သျှမ်းပြည် တောင်ပိုင်း ကလောမြို့တွင် ကိုဗစ် -၁၉ အတည်ပြုလူနာ တစ်နေ့ထက် တစ်နေ့ တိုးပွားလာပြီး၊ ကျန်းမာရေးဝန်ထမ်းအင်အားနေသဖြင့် အခက်အခဲများကြုံတွေ့နေကြောင်း စုံစမ်းသိရ သည်။
ယမန်နေ့ ဇူလိုင်လ ၂ ရက်နေ့အထိ ကလောမြို့နယ် အတွင်း ကိုဗစ် – ၁၉ အတည်ပြုလူနာ (၆၇) ဦး ရှိနေပြီး၊ ကျန်းမာရေး စောင့်ရှောက်ပေးမည့် ဝန်ထမ်းမရှိသည့်အတွက် ဒေသခံအခက်ခဲများစွာကြုံနေကြာင်း ကလောဒေသခံတစ်ဦးက သျှမ်းသံတော်ဆင့်ကို ပြောသည်။
“အခုကျနော်တို့ဆီမှာ ပိုးတွေ့လူနာတွေ ဒီလောက်များလာတာကို ဘာတားမြစ်ထုတ်ပြန်ချက်မှ မရှိလာဘူး၊ အထက်ကလည်း ဘာမှ စီမံဆောင်ရွက်ပေးခြင်း မရှိဘူး၊ မြို့ကြီးကို ပုံမှန်လည်ပတ်ခိုင်းစေတယ်တဲ့” ဟု ၎င်းက ပြောသည်။
ကလောမြို့ ကိုဗစ် – ၁၉ ရောဂါ ဒေသတွင်းကူးစက် ခံရသူများအနက် Non- CDM ကျောင်းဆရာမ တစ်ယောက်နှင့် ပညာရေးမှူးတစ်ယောက်တို့ ပါ ကူးစက်ခံရသော်လည်း စာသင်ကျောင်းအား ပိတ်ပင် ခြင်းမရှိဘဲ ကလေးများကို ကျောင်းတက်လာခိုင်းကြောင်း သိရသည်။
“ဆရာမတစ်ယောက် ကိုဗစ်ပိုးတွေ့တယ်၊ ကျောင်းက ပုံမှန်အတိုင်း ဖွင့်မြဲဖွင့်လျက်ပဲ၊ ပြီးတော့ ပညာရေး မှူးက ကိုဗစ်ပိုး ကူးစက်ခံရတယ်၊ အဲ့သူစာသင်တဲ့ အခန်းကိုသာ (၅)ရက်ပိတ်ပြီး တော့ကျန်တာ တွေကဘာမှ မဖြစ်သလိုပဲ။ ပြီးတော့ ကျောင်းတွေကို ပုံမှန်အတိုင်း ဖွင့်ပြန်တယ်” ဟု ကလောမြို့ ဒေသခံတစ်ဦး က သျှမ်းသံတော်ဆင့်ကို ပြောသည်။
ကလောမြို့တွင် ကိုဗစ်-၁၉ ရောဂါပိုးအတွက် ကွာရန်တင်း စင်တာ မရှိသောကြောင့် နေအိမ်တွင်းကွာရန်တင်း သာ ထားရှိရပြီး ကြီးကြပ်သူ မရှိသည့် အပြင် ပိုးတွေ့လူနာများထားရှိရာ အောင်ပန်း မိုးကုတ်ရိပ်သာ မှာတွင် လည်း လာရောက်ကြီးကြပ်သူ အဖြစ် ကြက်ခြေနီ အသင်းနှင့် ပရဟိတသမားများသာ ရှိကြောင်း ကလော မြို့မှ ပရဟိတ တစ်ဦးက သျှမ်းသံတော်ဆင့်ကို ပြောသည်။
“ခက်တာက နည်းလမ်းကျကျ ကြီးကြပ်ပေးမယ့် ဆရာဝန်တွေ မရှိဘူး။၊ ပြီးတော့ ပရဟိတသမားတွေ လည်း အရင်ကလောက်မများတော့ဘူး၊ ဒါကို အထက်က စီစဉ်ဆောင်ရွက်ပေးမှု ဘာမှ မရှိဘူးဆိုရင် အားလုံး ဒုက္ခ ရောက်ကုန်တော့မယ်” ဟု ၎င်းက ပြောသည်။
လက်ရှိ ကလောပြည်သူ့ဆေးရုံတွင်လည်း ကျန်းမာရေး ဝန်ထမ်းအင်အား နည်းပါးနေသည့်အတွက် လူနာ (၅)ဦး ဝန်းကျင်ခန့်သာ လက်ခံကုသပေးပြီး အောက်စီဂျင်လိုအပ်သော လူနာများကို တောင်ကြီး သို့ ပို့ဆောင် ရကြောင်း ကလောမြို့ ဒေသခံများ ပြောပြချက် အရ သိရသည်။
