သျှမ်းပြည်အတွင်း ဖြစ်ပေါ်နေသည့် ပဋိပက္ခ များကို ကိုင်တွယ်ဖြေရှင်းလိုသည့်အတွက် ဗိုလ်ချုပ်ကြီး ယွက်စစ် က ငြိမ်းချမ်းရေး လုပ်ငန်းစဉ် ဦးဆောင်အဖွဲ့ (PPST) အဖွဲ့ မှ ယာယီခေါင်းဆောင် မှ နှုတ်ထွက်ရခြင်းဖြစ်ကြောင်း RCSS/SSA မှ ပြောကြားလိုက်သည်။
သျှမ်းပြည် အတွင်း ဖြစ်ပေါ်နေသည့် ပဋိပက္ခများနှင့် RCSS/SSA မှ သျှမ်းပြည်အတွင်း ငြိမ်းချမ်းရေးနှင့် ပေါင်းစည်းရေးကိစ္စများကို ကိုင်တွယ် ဖြေရှင်းလိုခြင်းတို့ကြောင့် PPST အဖွဲ့ခေါင်းဆောင်အဖြစ်မှ နှုတ်ထွက်ခွင့်တောင်းခြင်း ဖြစ်ကြောင်း RCSS/SSA မှ အထွထွေ အတွင်းရေးမှူး ၂ ဖြစ်သူ ဗိုလ်မှူးကြီး စိုင်းငင်းက သျှမ်းသံတော်ဆင့်ကို ပြောသည်။
“အခု ဖြစ်ပါ်နေတဲ့ နိုင်ငံရေး အခြေအနေအရသော်လည်းကောင်း၊ ကျနော်တို့အဖွဲ့အစည်း ပြီးတော့ ကျနော် တို့ သွားချင်လုပ်ချင်နေတဲ့အပြင် သျှမ်းပြည်သူလူထုတွေရဲ့ ရည်မှန်းတောင့်တထားတဲ့ အတိုင်း လုပ်ဆောင်ဖို့ အချိန်ကျလာပြီ ထင်မြင်မိလို့ PPST ယာယီ အဖွဲ့ခေါင်းဆောင် အဖြစ် နှုတ်ထွက်တာလို့ ပြောပါတယ်” ဟု ဗိုလ်မှူးကြီး စိုင်းငင်းက ဆိုသည်။
အပစ်ရပ် ၁၀ ဖွဲ့ဖြင့် ဖွဲ့စည်း ထားသည့် ငြိမ်းချမ်းရေး လုပ်ငန်းစဉ် ဦးဆောင်အဖွဲ့ (PPST) ၏ ယာယီအဖွဲ့ခေါင်း ဆောင်အဖြစ်မှ ဗိုလ်ချုပ်ကြီး ယွက်စစ် နှုတ်ထွက်သွားကြောင်းနှင့် ပက်သက်ပြီး PPST အနေဖြင့် သက် ဆိုင်ရာ ကဏ္ဍအလိုက် တာဝန်များခွဲဝေးထားသဖြင့် ထူးခြားသော ပြောင်းလဲမှုမရှိကြောင်း ဗိုလ်မှူးကြီး စိုင်းငင်းက ပြောသည်။
လက်ရှိတွင် PPST ယာယီအဖွဲ့ခေါင်းဆောင်နေရာသည် လစ်လပ်နေလျက်ရှိပြီး ၎င်း၏ကိုယ်စား PPST အား စတုတ္ထအကြိမ်မြောက် အပစ်ရပ်လက်မှတ်ထိုးထားသည့် တိုင်းရင်းသားလက်နက်ကိုင်များ၏ ထိပ်သီး အစည်းအဝေး (ဒုတိယပိုင်း) ပြီးမြောက်သည်အထိ ယာယီဦးဆောင်ရန် အဖွဲ့ဝင် ၃ ဦးပါဝင်သည့် ကော်မတီ ကို ဖွဲ့စည်းလိုက်ရကြောင်း ၎င်းက ပြောသည်။
ထိုယာယီဦးဆောင်ကော်မတီတွင် MNSP ဒုတိယ ဥက္ကဋ္ဌ နိုင်အောင်မင်းက အဖွဲ့ခေါင်းဆောင်အဖြစ်ပါဝင်ပြီး၊ RCSS အဖွဲ့မှ ဗိုလ်မှူးကြီးစိုင်းငင်းနှင့် ပအို့ဝ်အမျိုးသားလွတ်မြောက်ရေးအဖွဲ့ (PNLO) မှ ဦးဆောင်နာယက ဗိုလ်မှူးကြီး ခွန်ဥက္ကာ တို့က အဖွဲ့ဝင်အဖြစ် ပါဝင်ကြောင်းလည်း သိရသည်။
