သျှမ်းတပ် (၂) တပ်တိုက်ပွဲကြောင့် သျှမ်းပြည်တောင်ပိုင်း လဲချားမြို့နယ်ရှိ အတွင်းရောက်ရှိနေသည့် စစ်ရှောင် (၁၀၀၀) ကျော် စားနပ်ရိက္ခာနှင့် ကျန်းမာရေး စောင့်ရှောက်မှု လိုအပ်ကြောင်း စုံစမ်းသိရှိရသည်။
အဆိုပါ စစ်ရှောင် (၁၀၀၀) ကျော်တို့သည် မိုင်းကိုင်မြို့နယ်ရှိ မိုင်းခွန်ကျေးရွာအုပ်စုက ဒေသခံ ရွာသားများဖြစ်ကြပြီး ထို နေရာသည် တိုက်ပွဲကြောင့် ပြည်သူများ ထွက်ပြေးတိမ်းရှောင်ခဲ့ရကြောင်း စုံစမ်းသိရှိရသည်။
လဲချားမြို့နယ်ရှိ စစ်ရှောင် စခန်း (၅) နေရာမှာ တတ်မောက်ကျေးရွာအုပ်စု၊ နမ့်လေရွာ၊ဝမ်ထီရွာ၊ စလိုင်းခုံရွာ၊ ဟိုလုံးရွာ တို့သည် စစ်ရှောင် (၁၀၀၀) ကျော် ကျန်းမာရေး ကုသမှု နှင့် စားနပ်ရိက္ခာလိုအပ်ကြောင်း စစ်ရှောင်များ ကူညီပေးနေသူ အမျိုးသား တစ်ဦး ကပြောသည်။
“သူတို့ လိုအပ်ချက်က စားနပ်ရိကာ နဲ့ နေထိုင်ဖို့နေရာပေါ့နော်။ အခုက ဘုန်းကြီးကျောင်းတွေမှာ ရွာထဲက လူမနေတဲ့ အိမ်မှာ သွားနေနေရရတယ်။ စောင်တွေ အခင်းတွေ ခြင်ထောင်တွေနဲ့ တဲတွေ လုပ်ဖို့အတွက် မိုးကာတွေပေါ့။ ကျန်းမာရေးအတွက် စောင့်ရှောက်မှု လည်းလိုအပ်တယ်” ဟု စစ်ရှောင်များကို ကူညီပေးနေသည့် အမျိုးသား တစ်ဦး ကပြောသည်။
အဆိုပါ လဲချားရှိ စစ်ရှောင်များသည် ဇူလိုင်လ ဒုတိယအပတ်က ရောက်ရှိလာကြပြီး၊ တစ်ချို့ စစ်ရှောင်များလည်း ဆွေမျိုးများ နေအိမ်သို့ လာရောက်နေထိုင်ခဲ့ပါသည်။
ထိုစစ်ရှောင်များကို ကူညီထောက်ပံ့ရန်အတွက် ရလာသည့် အလှူငွေ နှင့် စစ်ရှောင်များ လိုအပ်သည့် လိုအပ်ချက်များ ညီမျှဘူးမရှိခြင်း၊ ယခုကာလမှာ ကိုဗစ် -၁၉ မြင့်တက်လာသဖြင့် အသွားအလာ ခက်ခဲမှုများ ရှိလာနိုင်ကြောင်း စစ်ရှောင်များကို လိုက်လံကူညီပေးနေသည့် သူ တစ်ဦး ကပြောသည်။
“သူတို့ကို ကူညီဖို့ စိန်ခေါ်မှု အခက်ခဲဆုံးကတော့ စစ်ရှောင်တွေ လိုအပ်ချက် နဲ့ အလှူရှင်တွေ မှာ ရတဲ့ ငွေသားနဲ့က မညီမျှဘူး။ ရှာနိုင်သလောက်လဲ မလုံလောက်ဘူး။ စစ်ဘေးရှောင်တွေက များတယ်။ အလှူငွေတွေက အွန်လိုင်းကနေ ရတာများတယ်။ ငွေသားကို ပြန်လဲရတာလဲ ခက်ခဲတယ်။ ငွေသားလဲရင် ၅ ရာခိုင်နှုန်းကနေ ၇ ရာခိုင်နှုန်းထိ ပေးရတယ်။ ကိုဗစ်-၁၉ ကူးစက်မှုနှှုန်း မြင့်တက်လာတဲ့အတွက်ကြောင့် အသွားအလာ ခက်ခဲတယ်။ မိုးရာသီလည်းဖြစ်တော့ အလှူပစည်းတွေ သွားပို့ဖို့အတွက် လမ်းတွေ အခက်ခဲဖြစ်တယ်။” ဟု စစ်ရှောင်များကို ကူညီပေးနေသည့် အမျိုးသား တစ်ဦးကပြောသည်။
သျှမ်းတပ် (၂) တပ် တိုက်ပွဲကြောင့် ယနေ့ ဇူလိုင် (၁၉) ရက်ထိ သျှမ်းပြည်တောင်ပိုင်း ကျေးသီးမြို့ရှိ စစ်ရှောင် (၃၀၀) ကျော်၊ မိုင်းကိုင်မြို့နယ်ရှိ စစ်ရှောင် (၈၀၀) ကျော် နှင့် လဲချားမြို့နယ်ရှိ စစ်ရှောင် (၁၀၀၀) ကျော် တို့ နေရပ်သို့ ထွက်ပြေးတိမ်းရှောင်ခဲ့ရကြောင်းသိရသည်။
