သျှမ်းမြောက် ကျောက်မဲခရိုင် သီပေါမြို့ ပြည်သူ့ဆေးရုံတွင် ကိုဗစ်ကူးစက်လူနာများအား ကုသရန် ဆရာဝန် မလုံလောက်သည့်အတွက် လူနာများ အခက်ခဲကြုံနေရကြောင်း သိရသည်။
ယနေ့ (ဇူလိုင် ၈)ရက် သီပေါပြည်သူ့ဆေးရုံတွင် ဆေးကုသခံနေသည့် ကိုဗစ်-၁၉ လူနာ (၁၁၀)ခန့်ရှိပြီး၊ နမ့်လန်ပြည်သူ့ဆေးရုံတွင် (၃၀)ခန့်ရှိကာ ဆေးရုံတွင် ဆေးကုပေးမည့် ဆရာဝန် လုံလောက်မှုမရှိသဖြင့် ဆေးကုသရန် ခက်ခဲနေကြောင်း သီပေါမြို့ ပရဟိတလုပ်ဆောင်နေသူ တစ်ဦး က သျှမ်းသံတော်ဆင့်ကို ပြောသည်။
“လူနာတွေက နေ့တိုင်းတိုးလာနေတယ်။ ကုသပေးတဲ့ ဆရာဝန်အင်းအားက အရမ်းနည်းတော့ လူနာတွေ အခက်ခဲကြုံနေတာရှိတယ်” ဟု သီပေါမြို့မှ ပါရဟိတအသင်းဝင်တစ်ဦးက ပြောသည်။
ကိုဗစ်လူနာများထဲတွင် အောက်ဆီဂျင်အသုံးပြုနေရသည့် လူနာများလည်း ရှိနေပြီး အောက်ဆီဂျင်လိုအပ်လာပါက ၎င်းတို့ အသင်းမှ ရှာယူပို့ဆောင်ပေးနေရကြောင်း၊ လူနာများ ကုသရန်နေရာသစ်ကိုလည်း တရုတ်စာသင်ကျောင်းတစ်ကျောင်းတွင် ပြင်ဆင်နေပြီဖြစ်ကြောင်း ၎င်းက ဆိုသည်။
သီပေါမြို့ပေါ်ရှိ ပြည်သူ့ဆေးရုံတွင် (၁၁၄)ဦးနှင့် နမ့်လန်ပြည်သူ့ဆေးရုံတွင် (၂၉)ဦး ကိုဗစ်လူနာများ ဆေးကုသနေပြီး (၄၃)ဦး ဆေးရုံဆင်းခွင့်ရပြီးဖြစ်ကြောင်း သိရသည်။
“အရေးကြီးဆုံးက ကိုယ်က ကျန်းမာရေးမကောင်းဘူး၊ နာစေး ချောင်းဆိုးနေတယ် ကိုယ်ပူပြီး ဖျားနာနေတယ် ဆိုရင် ကြိတ်ပြီး မကုပါနဲ့၊ မလိုလားအပ်ပဲ အသက်အန္တရာယ် ထိခိုက်နိုင်သလို စစ်ဆေးလိုက်လို့ ကိုဗစ်ပိုး ကူးနေတယ်ဆိုရင် ထိတွေ့မိတဲ့သူတွေလည်း များနိုင်တယ်၊ ပိုပြီးပျံ့နှံ့သွားနိုင်တယ်၊ ပိုပြီးဒုက္ခရောက်သွားမှာ” အဆိုပါ ပရဟိတဆောင်ရွက်နေသူက သျှမ်းသံတော်ဆင့်ကို ပြောသည်။
သီပေါမြို့နယ်တွင် ကိုဗစ်ပိုးတွေ့လူနာ (၁၈၆)ဦး ရှိပြီး ယနေ့မနက်အစောပိုင်း သေဆုံးသူ (၁)ဦး အပါအဝင် သေဆုံးသူ (၆)ဦးထိရှိနေသည်။
ထိုနည်းတူ ကျောက်မဲမြို့တွင်လည်း ကျန်းမာရေးဝန်ထမ်းတစ်ချို့ CDM ပါဝင်နေသည့်အတွက် ကိုဗစ်လူနာများအား ကုသပေးမှု အားနည်းနေမှုရှသဖြင့် ဒေသခံများလည်း စိုးရိမ်နေကြကြောင်း သိရသည်။
“ဒီနေ့မနက် အိမ်နားက အသိတစ်ယောက် အသက်ရှူကြပ်လို့ သွားပြတာ နေ့လည် ၁၂ခွဲထိ ဘာမှ မလုပ်ရသေးဘူး၊ ကိုဗစ်လက္ခဏာလိုပဲ အသက်ရှူကြပ်ပြီး မောနေတာ၊ ပြီးတော့ ရုတ်တရက် ဆုံးသွားတဲ့သူတွေလည်း ရှိတယ်၊ အဲလိုလူတွေကို လူနာတင်ယာဉ်တွေနဲ့ အမြန်ဆုံးလာသယ်သွားတယ်” ဟု ကျောက်မဲဒေသခံတစ်ဦးက ပြောသည်။
ယနေ့ ကျောက်မဲတွင် ယမန်နေ့က ကိုဗစ်သံသယဖြင့် သေဆုံးသွားသော အမျိုးသမီးတစ်ဦး၏ မိသားစုဝင်(၁)ဦးနှင့် အခြားထိတွေ့သူများထဲမှ (၄)ဦးတွင်လည်း ကိုဗစ်ပိုးတွေ့ရှိခဲ့ကြောင်း သိရသည်။
ကိုဗစ်လူနာများစွာ တွေ့ရှိထားသည့် နောင်ပိန်ကျေးရွာတွင်လည်း နောက်ထပ် (၃)ဦး တွင် ကိုဗစ်ပိုးထပ်မံတွေ့ရှိခဲ့ရကြောင်း သိရသည်။
“အိမ်မှာက သက်ကြီးသမားရှိတော့ အရမ်းစိတ်ပူရတယ်။ နေ့တိုင်း အိမ်ရှေ့ကို လူနာတင်ယာဉ် တစ်စီးပြီးတစ်စီး ဖြတ်နေတော့ ပိုပြီး စိတ်ပူတယ်၊ ရပ်ကွက်ထဲကလူတွေလည်း အရမ်းကို စိုးရိမ်နေကြပြီ” အဆိုပါ ဒေသခံတစ်ဦးက သျှမ်းသံတော်ဆင့်ကို ပြောသည်။
ထို့အပြင် မူဆယ်နှင့်နမ့်ခမ်းမြို့များတွင်လည်း ကိုဗစ် ကူးစက်ခံရသည့်လူနာများ ပိုများလာသည့်အတွက် ဆေးရုံများတွင် နေရာလုံလောက်မှုမရှိသောကြောင့် တချို့လူနာများကို နေအိမ်တွင် ထားရှိရကြောင်း စုံစမ်းသိရှိရသည်။
သျှမ်းပြည်တွင် ဇူလိုင် ၈ ရက် (ယနေ့)မနက်ပိုင်းထိ ကိုဗစ် – ၁၉ ကူးစက်ခံရသူ (၂၄၀၀)ကျော်ရှိနေပြီး သေဆုံးသူ (၅၀)ကျော် ရှိနေပြီဖြစ်ကြောင်း သိရသည်။