အပစ်ရပ် ၁၀ ဖွဲ့ (NCA) ဖြင့် ဖွဲ့စည်းထားသည့် PPST တွင် ကရင်အမျိုးသား အစည်းအရုံး (KNU)၊ သျှမ်းပြည် ပြန် လည်ထူထောင်ရေး ကောင်စီ (RCSS)၊ မွန်ပြည်သစ်ပါတီ (NMSP)၊ မြန်မာနိုင်ငံလုံးဆိုင်ရာ ကျောင်းသား များ ဒီမိုကရက်တစ် တပ်ဦး (ABSDF)၊ ကရင် ငြိမ်းချမ်းရေး ကောင်စီ (KNU/KNLA-PC)၊ ဒီမိုကရေစီ အကျိုးပြု ကရင်တပ်မတော် (DKBA)၊ ချင်းအမျိုးသားတပ်ဦး (CNF)၊ လားဟူဒီမိုကရက်တစ် အစည်းအရုံး (LDU)၊ ရခိုင်ပြည်လွတ် မြောက်ရေးပါတီ (ALP)၊ ပအိုဝ့်အမျိုးသား လွတ် မြောက်ရေး အဖွဲ့ချုပ် (PNLO) တို့ပါဝင်သည်။
စစ်တပ်မှ နိုင်ငံတော် အာဏာသိမ်းပြီးနောက်ပိုင်း နိုင်ငံရေးလှုပ်ရှားမှုများ နှင့် ငြိမ်းချမ်းရေးဖော်ဆောင်မှု လုပ်ငန်းများသည်လည်း လွတ်လပ်စွာ လုပ်ဆောင်နိုင်ခွင့်မရှိသောကြောင့် အာဏာသိမ်း စစ်ကောင်စီ ရှိနေသရွေ့ အပစ်ခတ် ရပ်စဲရေး NCA လက်မှတ်ရေးထိုးထားသည့် အတိုင်း နိုင်ငံရေးအကြောင်းနှင့် ငြိမ်းချမ်းရေး လုပ်ငန်းဆောင်တာ ကိစ္စရပ်များကို လက်ခံဆွးနွေးမည် မဟုတ်ကြောင်း ဗိုလ်မှူး စိုင်းငင်းက ပြောသည်။
“ NCA ကနေ စာထုတ်ထားသည့် အတိုင်း စစ်တပ်က နိုင်ငံတော်အာဏာသိမ်းထားနေသရွေ့ နိုင်ငံရေးနဲ့ ငြိမ်းချမ်းရေးဖော်ဆောင်မှု လုပ်ငန်းစဉ်များ လက်ခံဆွေးနွေးမှာ မဟုတ်ဘူး၊ ဒါပေမဲ့ NCA အဖွဲ့ဝင်ထား ပေမယ့် ကိုယ့်သက်ဆိုင်ရာ အဖွဲ့အစည်းတစ်ခုချင်းစီ အနေဖြင့်တော့ အခွင့်အရေးတွေရှိပါတယ်၊ ဆွေးနွေး နိုင်ပါတယ်” ဟု ၎င်းက ပြောသည်။
အဖွဲ့၏ ယာယီဥက္ကဌ ရာထူးမှ ဗိုလ်ချုပ်ကြီး ယွက်စစ် နှုတ်ထွက်သွားသည့် PPST သည် စစ်တပ်မှ နိုင်ငံတော်အာဏာ မသိမ်းခင် ၂၀၁၉ ခုနှစ်တွင် အဖွဲ့ခေါင်းဆောင်အဖြစ် တာဝန်ယူထားသည့် KNU ဥက္ကဋ္ဌ ဗိုလ်ချုပ်ကြီး စောမူတူးစေးဖိုးနှင့် ဒုအဖွဲ့ခေါင်းဆောင် ဗိုလ်ချုပ်ကြီး ယွက်စစ်တို့ တာဝန်များမှ နုတ်ထွက်သွား ပြီးနောက် ဗိုလ်ချုပ်ကြီး ယွက်စစ်က ယာယီ အဖွဲ့ခေါင်းဆောင်အဖြစ် တာဝန်ဆက်ယူပေးခဲ့ခြင်းဖြစ်သည်။
