သျှမ်းပြည်မြောက်ပိုင်းတွင် ကိုဗစ်- ၁၉ ပိုးတွေ့လူနာ များလာသဖြင့် ဆေးရုံတွင် လူနာထားရန်နေရ လုံလောက်မှု မရှိကြောင်း စုံစမ်းသိရှိရသည်။
မူဆယ်မြို့တွင် ကိုဗစ် ၁၉ ပိုးတွေ့လူနာ စုစုပေါင်း (၂၀၀) ကျော်ထိရှိလာပြီး ဆေးရုံးတွင် ထားရှိရန် မလုံလောက်သောကြောင့် တချို့လူနာများကို နေအိမ်တွင်ထားရှိနေရကြောင်း မူဆယ်မြို့ ဂရုဏာ လူမှုကူညီရေးအသင်းမှ အဖွဲ့ဝင်တစ်ဦးက သျှမ်းသံတော်ဆင့်ကိုပြောသည်။
“ လူနာကတော့ ၂၀၀ကျော်ထိရှိတယ်။ အတိအကျတော့ မသိနိုင်တော့ဘူးပေါ့။ ဆေးရုံးအသစ်မှာက ထားရတာမလောက်တော့ဘူး။ မနေ့ညက ဆေးရုံးဟောင်းကို လူနာ ၁၇ ယောက်လောက်ပြောင်းရွှေ့ပေးရတယ်” ဟု မူဆယ်မြို့ ဂရုဏာလူမှုကူညီအသင်းမှ အဖွဲ့ဝင်တစ်ဦးက ပြောသည်။
ထိုနည်းတူ နမ့်ခမ်းမြို့တွင်လည်း ကိုဗစ် -၁၉ ပိုးတွေ့လူနာ များပြာလာသောကြောင့် ဆေးရုံးတွင် လူနာများ စုပြီးထားရန်အဆင်မပြေသောကြောင့် လူနာများထားရန် နေရာချဲ့နေရကြောင်း သတင်းရရှိသည်။
“ ဆေးရုံးမှာ လူအများဝင်လို့မရတာမဟုတ်ဘူး။ နီးနီးကပ်ကပ်ထားရင်လည်း ပြုစုတဲ့သူတွေလဲ ကူးမှာစိုးရိမ်းရတယ်လေ။ အဲကြောင့် အပြင်ခွဲထွက်လိုက်တာ” ဟု နမ့်ခမ်းမြို့ အမျိုးသားဒေသခံတစ်ဦးက ပြောသည်။
လက်ရှိတွင် ကိုဗစ် ၁၉ ရောဂါကြောင့် အောက်ဆီဂျင်များအသုံးပြုရာတွင်လည်း မလုံလောက်သောကြောင့် အခက်ခဲများစွာရှိကြောင်းသိရသည်။
နမ့်ခမ်းမြို့တွင် ဇူလိုင် ၆ရက်နေ့ထိ ကိုဗစ် ၁၉ ပိုးတွေ့ အတည်ပြုလူနာ စုစုပေါင်း ၁၃၉ ဦးရှိပြီး ဆေးရုံဆင်းခွင့်ရလူနာ ၁၆ ဦး နှင့် သေဆုံးသူ( ၇) ဦးရှိကြောင်းသိရသည်။
ဖေဖော်ဝါရီ ၁ရက်နေ့မှ စစ်အာဏာသိမ်းယူပြီးနောက်ပိုင်း အစိုးရဝန်းထမ်းများ စစ်အာဏာဖီဆန်ရေး (CDM) ပါဝင်လာကြသည်။
ထိုတွင် စစ်အစိုးရလက်အောက်တွင် ကိုဗစ် ၁၉ ကို ထိန်းချုပ်ရန်အတွက် လွန်စွာခက်ခဲလာကြောင်း မူဆယ်မြို့ အမည်မဖော်လိုသည့် ပရိဟိတ အဖွဲ့မှ အဖွဲ့ဝင်တစ်ဦး က ပြောသည်။
“ ဒီစစ်အစိုးရလက်အောက်မှာက အရင်လိုမျိုးမဟုတ်တော့ဘူး။ ဆရာဝန်တွေလဲ လုံလောက်မှုမရှိဘူး။ အောက်စီဂျင်တွေ လည်းမရှိဘူး။ နေရာတွေလည်း လုံလောက်မှုမရှိဘူးပေါ့နော်။ တချို့ဆို ကိုယ်အသိစိတ်နဲ့ကို အပြင်မထွက်ကြတာ လည်းရှိတယ်” ဟု အထက်ပါပုဂ္ဂိုလ် ကဆိုသည်။
လက်ရှိမှာ ကိုဗစ် -၁၉ ပြန့်ပွားများနေသော်လည်း ဆရာဝန်များက အာဏာသိမ်းစစ်လက်အောက်တွင် တာဝန်မထမ်းဆောင်နိုင်သောကြောင့် လုပ်ငန်းခွင်ထဲသို့ ပြန်ဝင်မည်မဟုတ်ကြောင်း သိရသည်။
“ ဆရာဝန်တွေလဲ တာဝန်ပြန်လာမထမ်းဆောင်ဘူးလို့ပြောတယ်။ သူတို့က အဆုံးထိ CDM မှာပဲ ပါဝင် သွားမယ်လို့ပြောတယ်။ ဆရာဝန်တင်မဟုတ်ပါဘူး။ တစ်ချို့ ပရဟိတအဖွဲ့တွေလဲ ဒီစစ်အာဏာအောက်မှာ အလုပ်မလုပ်တော့တာတွေ့ရှိတယ်” ဟု အထက်ပါ အမည်မဖော်လိုသည့် ပရိဟိတအဖွဲ့ဝင်က ပြောသည်။
လက်ရှိ သျှမ်းမြောက်ပိုင်းတွင် နေ့စဉ်နှင့် အမျှ ကိုဗစ်-၁၉ ကူးစက်မှုနှုန်းများလာသည့်အတွက် ရပ်ကွက်တိုင်း၊ လမ်းတိုင်းသည် ကိုယ့်နည်းကိုယ်ဟန်ဖြင့် လော့ဒေါင်း ပြုလုပ်နေကြကြောင်းသိရသည်။
Leave a Comments