သျှမ်းပြည်အတွင်း ဇွန်လပိုင်းမှစတင်ကာ ယနေ့ အချိန်ထိ ကိုဗစ် – ၁၉ ရောဂါ ကူးစက်ခံရသူပေါင်း (၁၀၀၀)ကျော် ရှိနေပြီး သေဆုံးသူ ၂၀ ဦးခန့် ရှိနေကြောင်း သိရသည်။

ကိုဗစ်ကူးစက်ခံရသူ များပြားသည့် သျှမ်းပြည် မြောက်ပိုင်း လားရှိုးမြို့နှင့် လောက်ကိုင်မြို့တို့ကို ပြီးခဲ့သည့် ဇွန်လ (၂၇) ရက်မှစတင်ပြီး Stay at home မြို့များအဖြစ် စစ်ကောင်စီလက်အောက်ခံ ကျန်းမာရေးဝန်ကြီးဌာနက သတ်မှတ်ထားသည်။

နမ္မတူမြို့တွင် ကိုဗစ် – ၁၉ အတည်ပြုလူနာ ၆ ဦးရှိသည့်အနက် (ယနေ့) ဇူလိုင် ၂ ရက်နေ့ မနက်ပိုင်းက ပြည်သူ့ဆေးရုံမှာ တက်ရောက်ကုသနေသည့် အသက် (၃၅)နှစ်ခန့်ရှိ ကိုဗစ်အတည်ပြုလူနာ အမျိုးသမီးတစ်ဦး သေဆုံးသွားကြောင်း သတင်းရရှိသည်။

လာရှိုးမြို့တွင် ဇူလိုင် ၁ ရက်တည်း ကိုဗစ် – ၁၉ လူနာ (၇) ဦး သေဆုံးခဲ့ပြီးအဆိုပါနေ့တွင် ကိုဗစ် အတည်ပြုလူနာသစ် (၇၃)ဦး တိုးသည်။

ထို့ကြောင့် လားရှိုးမြို့တွင် အတည်ပြုလူနာ စုစုပေါင်း (၄၈၂)ဦးထိ ရှိကာ သေဆုံးသူ ၁၂ ဦးထိ ရှိလာကြောင်း သိရသည်။

တာချီလိတ်မြို့တွင် ယနေ့ ဇူလိုင် ၂ ရက်က မွန်းလွဲပိုင်း ၁၂နာရီအထိ ကိုဗစ် – ၁၉ အတည်ပြုလူနာသစ် (၁၄)ဦး ထပ်မံတွေ့ရှိခဲ့ပြီး ကိုဗစ်ကူးစက်ခံရသူ စုစုပေါင်း (၃၀)ဦးထိ ရှိလာပြီဖြစ်ကြောင်း သိရသည်။

ကျောက်မဲမြို့တွင်လည်း ကိုဗစ် – ၁၉ ကူးစက်ခံရသူ မြင့်တက်လျက်ရှိပြီး ဇူလိုင် ၁ ရက်နေ့ထိ ရောဂါကူးစက်ခံရသူ (၆၃)ဦးထိ ရှိလာပြီ ဖြစ်သည်။

ဇူလိုင်(၃)ရက်မှစတင်ပြီး မြို့တွင်းရှိ ဈေးများကို ရက်အကန့်အသတ်မရှိပိတ်ထားရန်နှင့် စားသောက်ဆိုင်များ ပါဆယ်စနစ်ဖြင့်သာ ရောင်းချရန် ညွှန်ကြားထားပေမယ့် စာသင်ကျောင်းများအား ပိတ်ခိုင်းခြင်းမရှိသေးကြောင်း သိရသည်။

သီပေါမြို့မှာ ယနေ့ ဇူလိုင် (၂)ရက်နေ့တွင် ကိုဗစ် – ၁၉ ရောဂါ ကူးစက်ခံရသည့် လူနာသစ် (၁၅)ဦး တွေ့ရှိခဲ့ကြောင်း သိရသည်။