သျှမ်းပြည်မြောက်ပိုင်း လားရှိုးခရိုင် မိုင်းရယ်မြို့နယ်တွင် ကိုဗစ်-၁၉ လူနာ (၆၁)ဦး ရှိရာ သျှန်တော် သကြားစက်ရုံမှ အလုပ်သမား ဝန်ထမ်း အများဆုံး ဖြစ်နေကြောင်း စုံစမ်းသိရသည်။
“ကျမတို့မြို့က ပထမလှိုင်းနဲ့ ဒုတိယလှိုင်းမှာ ကိုဗစ်-၁၉ မကူးပေမယ့် ဒီတတိယလှိုင်းမှာကျတော့ မလွှတ်တော့ပါဘူး၊ အခုဆို ကိုဗစ် ပိုးတွေ့ရှိသူ အတည်ပြုလူနာ စုစုပေါင်းက ၆၁ ဦးရှိလာပါတယ်၊ ဒါပေမယ့် ၂၁ ယောက်က ရောဂါသက်သာ ကင်းစင်လို့ ဆေးရုံက ဆင်းပါပြီ၊ အခုဆေးရုံမှာ တက်ရောက် ပြီး ဆေးကုသမှု ခံယူနေတာက ၄၀ ဦးကျန်ပါတယ်” ဟု မိုင်းရယ်မြို့နေ မြို့ခံပြည်သူတစ်ဦးက သျှမ်းသံတော်ဆင့်ကို ပြောသည်။
အဆိုပါ ပိုးတွေ့လူနာများအနက် အများစုသည် သျှန်တော်သကြားစက်ရုံ (ငွေရည်ပုလဲ သကြားထုတ် လုပ်မှု စက်ရုံ) မှ အလုပ်သမားဝန်ထမ်းများ ဖြစ်ကြပြီး ခရီးသွားရာဇဝင်ရှိသည့် အရပ်သား ပြည်သူများ ထံမှလည်း ကိုဗစ် ပိုးတွေ့ရှိရကြောင်း ၎င်းကပြောသည်။
“အတည်ပြုလူနာတွေက သူတို့ဆီ ရောဂါ လက္ခဏာပြလို့ လာစစ်ရင်းနဲ့ ကိုဗစ်ပိုးရှိကြောင်းသိရတာပါ၊ အများဆုံးကတော့ သျှန်တော်သကြားထုတ်လုပ်မှုစက်ရုံက ပါမယ်၊ ပြီးတော့ ခရီးသွားရာဇဝင်ရှိတဲ့ ပြည်သူတွေကလည်း ကိုဗစ်ပိုးစစ်ဆေးတွေ့ရှိရပါတယ်” ဟု ၎င်းက ပြောသည်။
မိုင်းရယ်မြို့နယ်အတွင်း ကိုဗစ်-၁၉ ကူးစက်ရောဂါပိုး တွေ့ရှိရခြင်းနှင့် ပက်သက်ပြီး မြို့အဝင်အထွက် ဂိတ် များတွင် စစ်ဆေးမှုများ မပြုလုပ်မှုကြောင့် မြို့တွင်းတွင် ရောဂါပိုးပျံ့နှံ့ရခြင်းဖြစ်ကြောင်း လူနာများကို ကူညီ သယ်ဆောင်ပေးနေသည့် မိုင်းရယ်မြို့ လူမှုကူညီရေးအသင်းမှ အဖွဲ့ဝင်တစ်ဦးက သျှမ်းသံတော်ဆင့် ကို ပြောသည်။
“ပြောရမယ်ဆိုရင်တော့ ဒီမတိုင်ခင် မြို့အဝင်အထွက်ဂိတ်တွေက မပိတ်ဘူး၊ မစစ်ဘူးလေ၊ အသွားအလာ တွေ မကန့်သတ်တော့ သွားလာမှုတွေက များတယ်၊ အဲ့ကြောင့် ပိုဆိုးကုန်တော့ပေါ့” ဟု ၎င်းကပြောသည်။
လက်ရှိမိုင်းရယ်မြို့တွင်း ကိုဗစ် -၁၉ ပိုးတွေ့လူနာများအနက် အောက်စီဂျင်ပေးရသည့် လူနာ ၃ ဦးခန့်ရှိပြီး မိုင်းရယ်မြို့ ပြည်သူ့ဆေးရုံတွင် ဆေးကုသမှု ခံယူလျက်ရှိကြောင်း သိရသည်။
Leave a Comments