သျှမ်းပြည်တောင်ပိုင်း မိုင်းရှုးမြို့နယ် ကျေးရွာတစ်ချို့တွင် SSPP/SSA မှ တပ်သားသစ်များကို လိုက်လံကောက်ယူနေသည့်သတင်းကြောင့် ပြည်သူများ ထွက်ပြေးနေရကြောင်း သတင်းရရှိသည်။
လွန်ခဲ့သည့် ဇူလိုင် ၁၀ ရက်နေ့တွင် မိုင်းရှုးမြို့နယ်ရှိ ကျေးရွာများတစ်ချို့တွင် သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA) မှ ညအချိန်တွင် တပ်သားသစ်များ စုဆောင်းမှုပြုလုပ်သောကြောင့် လူငယ်များ ထွက်ပြေးတိမ်းရှောင်လာခဲ့ရကြောင်းသိရသည်။
“ ကျနော်တို့ ထွက်ပြေးလာတာ ၃ ရက်တော့ရှိပြီ။ ကျနော်တို့ရွာထဲတော့ မရောက်လာသေးဘူး။ တချို့ရွာမှာဖမ်းနေတယ်ဆိုလို့ ကျနော်တို့ ကြိုတင်ပြီးထွက်ပြေးလာတာ။ ကျနော်တို့ကြားတာတော့ ဝမ်းဟိုင်း (SSPP) ကလာဖမ်းတယ်လို့ပြောတယ်” ဟု ထွက်ပြေးတိမ်းရှောင်နေသည့် အသက် (၂၁) အမျိုးသားတဦးက သျှမ်းသံတော်ဆင့်ကိုပြောသည်။
မိုင်းရှုးမြို့နယ်ဖက်ရှိ တပ်သားသစ်ကောက်ယူမှု မရှိကြောင်း သျှမ်းပြည်တိုးတက်ရေးပါတီ SSPP ပြောခွင့်ရ ဗိုလ်မှူး စိုင်းဖုန်းဟန်က သျှမ်းသံတော်ဆင့်ကိုပြောသည်။
“ ဒါကတော့ မဖြစ်နိုင်ဘူး။ တွေ့ကရလူကို စစ်ခေါ်လုပ်ရင် ကျနော်တို့ စစ်သား ထောင်ချီရှိနေပြီ။ ကျနော်တို့ လူတွေ အဲ့နေရာတွေ မရောက်ဘူး။ ကျနော်ဖမ်းတာ မရှိဘူး” ဟု SSPP/SSA ပြောခွင့်ရ ဗိုလ်မှူးကြီး စိုင်းဖုန်းဟန်က ပြောသည်။
လွန်ခဲ့သည့် လပိုင်းတွင်လည်း သျှမ်းပြည်မြောက်ပိုင်းတွင် တိုင်းရင်းသားလက်နက်ကိုင်များက တပ်သားသစ်စုဆောင်မှု များပြုလုပ်သဖြင့် ပြည်သူများထွက်ပြေးတိမ်းရှောင်ခဲ့ရသည်။
မိုင်းရှူးမြို့သည် သျှမ်းပြည်တိုးတက်ရေးပါတီ SSPP/SSA ထိန်းချုပ်သောနယ်မြေ ဖြစ်သည်။
Leave a Comments