သျှမ်းပြည် တောင်ပိုင်း မိုးနဲမြို့တွင် ကိုဗစ် – ၁၉ ကူးစက်ရောဂါ တတိယလှိုင်းအတွင်း အတည်ပြုပိုးတွေ့ လူနာ စုစုပေါင်း ၂၆ ဦးရှိသည့် အနက် မီးသတ်တပ်ဖွဲ့ဝင် ၁၄ ဦးပါဝင်ကြောင်း စုံစမ်းသိရသည်။
လင်းခေးခရိုင် မိုးနဲမြို့နယ် နမ့်မော်ဆွမ့်ကျေးရွာအုပ်စု၊ ကတ်နောက်ရွာနေ မြို့နယ်မီးသတ်ဦးစီးဌာနမှ မီးသတ် တပ်ဖွဲ့ဝင်တစ်ဦးသည် အနံ့မရသဖြင့် မီးသတ်တပ်ဖွဲ့ဝင်များနှင့် ၎င်းတို့၏ အတူနေမိသားစုဝင်များ၊ ထိတွေ့မှု ရှိသူများ စုစုပေါင်း ၆၂ ဦးကို ယမန်နေ့က ဇူလိုင်လ ၂၁ ရက်၊ မနက်ပိုင်းတွင် RDT Test Kit ဖြင့် စစ်ဆေးခဲ့ရာ တပ်ဖွဲ့ဝင် အမျိုးသား ၁၃ ဦးနှင့် အမျိုးသမီး တစ်ဦး စုစုပေါင်း ၁၄ ဦး တို့တွင် ကိုဗစ် – ၁၉ ရောဂါပိုး တွေ့ရှိ ခဲ့ကြောင်း သိရသည်။
“မနေ့မှာ မီးသတ်တပ်ဖွဲ့ဝင်တစ်ဦးက အနံမရတော့ဘူးဆိုလို့ သူနဲ့ ထိတွေ့ ဆက်စပ်မှုရှိသူ အားလုံးကို RTD နဲ့ စစ်ပေးလိုက်တယ်၊ အဲ့မှာ သူအပါအဝင် အားလုံး ၁၄ ယောက်မှာ ကိုဗစ်ပိုးတွေ့သွားတယ်၊ အမျိုးသမီး တစ် ယောက်လည်းပါတယ်” ဟု သူနာပြု ဆရာမ နန်းစီနွမ်းက သျှမ်းသံတော်ဆင့်ကို ပြောသည်။
မိုးနဲမြို့နယ် အတွင်းတွင် ကိုဗစ် – ၁၉ ရောဂါ ကူးစက်ပျံ့ပွားမှု တတိယလှိုင်းမှ ကူးစက်ခံရသူ အတည်ပြု လူနာများ တွေ့ရှိရခြင်းဖြစ်ပြီး ယမန်နေ့ ဇူလိုင်လ ၂၁ ရက်အထိ ကိုဗစ် – ၁၉ ရောဂါပိုးတွေ့ရှိသူ စုစုပေါင်း ၂၆ ဦး ရှိလာပြီဖြစ်ကြောင်းလည်း သိရသည်။
လက်ရှိတွင် အဆိုပါ ကိုဗစ် – ၁၉ ရောဂါပိုး တွေ့ရှိသည့် မီးသတ်တပ်ဖွဲ့ဝင်များကို မိုးနဲမြို့နယ် မီးသတ်ဦးစီး ဌာနမှူး ရုံးဝင်းအတွင်းရှိ သီးသန့်ဆောင်တွင် ထားရှိကာ ကုသမှုများဆောင်ရွက်ပေးလျက်ရှိပြီး၎င်းတို့၏ မိသားစုဝင်များကိုလည်း အသွားအလာကန့်သတ် ထားရှိ ထားကြောင်း သိရသည်
