သျှမ်းပြည်တောင်ပိုင်း ကျေးသီးမြို့တွင် ယမန့် ( ဇူလိုင် ၈) ရက် ကိုဗစ်-၁၉ အတည်ပြုလူနာ ၂ ဦး စတင်တွေ့ ရှိလာသဖြင့် စစ်ရှောင်များအတွက် စိုးရိမ်နေရကြောင်း စုံစမ်းသိရသည်။
ထို ကိုဗစ် -၁၉ အတည်ပြုလူနာ ၂ ဦးသည် ကျေးသီးမြို့ စစ်ကောင်စီ ၏ တပ်(၃၀၃) တွင်နေထိုင် သည့် သူများဖြစ်ကြောင်းသိရသည်။
“ ကိုဗစ် လူနာ (၂)ယောက် က တပ်ထဲက လူတွေပါ။ အမေနဲ့ သမီးတွေဖြစ်ကြတယ်။ သူ့သမီးက ကျောင်းကနေကူး လာတာထင်တယ်။ သူတို့ (၂) ယောက်ကူးပြီးတော့ ကျောင်းကို ပိုးသတ်ဆေးသွားဖြန်းပေးရတယ်” ဟု ကျေးသီးမြို့ဒေသခံ အမျိုးသားတစ်ဦးကပြောသည်။
တဖက်တွင်လည်း ကျေးသီးမြို့နယ်တွင် စစ်ဘေးရှောင် (၃၀၀၀)ကျော်ရှိနေသဖြင့် ကိုဗစ် ၁၉ ပိုးပြန်ပွားလာမှာကို စိုးရိမ်နေရကြောင်း စစ်ဘေးရှောင်ပြည်သူတစ်ဦး က ပြောသည်။
“ စစ်ရှောင်နေတဲ့နေရာနဲ့တော့ဝေးတေယ်။ ဒါမဲ့လည်း စိတ်ပူရတယ်လေ။ ကျနော်တို့တော့ သူတို့နေရာကို ပိုးသတ်ဆေးတွေ၊ Mask (နှာခေါင်းစည်း) တွေကိုတော့ဝေထားပေးတယ်။ ပိုးမရောက်လာအောင်တော့ ဆုတောင်းပေးနေရတယ်” ဟု ကျေးသီးမြို့စစ်ရှောင်ပြည်သူတစ်ဦး ကပြောသည်။
စစ်ဘေးရှောင်များသည် စုပြီး ဘုန်းကြီးကျောင်းတွင်နေထိုင်ကြသလို တချို့မှာ ဘုန်းကြီးကျောင်းဝန်းထဲတွင် တဲဆောက်ပြီးနေထိုင်ရပြီး၊ အများစုသည် အသက်ကြီးသူများ၊ ကလေးငယ်များဖြစ်သဖြင့် ကိုဗစ်-၁၉ ကူးစက်မှုဖြစ်မှာကို အလွန်စိုးရိမ်နေကြကြောင်း စစ်ဘေးရှောင်များက ပြောသည်။
ကျေးသီးမြို့လွိုင်ဟွန်းတောင်ကြောတွင် သျှမ်းစစ်တပ် (၂) တပ် RCSS/SSA နှင့် SSPP/SSA တို့ ဇွန်လ ၁ ရက်နေ့မှစတင်ပြီး ယနေ့ အချိန်ထိ စစ်ရေး တင်းမာနေဆဲ ဟု သိရသည်။
