရုတ်တရက် သေဆုံးတာတွေက နေ့တိုင်းကို ရှိနေတာ၊ နေမကောင်းဖြစ်ပေမယ့် ဘယ်သွားပြရမှန်းမသိ၊ ဆေးရုံကိုလည်း မသွားရဲ အဲ့တော့ အိမ်တွင်းမှာပဲ ကိုယ့်နည်းကိုယ့်ဟန်နဲ့ ဆေးသောက်နေကြတာတွေ၊ ပြီးတော့ သေဆုံးသွားတာတွေ ကြားနေရတာပဲ” ဟု ကျောက်မဲမြို့တွင် ပရဟိတဆောင်ရွက်နေသူ တစ်ဦးက ပြောသည်။

Fever Clinic အခမဲ့ဆေးကုခန်းကို အပတ်စဉ် တနင်္လာ၊ ဗုဒ္ဓဟူးနှင့် သောကြာနေ့များတွင် နံနက် (၉)နာရီမှ စတင်ဖွင့်လှစ် ကုသပေးသွားမှာဖြစ်ကြောင်း သိရသည်။

ကျောက်မဲမြို့နယ်တွင် ယမန်နေ့အထိ ကိုဗစ်အတည်ပြုလူနာ (၄၀၀)ဝန်းကျင်ရှိနေပြီး သေဆုံးသူ (၁၅)ဦးထက်မနည်း ရှိနေကြောင်း စုံစမ်းသိရသည်။